ಹುಲಸೂರ: ಸಮೀಪದ ಭಾಲ್ಕಿ ತಾಲ್ಲೂಕಿನ ಕೊಂಗಳಿ ಗ್ರಾಮದ ಸರ್ಕಾರಿ ಪ್ರೌಢಶಾಲಾ ಆವರಣದಲ್ಲಿ ಕತ್ತಲಾಗುತ್ತಿದ್ದಂತೆಯೇ ಕುಡುಕರ ಹಾವಳಿ ಹಾಗೂ ಪುಂಡರ ಆಟದ ತಾಣವಾಗಿದ್ದು, ಇದರಿಂದ ವಿದ್ಯಾರ್ಥಿಗಳ ಶಿಕ್ಷಣದ ಮೇಲೆ ತೀವ್ರ ಪ್ರಭಾವ ಬೀರುತ್ತಿದೆ.
ಶಾಲೆಯ ಆವರಣದಲ್ಲಿ ಸಂಪೂರ್ಣ ಕಾಂಪೌಂಡ್ ವ್ಯವಸ್ಥೆ ಇಲ್ಲ. ಶಾಲೆಯ ಮುಂಭಾಗದಲ್ಲಿ ವಿಶಾಲವಾದ ಆಟದ ಮೈದಾನ ಇದೆ. ವಿದ್ಯಾರ್ಥಿಗಳ ಆಟೋಟಕ್ಕೆ ಇರುವ ಈ ಸ್ಥಳದಲ್ಲಿ ಕುಡುಕರ ಕಾಟ ಹೆಚ್ಚಿದೆ. ರಜೆಯ ಸಂದರ್ಭದಲ್ಲಿ ಮದ್ಯದ ಬಾಟಲು, ಸಿಗರೇಟ್‌ ತುಂಡು, ಪ್ಲಾಸ್ಟಿಕ್ ಲೋಟಗಳು ಬಿದ್ದಿವೆ. ಕುಡುಕರು ಬಾಟಲಿಗಳನ್ನು ಒಡೆದು ಹಾಕುವುದರಿಂದ ಹಲವು ಬಾರಿ ವಿದ್ಯಾರ್ಥಿಗಳು ಗಾಯಗೊಂಡಿದ್ದಾರೆ. ಬಾಟಲಿಗಳನ್ನು ಸ್ವಚ್ಛಗೊಳಿಸುವುದೇ ಶಿಕ್ಷಕರ, ಮಕ್ಕಳ ಕೆಲಸವಾಗಿದೆ.
‘ರಜಾ ದಿನಗಳಲ್ಲಿ ನಂತರದಲ್ಲಿ ಶಾಲಾ ಸ್ವಚ್ಛತೆಯೇ ಸವಾಲಾಗಿದೆ. ಎಮ್ಮೆ, ಹಸು, ಕುರಿಗಳನ್ನು ಇಲ್ಲಿಯೇ ಮೇಯಿಸುತ್ತಾರೆ. ಎಷ್ಟು ಬಾರಿ ಹೇಳಿದರೂ ಅವರು ಅರ್ಥ ಮಾಡಿಕೊಳ್ಳುತ್ತಿಲ್ಲ’ ಎಂದು ಶಿಕ್ಷಕರು ಬೇಸರ ವ್ಯಕ್ತಪಡಿಸಿದರು.
‘ಅಧಿಕಾರಿಗಳು ಕೂಡಲೇ ಕುಡುಕರ ಹಾವಳಿ ತಪ್ಪಿಸಬೇಕು. ಕಿಡಿಗೇಡಿಗಳ ವಿರುದ್ಧ ಪ್ರಕರಣ ದಾಖಲಿಸಬೇಕು ಎಂದು ಮಾಜಿ ಸಿಡಿಎಂಸಿ ಅಧ್ಯಕ್ಷ ಶ್ರೀಶಾಂತ್ ಪಾಟೀಲ ಒತ್ತಾಯಿಸಿದ್ದಾರೆ.
