ಭಗವದ್ಗೀತೆ ಕಾಲಾತೀತ ಮೌಲ್ಯಾದರ್ಶಗಳ ಅಮರಗೀತೆ

7
ಪಂಢರಪುರ ಇಸ್ಕಾನ್‌ನ ಪ್ರಮುಖ ಶ್ರವಣ ಭಕ್ತದಾಸ ಅಭಿಮತ

ಭಗವದ್ಗೀತೆ ಕಾಲಾತೀತ ಮೌಲ್ಯಾದರ್ಶಗಳ ಅಮರಗೀತೆ

Published:
Updated:
Deccan Herald

ಬೀದರ್‌: ‘ಭಗವದ್ಗೀತೆ ಕಾಲಾತೀತ ಮೌಲ್ಯಾದರ್ಶಗಳ ಅಮರಗೀತೆಯಾಗಿದೆ. ಇದಕ್ಕೆ ಐದು ಸಾವಿರ ವರ್ಷಗಳ ಇತಿಹಾಸವಿದ್ದರೂ ನಿತ್ಯ ವಿನೂತನವಾಗಿದೆ’ ಎಂದು ಪಂಢರಪುರ ಇಸ್ಕಾನ್‌ನ ಪ್ರಮುಖ ಶ್ರವಣ ಭಕ್ತದಾಸ ಅಭಿಪ್ರಾಯಪಟ್ಟರು.

ನಗರದ ರಾಮದಾಸ ಮಂದಿರದಲ್ಲಿ ಇಸ್ಕಾನ್ ವತಿಯಿಂದ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಕೃಷ್ಣ ಕಥಾಮೃತ ಕುರಿತು ಪ್ರವಚನ ನೀಡಿದರು.

‘ಕೃಷ್ಣನ ಕಥಾಮೃತ ಕೇಳುವುದರಿಂದ ಮನುಷ್ಯನ ದುಃಖ ಶಮನವಾಗುತ್ತದೆ. ಕೃಷ್ಣ ಜನ್ಮಾಷ್ಟಮಿ ಆಚರಣೆಯಲ್ಲಿ ವೃದ್ಧರೂ ಪಾಲ್ಗೊಂಡು ಆನಂದಾನುಭೂತಿಯನ್ನು ಹೊಂದಬೇಕು’ ಎಂದು ಹೇಳಿದರು.

‘ದೇವರನ್ನು ಅರ್ಥ ಮಾಡಿಕೊಳ್ಳದಿದ್ದರೆ ಮನುಷ್ಯ ಜನ್ಮ ವ್ಯರ್ಥವಾಗುತ್ತದೆ. ಮನಸ್ಸಿನ ಚಂಚಲತೆಯನ್ನು ವಿಜ್ಞಾನದಿಂದ ದೂರ ಮಾಡಲು ಆಗುವುದಿಲ್ಲ. ಆದರೆ ಅಧ್ಯಾತ್ಮಕ್ಕೆ ಮನಸ್ಸಿನ ಚಂಚಲತೆ ದೂರ ಮಾಡುವ ಶಕ್ತಿಯಿದೆ. ಮಹಾತ್ಮರ ದರ್ಶನದಿಂದ, ಅವರ ಪಾದಸ್ಪರ್ಶದಿಂದ ಮನಸ್ಸು ಪ್ರಶಾಂತತೆ ಹೊಂದುತ್ತದೆ’ ಎಂದು ನುಡಿದರು.

‘ಬಹ್ಮಾಂಡ ಭಗವಂತನ ಸೃಷ್ಟಿಯಾಗಿದೆ. ಇದರ ಒಡೆಯ ಅವನಲ್ಲದೇ ಬೇರಾರೂ ಅಲ್ಲ. ಭಾರತದ ಸನಾತನ ಸಂಸ್ಕೃತಿಯನ್ನು ಈಗಿನವರು ಆದರ್ಶವಾಗಿ ಸ್ವೀಕರಿಸಿದರೆ ಈಗಿನ ಎಷ್ಟೋ ಸಮಸ್ಯೆಗಳು ಪರಿಹಾರವಾಗುತ್ತವೆ. ಇಂದಿನ ಬಹುತೇಕ ಸಮಸ್ಯೆಗಳಿಗೆ ನಾವು ವಿದೇಶಿ ಸಂಸ್ಕೃತಿ ಅನುಕರಣೆ ಮಾಡುತ್ತಿರುವುದೇ ಕಾರಣವಾಗಿದೆ’ ಎಂದು ಹೇಳಿದರು.

‘ಮನುಷ್ಯ ತಾಯಿ ಗರ್ಭದಿಂದ ಹೊರ ಬರುತ್ತಿದ್ದಂತೆ ಮಾಯೇ ಆತನನ್ನು ಆವರಿಸುತ್ತದೆ. ಆದರೆ ಯೋಗ ಭಗವಂತನನ್ನು ಮತ್ತೆ ಜೋಡಿಸುತ್ತದೆ. ದೇವರು ಸಾಧು, ಸಂತರು, ಯೋಗಿ, ಮುನಿಗಳಲ್ಲಿ ಅಂತರ್ಗತನಾಗಿದ್ದಾನೆ. ಹೀಗಾಗಿ ನಾವು ಯೋಗಕ್ಕೆ ಮೊರೆ ಹೋಗಬೇಕು. ಯೋಗಪ್ರಾಪ್ತಿಗೆ ಭಕ್ತಿಯೊಂದೇ ಸಾಧನವಾಗಿದೆ’ ಎಂದರು.

‘ಭಗವಂತನಿಗೆ ವಜ್ರವೈಡೂರ್ಯಗಳ ಹಸಿವಿಲ್ಲ. ಆತನಿಗೆ ನಿರ್ಮಲ, ನಿಷ್ಕಾಮ ಭಕ್ತಿಯ ಹಸಿವಿದೆ. ಮಾಯೆ ಅಂಧಕಾರದ ಸ್ವರೂಪದಲ್ಲಿದ್ದರೆ ಕೃಷ್ಣ ಸೂರ್ಯ ಸ್ವರೂಪದಲ್ಲಿದ್ದಾನೆ. ಸೂರ್ಯನಿದ್ದೆಡೆ ಅಂಧಕಾರ ಹೇಗೆ ಇರುವುದಿಲ್ಲವೋ ಹಾಗೆ ಕೃಷ್ಣನಿರುವೆಡೆ ಮಾಯೆ ಕೂಡ ಇರುವುದಿಲ್ಲ. ಇಂದು ಉತ್ಕಟ ಭಕ್ತಿಯ ಕೊರತೆಯ ಕಾರಣ ದೇವರು ಸಹಜವಾಗಿ ಕಾಣಿಸುತ್ತಿಲ್ಲ’ ಎಂದು ಹೇಳಿದರು.

‘ದುರ್ಯೋಧನ ಶ್ರೀಕೃಷ್ಣನಿಗೆ ಐವತ್ತಾರು ಭಕ್ಷ್ಯ ತುಪ್ಪದಿಂದ ತಯಾರಿಸಿ ಊಟಕ್ಕೆ ನೀಡಿದರೂ ಶ್ರೀಕೃಷ್ಣ ತೃಪ್ತಿ ಹೊಂದಲಿಲ್ಲ. ಆದರೆ, ಸುಧಾಮ ನೀಡಿದ ಅವಲಕ್ಕಿಯನ್ನೇ ತುಂಬಾ ತೃಪ್ತಿಯಿಂದ ಸೇವಿಸುತ್ತಾನೆ. ಸುಧಾಮನಲ್ಲಿ ಕೃಷ್ಣಭಕ್ತಿ ಇದ್ದುದೇ ಇದಕ್ಕೆ ಕಾರಣವಾಗಿದೆ. ದೇವರು ವೈಕುಂಠದಲ್ಲಿ ಇಲ್ಲ. ಯೋಗಿಗಳ ಹೃದಯದಲ್ಲೂ ಇಲ್ಲ. ಆತನಿರುವುದು ಭಕ್ತರ ಸಂಗದಲ್ಲಿ, ಅವರ ಭಜನೆ ಕೀರ್ತನೆಯಲ್ಲಿ’ ಎಂದು ನುಡಿದರು.

ಡಾ.ನೀಲೇಶ ದೇಶಮುಖ, ಶ್ರೀರತನ ಮಾಲಾಣಿ, ವಿಶ್ವನಾಥ ಗಾದಾ ಸುಬ್ರಹ್ಮಣ್ಯ ಪ್ರಭು ಇದ್ದರು. ನೂಪುರ ನೃತ್ಯ ಅಕಾಡೆಮಿ, ಸ್ಫೂರ್ತಿ ಮೆಲೊಡೀಸ್‌ನಿಂದ ನೃತ್ಯ ಗೀತ ಗಾಯನ ನಡೆಯಿತು.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !