ಗ್ರಾಮದ ದ್ವಾರದಲ್ಲಿಯೇ ತಿಪ್ಪೆಗುಂಡಿಗಳು: ಗಬ್ಬೆದ್ದು ನಾರುತ್ತಿದೆ ಸಿಂಧನಕೇರಾ

ಈ ಗ್ರಾಮದಲ್ಲಿ 6 ಸಾವಿರಕ್ಕೂ ಮೇಲ್ಪಟ್ಟು ಜನಸಂಖ್ಯೆ ಇದೆ. 12 ಜನ ಗ್ರಾ.ಪಂ ಸದಸ್ಯರಿದ್ದಾರೆ. ಆದರೆ ನೈರ್ಮಲ್ಯ ಮರೀಚಿಕೆಯಾಗಿದೆ.

ರಸ್ತೆ ಮೇಲೆ ಚರಂಡಿ ನೀರು: ಗ್ರಾಮದಲ್ಲಿ ಪ್ರಮುಖ ಕಡೆ ಮಾತ್ರ ಸಿಸಿ ರಸ್ತೆಗಳು ನಿರ್ಮಾಣ ಆಗಿದೆ. ಆದರೆ ಬಹುತೇಕ ಬಡಾವಣೆಯಲ್ಲಿ ರಸ್ತೆ ಚರಂಡಿಗಳು ನಿರ್ಮಿಸಿಲ್ಲ. ಪ್ರತಿ ಮನೆಯಿಂದ ಹರಿದು ಬರುವ ತ್ಯಾಜ್ಯ ನೀರು ರಸ್ತೆ ಮೇಲೆ ಹರಿಯುತ್ತಿದೆ. ಅಲ್ಲಲ್ಲಿ ರಸ್ತೆ ಕಿತ್ತು ಹೋಗಿದ್ದರಿಂದ ನೀರು ನಿಂತಲ್ಲೇ ನಿಂತು ಗಬ್ಬು ವಾಸನೆ ಬೀರುತ್ತಿದೆ.

ರೋಗ ಭೀತಿ: ತ್ಯಾಜ ನೀರು ನಿಲ್ಲುವುದರಿಂದ ಸೊಳ್ಳೆಗಳು ಹೆಚ್ಚಾಗಿವೆ. ಸಾಂಕ್ರಾಮಿಕ ರೋಗದ ಭೀತಿ ಜನರನ್ನು ಕಾಡುತ್ತಿದೆ. ಈಗಾಗಲೇ ಕೆಲವರು ಡೆಂಗಿಯಿಂದ ಬಳಲುತ್ತಿದ್ದಾರೆ ಎಂದು ಗ್ರಾಮದ ನಿವಾಸಿ ಭೀಮರೆಡ್ಡಿ ತಿಳಿಸಿದ್ದಾರೆ.

ರಾಶಿ ರಾಶಿ ಕಸ: ಗ್ರಾಮದಲ್ಲಿ ಎಲ್ಲಿ ನೋಡಿದರಲ್ಲಿ ರಾಶಿ ಕಸ, ಬೀಡಿ ಸಿಗರೇಟು, ಗುಟಕಾ ಚೀಟಿಗಳು ಬಿದ್ದಿರುವುದು ಕಾಣಿಸುತ್ತವೆ. ಗ್ರಾಮ ಪಂಚಾಯಿತಿ ಅವರು ಸ್ವಚ್ಚತೆ ಮಾಡಿಲ್ಲ ಎಂದು ಗ್ರಾಮಸ್ಥರು ದೂರುತ್ತಾರೆ.

ಗ್ರಾಮದಿಂದ ಹುಮನಾಬಾದ್ ಪಟ್ಟಣಕ್ಕೆ ಆಗಮಿಸುವ ರಸ್ತೆಯ‌ ಎರಡು ಭಾಗದಲ್ಲಿ ಗಿಡ ಗಂಟೆಗಳು ಆವರಿಸಿವೆ. ಎರಡು ಬದಿಯಲ್ಲಿ ಗಿಡಗಳು ಒಂದಕ್ಕೊಂದು ತಳಕು ಹಾಕಿಕೊಂಡಿದ್ದು ಎದುರಿನಿಂದ ಬರುವ ವಾಹನಗಳು ಕಾಣಿಸುವುದಿಲ್ಲ. ವಾಹನಗಳು ಸೈಡ್‌ ತೆಗೆದು ಕೊಳ್ಳಲು ಜಾಗವೇ ಇಲ್ಲ. ಚಾಲಕರು ಎಚ್ಚರ ತಪ್ಪಿ ಚಲಾಯಿಸಿದರೆ ಅಪಘಾತ ಖಚಿತ. ಕೆಲ ಬಡಾವಣೆಗಳಲ್ಲಿಯೂ ಜಾಲಿಗಿಡಗಳು ವ್ಯಾಪಕವಾಗಿ ಬೆಳೆದಿವೆ.