ಮಾರುಕಟ್ಟೆಯಲ್ಲಿ ಸೀತಾಫಲದ ಸಿಹಿ: ಹಣ್ಣುಗಳ ಧಾರಣೆ ಇಳಿತ

ಮಳೆಗಾಲದಲ್ಲಿ ಸಿಗುವ ಫಲಗಳಲ್ಲಿ ಸೀತಾಫಲವೂ ಒಂದು. ಉತ್ತಮ ಮಳೆಯಾದರೆ ಸೀತಾಫಲ ಸಿಹಿ ಇನ್ನಷ್ಟು ಹೆಚ್ಚಾಗುತ್ತದೆ. ಈಗ ಮಾರುಕಟ್ಟೆಯಲ್ಲಿ ಸೀತಾಫಲ ಕಾಣಸಿಗುತ್ತಿದೆ.

ಹಾಪ್‌ಕಾಮ್ಸ್‌ನಲ್ಲಿ ಕೆಜಿಗೆ ₹40 ಇದೆ. ಹಣ್ಣುಗಳ ಅಂಗಡಿ, ತಳ್ಳುಗಾಡಿಗಳಲ್ಲಿ ₹40ರಿಂದ ₹50 ಮಾರಾಟವಾಗುತ್ತಿದೆ.

ಜಿಲ್ಲೆಯಲ್ಲೂ ಸೀತಾಫಲ ಬೆಳೆಯುವ ರೈತರಿದ್ದಾರೆ. ನಂಜನಗೂಡು, ಮೈಸೂರು ಭಾಗಗಳಿಂದಲೂ ಜಿಲ್ಲೆಗೆ ಹಣ್ಣು ಬರುತ್ತದೆ. ತೋಟವನ್ನು ಗುತ್ತಿಗೆ ತೆಗೆದುಕೊಂಡು, ಹಣ್ಣುಗಳನ್ನು ಕಟಾವು ಮಾಡಿ ಸ್ವತಃ ಮಾರಾಟ ಮಾಡುವ ವ್ಯಾಪಾರಿಗಳೂ ಹಲವರಿದ್ದಾರೆ.

‘ಈಗ ಸೀತಾಫಲ ಹೆಚ್ಚು ಸಿಹಿ ಇರುತ್ತದೆ. ಕೆಜಿಗೆ ₹40ಕ್ಕೆ ಮಾರಾಟ ಮಾಡುತ್ತಿದ್ದೇವೆ’ ಎಂದು ಹಾಪ್‌ಕಾಮ್ಸ್‌ ವ್ಯಾಪಾರಿ ಮಧು ಹೇಳಿದರು.

ಸೇಬು, ಮೂಸಂಬಿ ಅಗ್ಗ: ಹಾಪ್‌ಕಾಮ್ಸ್‌ನಲ್ಲಿ ಏಲಕ್ಕಿ ಬಾಳೆ (₹80) ಪಚ್ಚೆಬಾಳೆ (₹40), ದ್ರಾಕ್ಷಿ (₹120) ಮತ್ತು ದಾಳಿಂಬೆಗಳ (₹160) ಬೆಲೆಯಲ್ಲಿ ಯಥಾಸ್ಥಿತಿ ಮುಂದುವರಿದಿದೆ.

ಸೇಬು, ಮೂಸಂಬಿ, ಕಿತ್ತಳೆ ಬೆಲೆಗಳಲ್ಲಿ ಕೆಜಿಗೆ ₹20 ಇಳಿದಿದೆ. ₹120 ಇದ್ದ ಸೇಬಿನ ಬೆಲೆ ₹100ಕ್ಕೆ ಕುಸಿದಿದೆ. ಮೂಸಂಬಿ ಬೆಲೆ ₹80ರಿಂದ ₹60ಕ್ಕೆ ತಲುಪಿದೆ. ಕಿತ್ತಳೆಯ ಧಾರಣೆಯೂ ₹100ರಿಂದ ₹80ಕ್ಕೆ ಇಳಿಕೆ ಕಂಡಿದೆ.

ಬೀನ್ಸ್‌ ತುಟ್ಟಿ: ತರಕಾರಿಗಳ ಪೈಕಿ ಬೀನ್ಸ್‌ ಬೆಲೆಯಲ್ಲಿ ಈ ವಾರ ಏರಿಕೆಯಾಗಿದೆ. ಹಾಪ್‌ಕಾಮ್ಸ್‌ನಲ್ಲಿ ಕೆಜಿ ಬೀನ್ಸ್‌ಗೆ ₹80 ಇದೆ. ಕಳೆದ ವಾರ ₹60 ಇತ್ತು.

'ಮಳೆ ಕಾರಣಕ್ಕೆ ಬೆಳೆ ನಷ್ಟವಾಗಿದ್ದು, ಕಡಿಮೆ ‌‍ಪ್ರಮಾಣದಲ್ಲಿ ಬರುತ್ತಿದೆ. ಹೀಗಾಗಿ ಬೇಡಿಕೆ ಹೆಚ್ಚಾಗಿದೆ" ಎಂದು ವ್ಯಾಪಾರಿ ಮಧು ಹೇಳಿದರು.

ಹಸಿಮೆಣಸಿನಕಾಯಿಯ ಬೆಲೆಯಲ್ಲಿ ಗಣನೀಯ ಇಳಿಕೆಯಾಗಿದ್ದು, ₹80ರಿಂದ ₹30ಕ್ಕೆ ಕುಸಿದಿದೆ. ₹80 ಇದ್ದ ದಪ್ಪಮೆಣಸಿನಕಾಯಿ ಬೆಲೆ ಸೋಮವಾರ ₹60 ಇತ್ತು. ಉಳಿದ ತರಕಾರಿಗಳ ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ.

ಹೂವಿಗೆ ಬೇಡಿಕೆ ಕಡಿಮೆ

ವರಮಹಾಲಕ್ಷ್ಮಿ ಹಬ್ಬದ ನಂತರ ಹೂವುಗಳ ಧಾರಣೆ ಇಳಿಮುಖವಾಗಿ ಸಾಗಿದ್ದು, ಈ ವಾರ ಇನ್ನಷ್ಟು ಕುಸಿದಿದೆ. ದಸರಾ ಆರಂಭವಾಗುವವರೆಗೂ ಇದೇ ಪರಿಸ್ಥಿತಿ ಮುಂದುವರಿಯಲಿದೆ ಎಂದು ಹೇಳುತ್ತಾರೆ ವ್ಯಾಪಾರಿಗಳು.

ನಗರಕ್ಕೆ ಸಮೀಪದ ಚೆನ್ನಿಪುರಮೋಳೆಯ ಬಿಡಿ ಹೂವಿನ ಮಾರುಕಟ್ಟೆಯಲ್ಲಿ ಸೋಮವಾರ ಕನಕಾಂಬರದ ಬೆಲೆ ಕೆಜಿಗೆ ₹400 ಇತ್ತು.

‘ಕಾಕಡ, ಮರ್ಲೆ ₹200ಕ್ಕೆ ಸಿಗುತ್ತಿದೆ. ಚೆಂಡು ಹೂವಿಗೆ ₹10 ಇದೆ. ಸೇವಂತಿಗೆ ₹100 ಇದೆ. ಬಟನ್‌ ಗುಲಾಬಿ ₹80ಗೆ ಮಾರಾಟವಾಗುತ್ತಿದೆ’ ಎಂದು ಬಿಡಿ ಹೂವಿನ ವ್ಯಾಪಾರಿ ರವಿ ಹೇಳಿದರು.