ಲಾಕ್‌ಡೌನ್‌ ಪರಿಣಾಮ: ಮಾರುಕಟ್ಟೆ ಸ್ಥಗಿತ, ಎಲೆಕೋಸು ಬೆಳೆ ನಾಶಪಡಿಸಿದ ರೈತ

ರಾಜಾನುಕುಂಟೆ ಸಮೀಪದ ಅದ್ದೆ ವಿಶ್ವನಾಥಪುರ ಗ್ರಾಮದ ರೈತ ವಿ.ಆರ್.ನಾರಾಯಣರೆಡ್ಡಿ ಅವರು, ಅರಕೆರೆ ಗ್ರಾಮದಲ್ಲಿ ಒಂದೂವರೆ ಎಕರೆ ಜಮೀನಿನಲ್ಲಿ ಸುಮಾರು ₹ 70 ಸಾವಿರ ಖರ್ಚು ಮಾಡಿ ಎಲೆಕೋಸು ಬೆಳೆದಿದ್ದರು. ಇನ್ನೇನು ಬೆಳೆಯನ್ನು ಕಟಾವು ಮಾಡುವ ವೇಳೆಗೆ ಸಂಚಾರ ಮತ್ತು ಮಾರುಕಟ್ಟೆ ಸ್ಥಗಿತಗೊಂಡು, ಕೂಲಿಯಾಳುಗಳ ಸಮಸ್ಯೆಯೂ ಎದುರಾಯಿತು. ಇದರಿಂದ ಮಾರಾಟಕ್ಕೆ ಅವಕಾಶವಾಗದೆ ಟ್ರ್ಯಾಕ್ಟರ್‌ನಿಂದ ಬೆಳೆಯನ್ನು ನಾಶಪಡಿಸಿದ್ದಾರೆ.

‘ರೈತರು ಬೆಳೆದ ಬೆಳೆಗಳಿಗೆ ಮಾರುಕಟ್ಟೆಯಲ್ಲಿ ಸರಿಯಾದ ಬೆಲೆಯಿಲ್ಲ. ಇದರ ಜೊತೆಗೆ ಇತ್ತೀಚೆಗೆ ಲಾಕ್‌ ಡೌನ್‌ನಿಂದ ವಾಹನಗಳ ಸಂಚಾರವನ್ನೂ ಸ್ಥಗಿತಗೊಳಿಸಲಾಗಿತ್ತು. ಇದರಿಂದ ಕಳೆದ 15 ದಿನಗಳಿಂದೀಚೆಗೆ 7 ಎಕರೆ ಪ್ರದೇಶದಲ್ಲಿ ಬೆಳೆದಿದ್ದ ಸೀಬೆಹಣ್ಣಿನ ಬೆಳೆಯೂ ಹಾಳಾಗಿ, 3 ಟನ್‌ನಷ್ಟು ಸೀಬೆಹಣ್ಣಿನ ಫಸಲು ಹಣ್ಣಾಗಿ ನೆಲಕ್ಕೆ ಉದುರಿ ಸುಮಾರು ₹90 ಸಾವಿರ ನಷ್ಟವಾಯಿತು. ಈಗ ಎಲೆಕೋಸು ಬೆಳೆಯೂ ಮಾರಾಟವಾಗದೆ ಒಂದೂವರೆ ಲಕ್ಷ ನಷ್ಟವಾಗಿದೆ’ ಎಂದು ನಾರಾಯಣರೆಡ್ಡಿ ದೂರಿದರು.

ಟೊಮೆಟೊ, ದ್ರಾಕ್ಷಿ ಮತ್ತಿತರ ಬೆಳೆಗಳನ್ನು ಮಾರಾಟ ಮಾಡಲು ಸಾಧ್ಯವಾಗದೆ ಬೀದಿಗೆ ಸುರಿದಮೇಲೆ ಎಚ್ಚೆತ್ತುಕೊಂಡ ಸರ್ಕಾರ, ಈಗ ರೈತರು ಬೆಳೆದಿರುವ ತರಕಾರಿಗಳನ್ನು ಮಾರುಕಟ್ಟೆಗೆ ತರಲು ಸಂಚಾರಕ್ಕೆ ವಿನಾಯಿತಿ ನೀಡಲಾಗಿದೆ ಎಂದು ಘೋಷಿಸಿದೆ. ಸರ್ಕಾರ ಈ ರೀತಿ ಮನಬಂದಂತೆ ನಿರ್ಧಾರಗಳನ್ನು ಕೈಗೊಳ್ಳುತ್ತಿರುವುದರಿಂದ ರೈತರು ಗೊಂದಲದಲ್ಲಿ ಸಿಲುಕಿದ್ದಾರೆ ಎಂದರು.

ಇಲ್ಲಿಯವರೆಗೆ ಆಗಿರುವ ನಷ್ಟದಿಂದ ರೈತರು ತೀವ್ರ ಸಂಕಷ್ಟದಲ್ಲಿದ್ದು, ಇದನ್ನು ಭರಿಸುವವರು ಯಾರು? ನಷ್ಟ ಅನುಭವಿಸಿರುವ ರೈತರಿಗೆ ಸರ್ಕಾರ ತುರ್ತಾಗಿ ಪರಿಹಾರ ಘೋಷಿಸಬೇಕು ಎಂದು ಒತ್ತಾಯಿಸಿದರು.