ಚಾಮರಾಜನಗರ ನಗರಸಭೆ ಚುನಾವಣೆ: ’ಕೈ’ ಮೇಲಾಗುವುದೋ; ‘ಕಮಲ’ ಅರಳುವುದೋ?

ಅಧಿಕಾರ ಹಿಡಿಯಲು ಸಂಖ್ಯಾಬಲವೇ ನಿರ್ಣಾಯಕವಾಗಿರುವುದರಿಂದ ಮ್ಯಾಜಿಕ್ ನಂಬರ್ ತಲುಪಲು ರಾಜಕೀಯ ಪಕ್ಷಗಳು ಕೊನೆಯ ಕ್ಷಣದ ಕಸರತ್ತು ನಡೆಸುತ್ತಿವೆ. ತಂತ್ರ ಪ್ರತಿತಂತ್ರಗಳ ಮಧ್ಯೆ ಯಾರ ಕೈ ಮೇಲಾಗಲಿದೆ ಕಾದು ನೋಡಬೇಕಿದೆ.

31 ಸದಸ್ಯರ ಬಲದ ಚಾಮರಾಜನಗರ ನಗರಸಭೆಯಲ್ಲಿ ಬಿಜೆಪಿ 15, ಕಾಂಗ್ರೆಸ್‌ 8, ಎಸ್‌ಡಿಪಿಐ 6, ತಲಾ ಒಬ್ಬರು ಬಿಎಸ್‌ಪಿ ಹಾಗೂ ಪಕ್ಷೇತರರು ಇದ್ದಾರೆ. ಕ್ಷೇತ್ರದ ಸಂಸದರು ಹಾಗೂ ಶಾಸಕರಿಗೂ ನಗರಸಭೆ ಅಧ್ಯಕ್ಷ ಹಾಗೂ ಉಪಾಧ್ಯಕ್ಷರ ಆಯ್ಕೆಯಲ್ಲಿ ಮತ ಚಲಾಯಿಸುವ ಹಕ್ಕು ಇರುವುದರಿಂದ ಸಂಖ್ಯಾ ಬಲ 33ಕ್ಕೆ ಏರಿದಂತಾಗಿದೆ.

ಬಿಎಸ್‌ಪಿ ಸದಸ್ಯ ಅನರ್ಹ:

ನಗರಸಭೆಯ ಕೌನ್ಸಿಲ್ ಸಭೆಗಳಿಗೆ ಒಂದು ವರ್ಷಕ್ಕಿಂತಲೂ ಹೆಚ್ಚಿನ ಅವಧಿಗೆ ಗೈರಾಗಿರುವ ಕಾರಣ ನೀಡಿ 27ನೇ ವಾರ್ಡ್‌ನ ಬಿಎಸ್‌ಪಿ ಸದಸ್ಯ ವಿ.ಪ್ರಕಾಶ್ ಅವರ ಸದಸ್ಯತ್ವವನ್ನು ಜಿಲ್ಲಾಧಿಕಾರಿ ಅನರ್ಹಗೊಳಿಸಿರುವುದರಿಂದ ನಗರಸಭೆಯ ಒಟ್ಟು ಸದಸ್ಯರ ಬಲ 32ಕ್ಕೆ ಕುಸಿದಂತಾಗಿದೆ.

17 ‌ಮ್ಯಾಜಿಕ್ ನಂಬರ್:

ಪ್ರಸ್ತತ 32 ಸದಸ್ಯ ಬಲದ ನಗರಸಭೆಯ ಅಧಿಕಾರ ಚುಕ್ಕಾಣಿ ಹಿಡಿಯಲು 17 ಮಂದಿಯ ಬೆಂಬಲ ಅಗತ್ಯವಿದೆ. ಮೇಲ್ನೋಟಕ್ಕೆ ಬಿಜೆಪಿ (15) ಅತಿ ಹೆಚ್ಚು ಸದಸ್ಯರ ಬಲಹೊಂದಿದ್ದರೂ ಅಧಿಕಾರ ಹಿಡಿಯಲು ಎರಡು ಮತದ ಕೊರತೆ ಎದುರಾಗಿದೆ.

8 ಸದಸ್ಯರ ಬಲ ಹೊಂದಿರುವ ಕಾಂಗ್ರೆಸ್‌ ಪಕ್ಷ ಸಂಸದರು ಹಾಗೂ ಶಾಸಕರ ಮತಗಳ ಜೊತೆಗೆ ಎಸ್‌ಡಿಪಿಐನ 6 ಹಾಗೂ ಒಬ್ಬರು ಪಕ್ಷೇತರ ಸದಸ್ಯರ ಬೆಂಬಲ ಪಡೆದು 17ರ ಮ್ಯಾಜಿಕ್ ನಂಬರ್ ತಲುಪಿ ಸುಲಭವಾಗಿ ಅಧಿಕಾರ ಪಡೆಯುವ ಲೆಕ್ಕಾಚಾರದಲ್ಲಿದೆ. ಅಂದುಕೊಂಡಂತೆ ಎಲ್ಲವೂ ನಡೆದರೆ ನಗರಸಭೆಯಲ್ಲಿ ಕಾಂಗ್ರೆಸ್ ಸುಲಭವಾಗಿ ಅಧಿಕಾರ ಹಿಡಿಯಲಿದೆ ಎಂದೇ ವಿಶ್ಲೇಷಿಸಲಾಗುತ್ತಿದೆ.

ಬಿಜೆಪಿಗೆ ಪ್ರತಿಷ್ಠೆ ಪ್ರಶ್ನೆ:

ಹೆಚ್ಚು ಸಂಖ್ಯಾಬಲ ಹೊಂದಿದ್ದರೂ ಗುಂಡ್ಲುಪೇಟೆ, ಕೊಳ್ಳೇಗಾಲದಲ್ಲಿ ಅಧಿಕಾರದಿಂದ ವಂಚಿತವಾಗಿರುವ ಬಿಜೆಪಿಗೆ ಚಾಮರಾಜನಗರ ನಗರಸಭೆ ಪ್ರತಿಷ್ಠೆಯ ಕಣವಾಗಿದೆ. ಅತಿ ಹೆಚ್ಚು ಸದಸ್ಯರನ್ನು ಹೊಂದಿದ್ದರೂ ಅಧಿಕಾರ ಕಳೆದುಕೊಂಡರೆ ತೀವ್ರ ಮುಖಭಂಗ ಎದುರಾಗಲಿರುವ ಹಿನ್ನೆಲೆಯಲ್ಲಿ ಶತಾಯಗತಾಯ ಚಾಮರಾಜನಗರ ನಗರಸಭೆಯ ಅಧಿಕಾರ ಹಿಡಿಯಲು ತಂತ್ರ ರೂಪಿಸಿದೆ ಎನ್ನಲಾಗಿದೆ.

‘ಗೈರು’ ರಾಜಕೀಯ:

‘ಹೇಗಾದರೂ ಮಾಡಿ ಅಧಿಕಾರ ಹಿಡಿಯಲೇಬೇಕು ಎಂಬ ಜಿದ್ದಿಗೆ ಬಿದ್ದಿರುವ ರಾಜಕೀಯ ಪಕ್ಷಗಳು ‘ಗೈರು’ ಹಾಗೂ ‘ಅಡ್ಡ ಮತದಾನ’ ಮಾಡಿಸುವ ರಾಜಕೀಯಕ್ಕೆ ಮುಂದಾಗಿವೆ ಎನ್ನಲಾಗಿದೆ. ಸೆ.9ರಂದು ನಡೆಯುವ ಚುನಾವಣೆಯಲ್ಲಿ ಕಾಂಗ್ರೆಸ್ ಪಕ್ಷದ ಇಬ್ಬರು ಸದಸ್ಯರು ಗೈರು ಅಥವಾ ಅಡ್ಡ ಮತದಾನ ಮಾಡಿದರೆ ಬಿಜೆಪಿಯ ಗೆಲುವಿನ ಹಾದಿ ಸುಗಮವಾಗಲಿದೆ. ಹಾಗೆಯೇ ಬಿಜೆಪಿಯ ಒಬ್ಬರು ಸದಸ್ಯ ಗೈರು ಅಥವಾ ಅಡ್ಡ ಮತದಾನ ಮಾಡಿದರೆ ಅಧಿಕಾರ ಕಾಂಗ್ರೆಸ್ ಪಾಲಾಗಲಿದೆ. ಕೊನೆ ಕ್ಷಣದವರೆಗೂ ಯಾವುದೇ ಸಾಧ್ಯತೆಗಳನ್ನು ಅಲ್ಲಗಳೆಯುವಂತಿಲ್ಲ’ ಎನ್ನುತ್ತಾರೆ ರಾಜಕೀಯ ತಜ್ಞರು.

ಪ್ರತಿಕ್ರಿಯೆಗೆ ಲಭ್ಯರಾಗಲಿಲ್ಲ:

ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆ ಸಂಬಂಧ ಪ್ರತಿಕ್ರಿಯೆ ಪಡೆಯಲು ಬಿಜೆಪಿ ಜಿಲ್ಲಾ ಘಟಕದ ಅಧ್ಯಕ್ಷ ಸಿ.ಎಸ್‌.ನಿರಂಜನಕುಮಾರ್ ಅವರಿಗೆ ಕರೆ ಮಾಡಿದರೂ ಸ್ವೀಕರಿಸಲಿಲ್ಲ.