ಭಾಲ್ಕಿ (ಬೀದರ್ ಜಿಲ್ಲೆ): ತಾಲ್ಲೂಕಿನ ಸಿದ್ದೇಶ್ವರ ರೈಲ್ವೆ ಗೇಟ್ ಬಳಿ ಮಂಗಳವಾರ ಮಧ್ಯಾಹ್ನ ರೈಲು ಡಿಕ್ಕಿ ಹೊಡೆದು ಟೆಂಪೊ ನಜ್ಜುಗುಜ್ಜಾಯಿತು. ಅದೃಷ್ಟವಶಾತ್ ಪ್ರಾಣಹಾನಿ ಸಂಭವಿಸಲಿಲ್ಲ. ಯಾರಿಗೂ ಗಾಯಗಳು ಆಗಲಿಲ್ಲ.
‘ಸೋಯಾ ಅವರೆ ಚೀಲಗಳಿಂದ ತುಂಬಿದ್ದ ಟೆಂಪೊ ಹಲಬರ್ಗಾದಿಂದ ಕಣಜಿಯತ್ತ ಹೊರಟಿತ್ತು. ರೈಲ್ವೆ ರಕ್ಷಣಾ ಗೇಟ್ ಹಾಕಿದ್ದು, ವೇಗವಾಗಿ ಚಾಲನೆ ಮಾಡುತ್ತಿದ್ದ ಚಾಲಕನಿಗೆ ಟೆಂಪೊ ನಿಯಂತ್ರಿಸಲು ಸಾಧ್ಯವಾಗದೇ ರಕ್ಷಣಾ ಗೇಟ್‌ಗೆ ಡಿಕ್ಕಿ ಹೊಡೆದ. ಟೆಂಪೊ ರೈಲ್ವೆ ಹಳಿ ಮೇಲೆ ನಿಂತಿತು’ ಎಂದು ಸ್ಥಳೀಯರಾದ ಶಶಿಧರ ಸೀತಾ ‘ಪ್ರಜಾವಾಣಿ’ಗೆ ತಿಳಿಸಿದರು.
‘ವಿಚಲಿತಗೊಂಡ ರೈಲ್ವೆ ಗೇಟ್ ಸಿಬ್ಬಂದಿ ಅಪಘಾತ ತಪ್ಪಿಸಲು ಸುಮಾರು 1 ಕಿ.ಮೀ.ವರೆಗೆ ಹಳಿ ಮಧ್ಯೆ ಕೆಂಪು ಧ್ವಜ ಹಿಡಿದು ಓಡಿದ್ದಾರೆ. ಇದನ್ನು ಗಮನಿಸಿದ ಚಾಲಕ ರೈಲು ನಿಲ್ಲಿಸಲು ಹರಸಾಹಸಪಟ್ಟರು. ಆದರೆ, ಸಾಧ್ಯವಾಗದೇ ಟೆಂಪೊಗೆ ಡಿಕ್ಕಿ ಹೊಡೆಯಿತು’ ಎಂದು ತಿಳಿಸಿದರು.
ಸ್ಥಳಕ್ಕೆ ಬಂದ ಧನ್ನೂರ ಠಾಣೆ ಪೊಲೀಸರು ಮತ್ತು ಬೀದರ್ ರೈಲ್ವೆ ಪೊಲೀಸರು ಸ್ಥಳಕ್ಕೆ ಟೆಂಪೊ ಚಾಲಕನನ್ನು ಕರೆದೊಯ್ದರು. ರೈಲು ಡಿಕ್ಕಿ ಹೊಡೆದ ವಿಡಿಯೊ ತುಣುಕುಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
