ಭಾಲ್ಕಿ | ಹೊಲಕ್ಕೆ ನುಗ್ಗಿದ ನೀರು: ಬೆಳೆ ಹಾನಿ

ಕಾರಂಜಾ ನದಿ ಪಾತ್ರದ ಗೋಧಿಹಿಪ್ಪರಗಾ, ಚಂದಾಪೂರ, ಬಾಳೂರ, ದಾಡಗಿ, ಕುರುಬಖೇಳಗಿ, ಡಾವರಗಾಂವ, ಕಣಜಿ, ಜ್ಯಾಂತಿ, ನೇಳಗಿ ಗ್ರಾಮಗಳ ಹಲವಾರು ರೈತರ ಹೊಲಗಳಿಗೆ ನೀರು ನುಗ್ಗಿ ತೊಗರಿ, ಸೋಯಾ ಅವರೆ ಬೆಳೆಗಳು ಸಂಪೂರ್ಣ ನಾಶವಾಗಿದ್ದು, ರೈತರು ಕಣ್ಣೀರಿನಲ್ಲಿ ಕೈತೊಳೆಯುವಂತಾಗಿದೆ. ಬೆಳೆ ಹಾನಿಯ ಬಗ್ಗೆ ಸೂಕ್ತ ತನಿಖೆ ನಡೆಸಿ ಸರ್ಕಾರ ಪರಿಹಾರ ನೀಡಬೇಕು ಎಂದು ವಾಲ್ಮಿಕಿ ಸಮಾಜದ ಸಿದ್ದು ಜಮಾದಾರ ಸರ್ಕಾರಕ್ಕೆ ಆಗ್ರಹಿಸಿದ್ದಾರೆ.

ಸೇತುವೆ ಮೇಲಿಂದ ಹರಿದ ನೀರು: ಸಂಪರ್ಕ ಕಡಿತ: ಕಾರಂಜಾ ಜಲಾಶಯದಿಂದ ನೀರು ಹರಿಬಿಟ್ಟಿರುವುದರಿಂದ ತಾಲ್ಲೂಕಿನ ಆನಂದವಾಡಿ-ನಿಡೇಬನ, ಕಟ್ಟಿತುಗಾಂವ-ಕಣಜಿ ಗ್ರಾಮಗಳ ನಡುವೆಯ ಕಾರಂಜಾ ಬ್ರಿಡ್ಜ್ ಕಂ ಬ್ಯಾರೇಜ್ ಮೇಲಿಂದ ನೀರು ಹರಿಯುತ್ತಿದ್ದು, ರಸ್ತೆ ಸಂಪರ್ಕ ಕಡಿತಗೊಂಡಿದೆ. ನಿಡೇಬನ, ಕೊಟಗೀರಾ ಕೊರುರು, ಕಟ್ಟಿತುಗಾಂವ ಗ್ರಾಮಗಳ ಜನರು ತಾಲ್ಲೂಕು ಕೇಂದ್ರಕ್ಕೆ ಬರಲು ಪರದಾಡುತ್ತಿದ್ದಾರೆ.

ಪ್ರತಿ ಸಲ ಮಳೆಗಾಲ ಬಂದಾಗ ಇದೆ ಪರಿಸ್ಥಿತಿ ಇದೆ. ಹಲವು ಸಲ ಸಂಬಂಧಪಟ್ಟ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದರು ಗಮನ ಹರಿಸುತ್ತಿಲ್ಲ ಎಂದು ಗ್ರಾಮಸ್ಥರು ದೂರಿದರು. ಸಂಬಂಧಪಟ್ಟ ಅಧಿಕಾರಿಗಳು, ಜನಪ್ರತಿನಿಧಿಗಳು ಕೂಡಲೇ ಈ ಕಡೆ ಗಮನ ಹರಿಸಿ ಸೇತುವೆ ಮೇಲ್ದರ್ಜೆಗೆ ಏರಿಸಬೇಕು ಎಂದು ಯುವ ಕ್ರಾಂತಿ ಸಂಘಟನೆಯ ತಾಲ್ಲೂಕು ಅಧ್ಯಕ್ಷ ಸಂಗಮೇಶ ಭೂರೆ ಆಗ್ರಹಿಸಿದ್ದಾರೆ.