ಚಾಮರಾಜನಗರ: ಮೈಸೂರಿನಲ್ಲಿ ಶುಕ್ರವಾರ ಆಯೋಜಿಸಿದ್ದ ಕಾಂಗ್ರೆಸ್ ಜನಾಂದೋಲನ ಸಮಾವೇಶಕ್ಕೆ ಚಾಮರಾಜನಗರದಿಂದ ಹೆಚ್ಚುವರಿಯಾಗಿ ಕೆಎಸ್ಆರ್ಟಿಸಿ ಬಸ್ಗಳನ್ನು ಬಿಟ್ಟಿದ್ದರಿಂದ ಗುಂಡ್ಲುಪೇಟೆ, ಕೊಳ್ಳೇಗಾಲ, ಯಳಂದೂರು ಹಾಗೂ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರವಾದ ಮಲೆ ಮಹದೇಶ್ವರ ಬೆಟ್ಟಕ್ಕೆ ತೆರಳುವವರು ಬಸ್ ಸಿಗದೆ ಪರದಾಡಿದರು.
ಬೆಳಿಗ್ಗೆ ಚಾಮರಾಜನಗರದ ಕೆಎಸ್ಆರ್ಟಿಸಿ ಬಸ್ ನಿಲ್ದಾಣದಲ್ಲಿ ಮೈಸೂರು ಮಾರ್ಗ ಹೊರತಾಗಿ ಇತರ ಮಾರ್ಗಗಳಿಗೆ ಸಮರ್ಪಕ ಬಸ್ಗಳ ಸೌಲಭ್ಯ ಇರಲಿಲ್ಲ. ನಗರದಿಂದ ಇತರ ತಾಲ್ಲೂಕುಗಳಿಗೆ ಹಾಗೂ ಬೆಂಗಳೂರು ಕಡೆಗೆ ತೆರಳಬೇಕಾದ ಸಾರ್ವಜನಿಕರು, ಶಾಲಾ ಕಾಲೇಜು ವಿದ್ಯಾರ್ಥಿಗಳು, ಸರ್ಕಾರಿ ನೌಕರರು, ಶಿಕ್ಷಕರು ತೀವ್ರ ಸಮಸ್ಯೆ ಎದುರಿಸಿದರು. ನಿಲ್ದಾಣದ ತುಂಬ ಪ್ರಯಾಣಿಕರು ಜಮಾಯಿಸಿದ್ದು ಕಂಡುಬಂತು.
ಅಪರೂಪಕ್ಕೆ ಬಂದು ಹೋಗುತ್ತಿದ್ದ ಬಸ್ಗಳನ್ನು ಹತ್ತಲು ಪ್ರಯಾಣಕರು ಮುಗಿಬೀಳುತ್ತಿದ್ದರು. ಪರಿಣಾಮ ವೃದ್ಧರು, ಮಹಿಳೆಯರು, ಮಕ್ಕಳು ಸಮಸ್ಯೆ ಅನುಭವಿಸಿದರು. ಚಾಮರಾಜನಗರದಿಂದ 100ಕ್ಕೂ ಹೆಚ್ಚು ಬಸ್ಗಳನ್ನು ಮೈಸೂರು ಕಡೆಗೆ ಬಿಟ್ಟಿರುವುದರಿಂದ ಪ್ರಯಾಣಿಕರಿಗೆ ಸಮಸ್ಯೆಯಾಗಿದೆ ಎಂದು ಬಸ್ ಚಾಲಕರೊಬ್ಬರು ತಿಳಿಸಿದರು.
