ಮಾರುಕಟ್ಟೆ ಪ್ರವೇಶಿಸಿದ ಮೆಗಾ ಡೇರಿ ಉತ್ಪನ್ನ

7
ಮೊದಲ ಉತ್ಪನ್ನವಾಗಿ ಸಿದ್ಧಗೊಂಡ ಗುಡ್‌ಲೈಫ್‌ ಒಂದು ಲೀಟರ್‌ ಇಟ್ಟಿಗೆ ಮಾದರಿ ಪ್ಯಾಕೆಟ್‌ಗಳು, ಸರಳ ಸಮಾರಂಭದಲ್ಲಿ ಆರು ರಾಜ್ಯಗಳಿಗೆ ರವಾನೆ

ಮಾರುಕಟ್ಟೆ ಪ್ರವೇಶಿಸಿದ ಮೆಗಾ ಡೇರಿ ಉತ್ಪನ್ನ

Published:
Updated:
Deccan Herald

ಚಿಕ್ಕಬಳ್ಳಾಪುರ: ಕೋಲಾರ–ಚಿಕ್ಕಬಳ್ಳಾಪುರ ಜಿಲ್ಲಾ ಸಹಕಾರಿ ಹಾಲು ಉತ್ಪಾದಕರ ಸಂಘಗಳ ಒಕ್ಕೂಟ (ಕೋಚಿಮುಲ್‌) ತಾಲ್ಲೂಕಿನ ನಂದಿ ಕ್ರಾಸ್‌ ಬಳಿ ನಿರ್ಮಿಸಿರುವ ಮೆಗಾ ಡೇರಿಯಲ್ಲಿ ಮೊದಲ ಉತ್ಪನ್ನವಾಗಿ ಸಿದ್ಧಗೊಂಡ ಗುಡ್‌ಲೈಫ್‌ ಒಂದು ಲೀಟರ್‌ (ಬ್ರಿಕ್ ಪ್ಯಾಕಿಂಗ್) ಇಟ್ಟಿಗೆ ಮಾದರಿ ಪ್ಯಾಕೆಟ್‌ಗಳನ್ನು ಸೋಮವಾರ ಮಾರುಕಟ್ಟೆಗೆ ಪರಿಚಯಿಸಲಾಯಿತು.

ಡೇರಿಯಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಶಾಸಕ ಹಾಗೂ ಕೋಚಿಮುಲ್ ಅಧ್ಯಕ್ಷ ಕೆ.ವೈ.ನಂಜೇಗೌಡ ಮತ್ತು ಆಡಳಿತ ಮಂಡಳಿ ನಿರ್ದೇಶಕರು ಗುಡ್‌ಲೈಫ್‌ ಹಾಲು ಹೊತ್ತು ವಿವಿಧ ರಾಜ್ಯಗಳತ್ತ ಪ್ರಯಾಣ ಬೆಳೆಸಿದ ಲಾರಿಗಳಿಗೆ ಹಸಿರು ನಿಶಾನೆ ತೋರಿಸಿದರು.

ಕಾರ್ಯಕ್ರಮದಲ್ಲಿ ಮಾತನಾಡಿದ ನಂಜೇಗೌಡ, ‘ಈ ಹಿಂದೆ ರಕ್ಷಣಾ ಇಲಾಖೆಗೆ ನಮ್ಮ ಒಕ್ಕೂಟ ಪೂರೈಸುತ್ತಿದ್ದ 80 ಲಕ್ಷ ಲೀಟರ್ ಹಾಲಿನಲ್ಲಿ ಹಾಸನ ಒಕ್ಕೂಟಕ್ಕೆ ಅರ್ಧಪಾಲು ಕೊಟ್ಟ ಬಳಿಕ ನಮಗೆ ಕೆಎಂಎಫ್ ಹೊಸದಾಗಿ ನಿತ್ಯ 50 ಸಾವಿರ ಲೀಟರ್ ಹಾಲಿಗೆ ಮಾರುಕಟ್ಟೆ ಅವಕಾಶ ಮಾಡಿಕೊಟ್ಟಿದೆ. ಅದರ ಅದರಡಿಯೇ ಇವತ್ತು ಒಂದು ಲಕ್ಷ ಲೀಟರ್ ಗುಡ್‌ಲೈಫ್‌ ಹಾಲನ್ನು ವಿವಿಧ ರಾಜ್ಯಗಳಿಗೆ ಕಳುಹಿಸಲಾಗುತ್ತಿದೆ’ ಎಂದು ಹೇಳಿದರು.

‘ಮೆಗಾ ಡೇರಿಯಲ್ಲಿ ಸದ್ಯ ನಿತ್ಯ 30 ಸಾವಿರ ಲೀಟರ್ ಗುಡ್‌ಲೈಫ್‌ನ ಒಂದು ಲೀಟರ್‌ ಬ್ರಿಕ್ ಪ್ಯಾಕಿಂಗ್ ಉತ್ಪಾದನೆ ಆರಂಭಿಸಿದ್ದೇವೆ. ಈ ಉತ್ಪಾದನೆಯನ್ನು ಹಂತ ಹಂತವಾಗಿ ಏರಿಕೆ ಮಾಡುತ್ತ ಸೆಪ್ಟೆಂಬರ್ ಹೊತ್ತಿಗೆ ಒಂದು ಲಕ್ಷ ಲೀಟರ್‌ಗೆ ಹೆಚ್ಚಿಸುವ ಗುರಿ ಹೊಂದಲಾಗಿದೆ. ಮುಂಬರುವ ದಿನಗಳಲ್ಲಿ ಇಲ್ಲಿ ಫ್ಲೆಕ್ಸಿ ಪ್ಯಾಕ್, ತುಪ್ಪ, ಪನ್ನೀರ್ ಉತ್ಪಾದನೆ ಆರಂಭಿಸಲಾಗುತ್ತದೆ’ ಎಂದು ತಿಳಿಸಿದರು.

‘ಸದ್ಯ ನಮ್ಮಲ್ಲಿ ನಿತ್ಯ ಎರಡು ಲಕ್ಷ ಲೀಟರ್ ಹಾಲನ್ನು ಪುಡಿಯಾಗಿ ಪರಿವರ್ತಿಸಲಾಗುತ್ತಿದೆ. ಪುಡಿಯಾಗಿ ಪರಿವರ್ತನೆಯಾಗುವ ಪ್ರತಿ ಲೀಟರ್ ಹಾಲಿನ ಮೇಲೆ ತಲಾ ₨7–8 ನಷ್ಟವಾಗುತ್ತಿದೆ. ಇದರಿಂದ ಒಕ್ಕೂಟ ಪ್ರಸ್ತುತ 18 ಕೋಟಿ ನಷ್ಟದಲ್ಲಿದೆ. ಹಾಲಿನ ಪುಡಿ ಉತ್ಪಾದನೆಯನ್ನು ಕಡಿಮೆ ಮಾಡುವ ಮೂಲಕ ನಷ್ಟವನ್ನು ಸರಿದೂಗಿಸುವ ಚಿಂತನೆ ಇದೆ. ಈ ಡೇರಿ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾರಂಭ ಮಾಡುತ್ತಿದ್ದಂತೆ ನಷ್ಟದ ಹೊರೆ ಕಡಿಮೆಯಾಗಲಿದೆ’ ಎಂದರು.

ಕೋಚಿಮುಲ್ ಕೆ.ವಿ.ನಾಗರಾಜ್ ಮಾತನಾಡಿ, ‘ಕಳೆದ ಮಾರ್ಚ್ 27 ರಂದು ಡೇರಿ ಉದ್ಘಾಟನೆ ಕಾರ್ಯಕ್ರಮ ನಿಗದಿಯಾಗಿತ್ತು. ಆದರೆ ಅಂದು ವಿಧಾನಸಭೆ ಚುನಾವಣೆ ನೀತಿ ಸಂಹಿತೆ ಜಾರಿಗೆ ತಂದ ಪರಿಣಾಮ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬರೀ ಡೇರಿ ವೀಕ್ಷಿಸಿ, ಉದ್ಘಾಟನೆ ಮಾಡದೆ ಹಾಗೇ ವಾಪಾಸಾಗಿದ್ದರು. ನನ್ನ ಬಹಳ ದಿನಗಳ ಕನಸು ಈ ದಿನ ನನಸಾಗಿದೆ’ ಎಂದು ಸಂತಸ ವ್ಯಕ್ತಪಡಿಸಿದರು.

ಇದೇ ವೇಳೆ ಶ್ರೀನಗರ, ಮುಂಬೈ, ಚೆನ್ನೈ, ವಿಜಯವಾಡ, ಹೈದರಾಬಾದ್‌ಗೆ ತಲಾ ಒಂದು ಲೋಡ್ ಗುಡ್‌ಲೈಫ್‌ ಹಾಲಿನ ಪ್ಯಾಕೆಟ್‌ ಕಳುಹಿಸಿ ಕೊಡಲಾಯಿತು. ಕೋಚಿಮುಲ್ ನಿರ್ದೇಶಕರಾದ ಅಶ್ವತ್ಥರೆಡ್ಡಿ, ಪ್ರಭಾಕರ್ ರೆಡ್ಡಿ, ಬಂಕ್ ಮುನಿಯಪ್ಪ, ಅಶ್ವತ್ಥನಾರಾಯಣಬಾಬು, ಸುಬ್ಬಾರೆಡ್ಡಿ, ಸುನಂದಮ್ಮ, ವ್ಯವಸ್ಥಾಪಕ ನಿರ್ದೇಶಕ ಸ್ವಾಮಿ, ಮೆಗಾ ಡೇರಿ ಪ್ರಧಾನ ವ್ಯವಸ್ಥಾಪಕ (ತಾಂತ್ರಿಕ) ಜಿ.ಎಂ.ಚಂದ್ರಪ್ಪ ಉಪಸ್ಥಿತರಿದ್ದರು.

 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !