ಬೆಂಗಳೂರು: ಬೀದರ್ನಲ್ಲಿ5.6 ಡಿಗ್ರಿ ಸೆಲ್ಸಿಯಸ್ ಕನಿಷ್ಠ ತಾಪಮಾನ ಮಂಗಳವಾರ ದಾಖಲಾಗಿದೆ. ಇದು, ಈ ಋತುಮಾನದ ಅತಿ ಕಡಿಮೆ ತಾಪಮಾನ ಎನ್ನಲಾಗಿದ್ದು, ಈ ಹಿಂದೆ 2019ರ ಜ.1ರಂದು ದಾಖಲಾಗಿದ್ದ 6.0 ಡಿಗ್ರಿ ಸೆಲ್ಸಿಯಸ್ ಅತಿ ಕಡಿಮೆ ತಾಪಮಾನದ ದಾಖಲೆಯನ್ನು ಹಿಂದಿಕ್ಕಿದೆಎಂದು ಹವಾಮಾನ ಇಲಾಖೆ ತಿಳಿಸಿದೆ.
ಬೀದರ್ನಲ್ಲಿ ಕಳೆದ ನವೆಂಬರ್ನಲ್ಲೂ ಕನಿಷ್ಠ 7 ಡಿಗ್ರಿ ಸೆಲ್ಸಿಯಸ್ ತಾಪಮಾನ ದಾಖಲಾಗಿತ್ತು. ವಿಜಯಪುರದಲ್ಲಿ 9.5 ಡಿಗ್ರಿ ಸೆಲ್ಸಿಯಸ್, ಧಾರವಾಡ (10.2), ದಾವಣಗೆರೆ, ಹಾವೇರಿ, ಗದಗ, ಬೆಳಗಾವಿ ವಿಮಾನ ನಿಲ್ದಾಣಗಳಲ್ಲಿ ತಲಾ 11 ಡಿಗ್ರಿ ಸೆಲ್ಸಿಯಸ್ ಕಡಿಮೆ ತಾಪಮಾನ ಮಂಗಳವಾರ ದಾಖಲಾಗಿದೆ.
‘ಚಳಿಯ ತೀವ್ರತೆಯಿಂದ ತಾಪಮಾನದಲ್ಲಿ ಕುಸಿತ ಕಂಡು ಬರುತ್ತಿದೆ. 2019ರ ಬಳಿಕ ಈವರೆಗಿನ ಅವಧಿಯಲ್ಲಿ ಇದೇ ಅತಿ ಕಡಿಮೆ ತಾಪಮಾನ ದಾಖಲಾಗಿರುವುದು. ಜನವರಿ 15ರವರೆಗೆ ತಾಪಮಾನ ಇನ್ನೂ ಕಡಿಮೆಯಾಗುವ ಸಾಧ್ಯತೆಗಳಿವೆ’ ಎಂದು ಹವಾಮಾನ ಇಲಾಖೆ ನಿರ್ದೇಶಕ ಸಿ.ಎಸ್.ಪಾಟೀಲ ‘ಪ್ರಜಾವಾಣಿ’ಗೆ ತಿಳಿಸಿದರು.
‘ಉತ್ತರದಿಂದ ಬೀಸುತ್ತಿರುವ ಒಣಹವೆ, ಶೀತಗಾಳಿ, ಶುಭ್ರ ಆಕಾಶ ಹಾಗೂ ಲ್ಯಾನಿನೊ ಪ್ರಭಾವಗಳಿಂದ ತಾಪಮಾನ ಇಳಿಮುಖವಾಗುತ್ತಿದೆ. ಸರಾಸರಿಗಿಂತ ಈ ಬಾರಿ ಚಳಿ ಹೆಚ್ಚುತ್ತಲೇ ಇದೆ. ಮುಂಜಾನೆಯಿಂದಲೇ ದಟ್ಟವಾದ ಮಂಜು ಆವರಿಸುತ್ತಿದ್ದು, ಸಂಚಾರಕ್ಕೆ ತೊಡಕು ಮಾಡುತ್ತಿದೆ. ಕೆಲ ಬೆಳೆಗಳಿಗೆ ಈ ಹವಾಮಾನ ಸ್ಥಿತಿ ಪೂರಕವೂ ಆಗಿದೆ’ ಎಂದವರು ಮಾಹಿತಿ ನೀಡಿದರು.