ಬೀದರ್ | ಕುಟುಂಬದವರು ಮದುವೆಗೆ ನಿರಾಕರಿಸಿದ್ದಕ್ಕೆ ಪ್ರೇಮಿಗಳ ಆತ್ಮಹತ್ಯೆ

ಹೈದರಾಬಾದ್‌ನಲ್ಲಿ ಎಲೆಕ್ಟ್ರಿಷಿಯನ್‌ ಆಗಿದ್ದ ಶರತ್ ಚಳಕೆ (26) ಮನೆಯಲ್ಲಿ ನೇಣು ಹಾಕಿಕೊಂಡರೆ, ಪದವಿ ಶಿಕ್ಷಣ ಪಡೆದಿರುವ ಸಂಗೀತಾ ಎಮ್ಮೆನೋರ್ (22) ಬಾವಿಗೆ ಹಾರಿ ಪ್ರಾಣ ಬಿಟ್ಟಿದ್ದಾರೆ.

ಶರತ್ ಹಾಗೂ ಸಂಗೀತಾ ನಾಲ್ಕು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದರು. ಸಂಗೀತಾಳ ಕುಟುಂಬದವರು ಬೇರೆ ವರ ನೋಡಿ ನಿಶ್ಚಿತಾರ್ಥ ಮಾಡಿದ್ದರು. ಈ ಸುದ್ದಿ ತಿಳಿದ ಶರತ್ ಪಾಲಕರು ಸಂಗೀತಾಳ ಮನೆಗೆ ಹೋಗಿ ನಮ್ಮ ಮಗ ಹಾಗೂ ನಿಮ್ಮ ಮಗಳು ಪರಸ್ಪರ ಪ್ರೀತಿಸುತ್ತಿದ್ದಾರೆ. ಅವಳಿಗೆ ಬೇರೆ ಕಡೆ ಮದುವೆ ಮಾಡ ಕೊಡಬೇಡಿ ಎಂದು ಮನವಿ ಮಾಡಿಕೊಂಡಿದ್ದರು. ಇಬ್ಬರೂ ಒಂದೇ ಸಮುದಾಯಕ್ಕೆ ಸೇರಿದ್ದರೂ ಯುವತಿಯ ಮನೆಯವರು ಒಪ್ಪಿರಲಿಲ್ಲ.

ಇದರಿಂದ ಮನನೊಂದು ಶರತ್ ಸೋಮವಾರ ತಡ ರಾತ್ರಿ ಮನೆಯಲ್ಲಿ ನೇಣು ಹಾಕಿಕೊಂಡಿದ್ದಾರೆ. ತನಗಾಗಿ ಗೆಳೆಯ ಪ್ರಾಣತೆತ್ತ ಸುದ್ದಿ ಕೇಳಿ ಆಘಾತಗೊಂಡ ಸಂಗೀತಾ ಮನೆಯ ಸಮೀಪದ ಬಾವಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.