ಹೊಳಲ್ಕೆರೆ: ಈ ವರ್ಷ ತಾಲ್ಲೂಕಿನಲ್ಲಿ 17 ಚೆಕ್ ಡ್ಯಾಂ ನಿರ್ಮಿಸಿದ್ದು, ₹ 7 ಕೋಟಿ ವೆಚ್ಚ ಮಾಡಲಾಗಿದೆ ಎಂದು ಶಾಸಕ ಎಂ.ಚಂದ್ರಪ್ಪ ಹೇಳಿದರು.
ತಾಲ್ಲೂಕಿನ ಬಿ.ದುರ್ಗದ ಸಮೀಪ ಬೆಳ್ಳಿಸರ ಹಳ್ಳಕ್ಕೆ ನಿರ್ಮಿಸಿರುವ ಬ್ಯಾರೇಜ್ ಮಂಗಳವಾರ ರಾತ್ರಿ ಸುರಿದ ಮಳೆಗೆ ತುಂಬಿ ಹರಿದಿದ್ದು, ಬುಧವಾರ ಬಾಗಿನ ಅರ್ಪಿಸಿ ಮಾತನಾಡಿದರು.
ಅಂತರ್ಜಲ ಹೆಚ್ಚಿಸಲು ಹಳ್ಳಗಳಿಗೆ ಚೆಕ್ ಡ್ಯಾಂ ಹಾಗೂ ಬ್ಯಾರೇಜ್‌ಗಳನ್ನು ನಿರ್ಮಿಸಲಾಗಿದೆ. ಕೆಲವು ಕಡೆ ಹೊಸ ಕೆರೆ ನಿರ್ಮಿಸಲಾಗಿದೆ. ಈ ವರ್ಷದ ಮಳೆಗೆ ಬಹುತೇಕ ಎಲ್ಲ ಚೆಕ್ ಡ್ಯಾಂಗಳು ತುಂಬಿವೆ. ದೊಡ್ಡ ಹಳ್ಳಗಳಿಗೆ ಇನ್ನೂ ಹಲವು ಚೆಕ್ ಡ್ಯಾಂ ನಿರ್ಮಿಸುವ ಉದ್ದೇಶ ಇದ್ದು, ಹರಿಯುವ ನೀರನ್ನು ನಿಲ್ಲಿಸಲಾಗುವುದು ಎಂದು ಹೇಳಿದರು.
‘ಬಿ.ದುರ್ಗ ಹೋಬಳಿಯಲ್ಲಿ ವಿವಿಧ ಅಭಿವೃದ್ಧಿ ಕಾಮಗಾರಿಗಳು ನಡೆಯುತ್ತಿವೆ. ಅಂದನೂರು ಗೊಲ್ಲರಹಟ್ಟಿಯಿಂದ ಇಂಗಳದಹಳ್ಳಿ, ಬಂಡೆಬೊಮ್ಮೇನಹಳ್ಳಿ, ವಡ್ಡರಹಟ್ಟಿ ಮೂಲಕ ಗಂಜಿಗಟ್ಟೆಗೆ ₹ 4.08 ಕೋಟಿ ವೆಚ್ಚದಲ್ಲಿ 6.25 ಕಿ.ಮೀ. ರಸ್ತೆ ನಿರ್ಮಿಸಲಾಗುತ್ತಿದೆ’ ಎಂದರು.
