ಆರ್‌ಟಿಒ ‘ಸಾರಥಿ– 4’ ತಂತ್ರಾಂಶ ಗೊಂದಲ?

ಸಾರಿಗೆ ಕಚೇರಿಗಳಲ್ಲಿ ಈ ಹಿಂದೆ ಇದ್ದ ‘ಸಾರಥಿ– 3’ ತಂತ್ರಾಂಶದ ಬದಲು, ಮುಂದುವರಿದ ‘ಸಾರಥಿ– 4’ ತಂತ್ರಾಂಶವನ್ನು ಈ ತಿಂಗಳ ಮೊದಲ ವಾರದಿಂದ ಅನುಷ್ಠಾನಕ್ಕೆ ತರಲಾಗಿದೆ. ಸದ್ಯ ಇದರಲ್ಲೇ ಕಲಿಕಾ ಚಾಲನಾ ನೋಂದಣಿ (ಎಲ್‌ಎಲ್‌ಆರ್‌) ಹಾಗೂ ಚಾಲನಾ ಪರವಾನಗಿಗೆ (ಡಿಎಲ್‌) ಮಾಹಿತಿ ಭರ್ತಿ ಮಾಡಿ, ಪರೀಕ್ಷೆಯನ್ನು ಆನ್‌ಲೈನ್‌ನಲ್ಲೇ ಎದುರಿಸಬೇಕಿದೆ. ಆದರೆ, ಇದು ಅಸಾಧ್ಯವೆಂದು ಗ್ರಾಮೀಣ ಪ್ರದೇಶದ ಜನರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

‘ತಲೆ ಕೆಡಿಸಿಕೊಳ್ಳದೆ ತಂತ್ರಾಂಶ ಸಿದ್ಧಪಡಿಸಿದೆ’: ‘ಈಗ ಪರವಾನಗಿ ಪಡೆಯಲು ನೂತನ ‘ಸಾರಥಿ–4’ ತಂತ್ರಾಂಶದಲ್ಲಿ ಅರ್ಜಿ ಭರ್ತಿ ಮಾಡಬೇಕು. ನಂತರ, ಅಲ್ಲಿ ಕೇಳಲಾಗುವ 15 ಪ್ರಶ್ನೆಗಳಿಗೆ ನಿಗದಿಪಡಿಸಿದ ಕಾಲಾವಧಿಯಲ್ಲಿ ಉತ್ತರಿಸಬೇಕು. ಆದರೆ, ಸರಿ ಉತ್ತರ ಆಯ್ಕೆ ಮಾಡುವುದರ ಒಳಗೆ ಆ ಸಮಯ ಮುಗಿದೇ ಹೋಗಿರುತ್ತದೆ. ಕನಿಷ್ಠ 10 ಸರಿ ಉತ್ತರ ನೀಡದಿದ್ದರೆ ಅರ್ಜಿ ತಿರಸ್ಕೃತಗೊಳ್ಳಲಿದೆ. ಇದು ಕಂಪ್ಯೂಟರ್‌ನ ಮೌಸ್ ಹಿಡಿಯಲೂ ಬಾರದವರಿಗೆ ‘ಕಬ್ಬಿಣದ ಕಡಲೆ’ಯಂತಾಗಿದೆ. ಇಲಾಖೆ ತಲೆ ಕೆಡಿಸಿಕೊಳ್ಳದೆ ಈ ತಂತ್ರಾಂಶ ಸಿದ್ಧಪಡಿ
ಸಿದೆ’ ಎಂದು ಆಕ್ಷೇಪ ವ್ಯಕ್ತಪಡಿಸುತ್ತಾರೆ ನಗರದ ಓಂ ಚಾಲನಾ ಶಾಲೆ ಮಾಲೀಕ ರಾಘು ನಾಯ್ಕ.

ಮರಳಿ ಪರೀಕ್ಷೆ ಬರೆಯಲು ₹ 50:  ‘ಆನ್‌ಲೈನ್‌ನಲ್ಲೇ ಸ್ಲಾಟ್ ಪಡೆದು, ಸಮಯ ನಿಗದಿಪಡಿಸಿಕೊಂಡು ಎಲ್‌ಎಲ್‌ಆರ್‌ ಪರೀಕ್ಷೆಗೆ ಹಾಜರಾಗಬೇಕು. ಆದರೆ, ಈ ವೇಳೆ ಆತ ಆನ್‌ಲೈನ್‌ ಪರೀಕ್ಷೆಯಲ್ಲಿ ಅನುತ್ತೀರ್ಣನಾದರೆ ಮರಳಿ ಪರೀಕ್ಷೆ ಕಟ್ಟಲು ₹ 50 ತುಂಬಿ ಮತ್ತೆ ಸ್ಲಾಟ್ ಪಡೆಯಬೇಕು. ಜತೆಗೆ, ಇನ್ನೊಂದು ಪರೀಕ್ಷೆ ಎದುರಿಸಲು ಒಂದು ವಾರ ಕಾಯಬೇಕು. ಇದು ದುಡಿಯುವ ವರ್ಗದ ಜನರಿಗೆ ಕಷ್ಟಕರವಾಗಿದೆ’ ಎನ್ನುತ್ತಾರೆ ಅವರು.

ವಿಡಿಯೊ ಸಹಾಯ..ಅನಕ್ಷರಸ್ಥರಿಗೆ, ಕಂಪ್ಯೂಟರ್ ಬಳಸಲು ಬಾರದವರಿಗೆ ಇದು ಕಷ್ಟವಾಗಬಹುದು ನಿಜ. ಆದರೆ, ಕಂಪ್ಯೂಟರ್‌ ಪರೀಕ್ಷೆ ಬರೆಯವವರಿಗೆ ತಂತ್ರಾಂಶದಲ್ಲಿ ಪ್ರಮುಖ ಭಾಷೆಗಳಲ್ಲಿ ವಿಡಿಯೊ (ಧ್ವನಿ ಸಮೇತ) ಮಾಹಿತಿ ಇದೆ. ಅದನ್ನೊಮ್ಮೆ ವೀಕ್ಷಿಸಿ, ಬಳಿಕ ಅದರಂತೆ ಮುಂದುವರಿಯಬಹುದು ಎನ್ನುತ್ತಾರೆ ಪ್ರಭಾರ ಪ್ರಾದೇಶಿಕ ಸಾರಿಗೆ ಅಧಿಕಾರಿ ರಾಮಕೃಷ್ಣ ರೈ.

ನಾವು ಮೀನುಗಾರರು. ನಮಗೆ ಕಂಪ್ಯೂಟರ್‌ ಬಗ್ಗೆ ಅಷ್ಟೊಂದು ಜ್ಞಾನ ಇಲ್ಲ. ಹೇಳಿಕೊಟ್ಟರೂ ಅದನ್ನು ಬಳಸಲು ತಿಳಿಯುವುದಿಲ್ಲ
– ರಾಜನ್ ಉಳ್ವೇಕರ, ಸ್ಥಳೀಯ ಮೀನುಗಾರ 

ದೇವರಾಜ ನಾಯ್ಕ