ಚಿಕ್ಕಬಳ್ಳಾಪುರ | ಆಲಂಬಗಿರಿ ಗ್ರಾಮದಲ್ಲಿ ರಾಶಿ ರಾಶಿ ನಾಗರಕಲ್ಲು ಪತ್ತೆ

ಪತ್ತೆಯಾಗಿರುವ ನಾಗರ ಕಲ್ಲುಗಳನ್ನು ವೀಕ್ಷಿಸಲು ಜನರು ಗುಂಪು ಗುಂಪುಗಳಲ್ಲಿ ಆಗಮಿಸುತ್ತಿದ್ದಾರೆ.

ಗ್ರಾಮದ ಹೆಗ್ಗಡಿ ಮುನಿಯಪ್ಪ ಕುಟುಂಬದವರು ಆಲಂಬಗಿರಿ-ಮುನುಗನಹಳ್ಳಿ ರಸ್ತೆಯ ಅಚ್ಚುಕಟ್ಟು ಪ್ರದೇಶದಲ್ಲಿ ಪುರಾತನ ಕಾಲದಲ್ಲಿ ಪ್ರತಿಷ್ಠಾಪಿಸಿದ್ದ ನಾಗರಕಲ್ಲುಗಳಿಗೆ ಪ್ರತಿವರ್ಷ ನಾಗರಪಂಚಮಿ, ಗಣೇಶ ಚತುರ್ಥಿ ಸಂದರ್ಭಗಳಲ್ಲಿ ಪೂಜೆ ಸಲ್ಲಿಸುತ್ತಿದ್ದರು. ಹೆಗ್ಗಡಿ ಮುನಿಯಪ್ಪ ನಿಧನರಾದ ನಂತರ ಈ ಕಲ್ಲುಗಳಿಗೆ ಪೂಜೆ ಸಲ್ಲಿಸುವುದನ್ನು ನಿಲ್ಲಿಸಿದ್ದರು ಎನ್ನಲಾಗಿದೆ.

ಕುಟುಂಬದ ಸದಸ್ಯ ಮೋಹನ್ ಬಾಬು, ಗಿರಿ, ಅಶೋಕ್ ಮತ್ತಿತರರು ನಾಗರಕಲ್ಲುಗಳಿಗೆ ಪೂಜೆ ಸಲ್ಲಿಸಲು ಮುಂದಾಗಿದ್ದಾರೆ. ಕೆಲವು ಕಲ್ಲುಗಳು ಮಣ್ಣಿನಡಿ ಮುಚ್ಚಿಹೋಗಿದ್ದವು. ಮುಚ್ಚಿ ಹೋಗಿದ್ದ ಕಲ್ಲುಗಳನ್ನು ಮೇಲಕ್ಕೆತ್ತಲು ಹಾಗೂ ಸ್ವಚ್ಛತಾ ಕಾರ್ಯ ಕೈಗೊಳ್ಳಲು ಮುಂದಾಗಿದ್ದಾರೆ. ನಾಗರಕಲ್ಲುಗಳ ಸುತ್ತಲೂ ಮಣ್ಣು ತೆಗೆದಾಗ ಅನೇಕ ಕಲ್ಲುಗಳು ಪತ್ತೆಯಾಗಿವೆ.

ಮತ್ತಷ್ಟು ಗುಂಡಿ ತೆಗೆದಾಗ ಮತ್ತಷ್ಟು ಕಲ್ಲುಗಳು ಪತ್ತೆಯಾಗಿವೆ. ಸೋಮವಾರ ಹಾಗೂ ಮಂಗಳವಾರ ಬೆಳಗ್ಗೆ ಮತ್ತೆ ಗುಂಡಿ ತೆಗೆಯಲಾಯಿತು. ಆಗ ವಿವಿಧ ಆಕೃತಿಯ ನಾಗರ ಕಲ್ಲುಗಳು, ದೇವತೆಗಳಿರುವ ನೂರಕ್ಕೂ ಹೆಚ್ಚು ನಾಗರಕಲ್ಲು ಪತ್ತೆಯಾಗಿದೆ.