ಚಾಮರಾಜನಗರ: ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಗಂಡು ಹುಲಿಯೊಂದು, ವಾಹನದಲ್ಲಿ ಹೋಗುತ್ತಿದ್ದವರನ್ನು ರಾಜ ಗಾಂಭೀರ್ಯದಲ್ಲಿ ನೋಡಿ ನಂತರ ತನ್ನ ಪಾಡಿಗೆ ಹೆಜ್ಜೆ ಹಾಕುತ್ತಿರುವ ವಿಡಿಯೊ ವೈರಲ್‌ ಆಗಿದೆ.
ಇದು ಬಂಡೀಪುರದ ವಿಡಿಯೊ ಎಂದು ನಿರ್ದೇಶಕ ಟಿ.ಬಾಲಚಂದ್ರ ಅವರು ‘ಪ್ರಜಾವಾಣಿ’ಗೆ ದೃಢಪಡಿಸಿದ್ದಾರೆ.
ಹುಲಿಯು ದಷ್ಟಪುಷ್ಟವಾಗಿದ್ದು, 6 ರಿಂದ 8 ವರ್ಷ ಆಗಿರಬಹುದು ಎಂದು ಹೇಳಲಾಗುತ್ತಿದೆ. ಕೆಲವು ದಿನಗಳಿಂದೀಚೆಗೆ ಪದೇ ಪದೇ ಕಾಣಿಸಿಕೊಳ್ಳುತ್ತಿದೆ. ಜನರು ಎದುರುಗಡೆ ಇದ್ದರೂ ಯಾವುದೇ ಪ್ರತಿಕ್ರಿಯೆ ತೋರದೆ, ಸುಮ್ಮನೆ ಇರುತ್ತದೆ.
ಅರಣ್ಯ ಇಲಾಖೆ ಸಿಬ್ಬಂದಿ ಈ ಹುಲಿಗೆ ‘ಮಾಯಾರ್‌ ಕಿಂಗ್’ ಎಂದು ಹೆಸರು ಇಟ್ಟಿದ್ದಾರೆ. ‘ಮಾಯಾರ್‌ ಕಣಿವೆ ಭಾಗದಲ್ಲಿ ಹುಲಿ ಕಂಡು ಬಂದಿರುವುದರಿಂದ ಆ ಹೆಸರು ಇಡಲಾಗಿದೆ’ ಎಂದು ಟಿ.ಬಾಲಚಂದ್ರ ಅವರು ತಿಳಿಸಿದರು.
ಹಿಂದೆ ಬಂಡೀಪುರದಲ್ಲಿ ಪ್ರಿನ್ಸ್ ಎಂಬ ಹುಲಿ ಖ್ಯಾತಿ ಗಳಿಸಿತ್ತು. ಛಾಯಾಗ್ರಾಹಕರ ಅಚ್ಚುಮೆಚ್ಚಿನ ಹುಲಿಯಾಗಿತ್ತು. ಮೂರು ವರ್ಷಗಳ ಹಿಂದೆ ಅದು ಮೃತಪಟ್ಟಿತ್ತು. ಅದರ ಸ್ಥಾನವನ್ನು ‘ಮಾಯಾರ್‌ ಕಿಂಗ್’ ತುಂಬಲಿದ್ದಾನೆ ಎಂಬ ನಿರೀಕ್ಷೆಯಲ್ಲಿ ಅರಣ್ಯದ ಸಿಬ್ಬಂದಿ ಇದ್ದಾರೆ.
ಮದುಮಲೆ -ಮಸಿಣಗುಡಿ ರಸ್ತೆಯಲ್ಲಿ ಬದಿಯಲ್ಲೂ ಆಗಾಗ ಹುಲಿ ಕಾಣಿಸಿಕೊಳ್ಳುತ್ತಿದ್ದು,ಅನೇಕ ಭಾರಿ ಅರಣ್ಯ ಸಿಬ್ಬಂದಿ ಹಾಗೂ ಚಾಲಕರು ಚಿತ್ರಗಳನ್ನು ಸೆರೆ ಹಿಡಿದಿದ್ದಾರೆ.
