ಲಾಸ್‌ಏಂಜಲೀಸ್ (ಪಿಟಿಐ): ಏಕಕಾಲಕ್ಕೆ 10,421 ವಂಶವಾಹಿಗಳನ್ನು ವೀಕ್ಷಿಸಲು ಸಾಧ್ಯವಾಗುವ ನೂತನ ತಂತ್ರಜ್ಞಾನವನ್ನು ವಿಜ್ಞಾನಿಗಳು ಅಭಿವೃದ್ಧಿಪಡಿಸಿದ್ದಾರೆ.
ಅಂದರೆ, ಸಸ್ತನಿಗಳ ಒಂದು ಜೀವಕೋಶದಲ್ಲಿರುವ ಸುಮಾರು ಅರ್ಧದಷ್ಟು ವಂಶವಾಹಿಗಳನ್ನು ಒಂದೇ ಬಾರಿಗೆ ವೀಕ್ಷಿಸಬಹುದಾಗಿದೆ.
seqFISH (ಇಂಟ್ರಾನ್ ಸೀಕ್ವೆನ್ಷಿಯಲ್ ಫ್ಲೊರೊಸೆನ್ಸ್ ಇನ್ ಹೈಬ್ರಿಡೈಸೇಷನ್) ಎನ್ನುವ ಈ ತಂತ್ರಜ್ಞಾನದಿಂದ, ನೂರಾರು ಜೀವಕೋಶಗಳಲ್ಲಿರುವ ವಂಶವಾಹಿ ಗುಚ್ಛಗಳಲ್ಲಿ ಏನೆಲ್ಲಾ ಪ್ರಕ್ರಿಯೆಗಳು ನಡೆಯುತ್ತಿವೆ ಎನ್ನುವುದನ್ನು ಏಕಕಾಲಕ್ಕೆ ತಿಳಿಯಲು ಸಾಧ್ಯವಾಗುತ್ತದೆ.
‘ಯಾವುದೇ ಜೀವಕೋಶಕ್ಕೂ ಈ ತಂತ್ರಜ್ಞಾನ ಅನ್ವಯಿಸಬಹುದು’ ಎಂದು ಅಮೆರಿಕದ ಕ್ಯಾಲಿಫೋರ್ನಿಯ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಸಂಶೋಧನಾ ತಜ್ಞ ಲಾಂಗ್ ಕಾಯ್ ತಿಳಿಸಿದ್ದಾರೆ.
‘ಜೀವಕೋಶಗಳ ವಿಧ, ಅವುಗಳ ಚಟುವಟಿಕೆ ಮಾತ್ರವ‌ಲ್ಲದೆ ಒಳಗಿರುವ ವರ್ಣತಂತು ರಚನೆಗಳನ್ನೂ ಗುರುತಿಸಲು ಈ ತಂತ್ರಜ್ಞಾನ ಸಹಾಯ ಮಾಡುತ್ತದೆ’ ಎಂದು ಅವರು ಹೇಳಿದ್ದಾರೆ.
ಈ ಮೊದಲು ವಿಜ್ಞಾನಿಗಳು ಸೂಕ್ಷ್ಮದರ್ಶಕ ಯಂತ್ರದ ಮೂಲಕ ಒಂದು ಬಾರಿಗೆ ಕೇವಲ ನಾಲ್ಕರಿಂದ ಐದು ವಂಶವಾಹಿಗಳನ್ನಷ್ಟೇ ವೀಕ್ಷಿಸಲು ಸಾಧ್ಯವಾಗುತ್ತಿತ್ತು.
