ಸಾಹಿತ್ಯ ರಚಿಸುವ ಆಸಕ್ತಿ ಕುಗ್ಗಿದೆ

ಮಂಗಳವಾರ, ಜೂನ್ 25, 2019
23 °C
ವಿಮರ್ಶಕ ಅಗ್ರಹಾರ ಕೃಷ್ಣಮೂರ್ತಿ ಕಳವಳ

ಸಾಹಿತ್ಯ ರಚಿಸುವ ಆಸಕ್ತಿ ಕುಗ್ಗಿದೆ

Published:
Updated:
Prajavani

ಚಿತ್ರದುರ್ಗ: ರಾಜಕೀಯ, ಸಾಹಿತ್ಯ ಹಾಗೂ ಸಾಂಸ್ಕೃತಿಕ ಕ್ಷೇತ್ರದಲ್ಲಿ ನಡೆಯುತ್ತಿರುವ ಅನಾಹುತಗಳು ಸಾಹಿತ್ಯ ರಚಿಸುವ ಆಸಕ್ತಿಯನ್ನು ಕುಗ್ಗಿಸುತ್ತಿವೆ ಎಂದು ವಿಮರ್ಶಕ ಅಗ್ರಹಾರ ಕೃಷ್ಣಮೂರ್ತಿ ಕಳವಳ ವ್ಯಕ್ತಪಡಿಸಿದರು.

ಇಲ್ಲಿನ ಮುರುಘಾ ಮಠದಲ್ಲಿ ಬುಧವಾರ ಏರ್ಪಡಿಸಿದ್ದ ಶರಣ ಸಂಗಮ ಹಾಗೂ ಸಾಹಿತಿ ಕುಂ.ವೀರಭದ್ರಪ್ಪ ಅವರ ‘ಜೈ ಬಜರಂಗಬಲಿ’ ಕಾದಂಬರಿ ಬಿಡುಗಡೆ ಸಮಾರಂಭದಲ್ಲಿ ಅವರು ಮಾತನಾಡಿದರು.

‘ದೇಶದಲ್ಲಿ ನಡೆಯುತ್ತಿರುವ ಘಟನಾವಳಿಗಳು ಮಾಧ್ಯಮದ ಮೂಲಕ ನಿತ್ಯ ತಲುಪುತ್ತಿವೆ. ಕ್ರೌರ್ಯ, ಹಿಂಸೆ ವಿಜೃಂಭಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಲೇಖಕನಿಗೆ ಬಹುದೊಡ್ಡ ಹೊಣೆಗಾರಿಕೆ ಇರುತ್ತದೆ. ಆದರೆ, ಸಾಹಿತ್ಯ ರಚನೆ ಮಾಡದಂತಹ ಸ್ಥಿತಿಯಲ್ಲಿ ಬದುಕುತ್ತಿದ್ದೇವೆ’ ಎಂದು ಆತಂಕ ಹೊರಹಾಕಿದರು.

‘ದೇಶ ಹಾಗೂ ಕಾಲದ ಸ್ಥಿತಿಯನ್ನು ತಿಳಿಸಲು ಕುಂ.ವೀರಭದ್ರಪ್ಪ ಕಾದಂಬರಿ ರಚಿಸಿದ್ದಾರೆ. ಧರ್ಮದ ಕಪಿಮುಷ್ಟಿಯಲ್ಲಿ ಸಿಲುಕಿದ ರಾಜಕಾರಣವೇ ಕಾದಂಬರಿಯ ಕಥಾವಸ್ತು. ರೂಪಕಗಳನ್ನು ಬಳಸಿಕೊಂಡು ಪ್ರಸಕ್ತ ವಿದ್ಯಮಾನವನ್ನು ಅರ್ಥಪೂರ್ಣವಾಗಿ ಕಟ್ಟಿಕೊಟ್ಟಿದ್ದಾರೆ’ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

‘ಅಯೋಧ್ಯೆ, ಅಧಿಕಾರ ವಿಭಜಿತ ರಾಜಕಾರಣ, ಆರ್‌ಎಸ್‌ಎಸ್‌ ಸೇರಿ ಎಲ್ಲವೂ ಕಾದಂಬರಿಯಲ್ಲಿದೆ. ಮಾಧ್ಯಮದ ವರ್ತನೆ, ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಮಟ್ಟದಲ್ಲಿ ನಡೆಯುತ್ತಿರುವ ರಾಜಕೀಯ ಕುಚೋದ್ಯ, ವೋಟ್‌ ಬ್ಯಾಂಕ್‌ ರಾಜಕಾರಣವನ್ನು ರಸವತ್ತಾಗಿ ಕಟ್ಟಿಕೊಡಲಾಗಿದೆ. ಮನುಷ್ಯ ಲೋಕದ ವ್ಯವಹಾರವನ್ನು ಭಿನ್ನವಾಗಿ ಪ್ರಕಟಿಸುವ ಕಥನ ಕ್ರಮ ಇಷ್ಟವಾಗುತ್ತದೆ’ ಎಂದು ಹೇಳಿದರು.

‘ಧರ್ಮ ಕೇಂದ್ರಿತ ರಾಜಕಾರಣ ನಾಗರಿಕತೆಯನ್ನು ಅಧಃಪತನಕ್ಕೆ ಇಳಿಸುತ್ತಿದೆ. ಇದನ್ನು ವಿಡಂಬನೆಯ ಮೂಲಕ ಲೇಖಕರು ಚಿತ್ರಿಸಿದ್ದಾರೆ. ಸಾಮಾಜಿಕ, ಧಾರ್ಮಿಕ ಹಾಗೂ ರಾಜಕೀಯ ಸ್ತರಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡು ಕಾದಂಬರಿ ರಚಿಸಿದ್ದಾರೆ. ಇಂತಹ ಮತ್ತೊಬ್ಬ ಕಾದಂಬರಿಕಾರ ಸಿಗುವುದು ಅಪರೂಪ’ ಎಂದು ಹೊಗಳಿದರು.

‘ಕುವೆಂಪು, ಶಿವರಾಮ ಕಾರಂತ, ಎಸ್‌.ಎಲ್‌.ಭೈರಪ್ಪ ಸೇರಿ ಹಲವು ಕಾದಂಬರಿಕಾರರು ಕನ್ನಡದಲ್ಲಿ ಇದ್ದಾರೆ. ಕಾರಂತರ ಶೈಲಿಯಲ್ಲಿ ಕಾದಂಬರಿ ರಚಿಸಲು ಸಾಧ್ಯವಿದೆ. ಆದರೆ, ಕುವೆಂಪು ಮಾದರಿಯಲ್ಲಿ ಬರೆಯಲು ಯಾರಿಂದಲೂ ಸಾಧ್ಯವಿಲ್ಲ. ದೇವನೂರ ಮಹಾದೇವ ಅವರಂತೆ ಸಾಹಿತ್ಯ ರಚಿಸುವ ಶಕ್ತಿ ಮತ್ತೊಬ್ಬರಲ್ಲಿ ಇಲ್ಲ. ಇವರ ಸಾಲಿಗೆ ಕುಂ.ವೀರಭದ್ರಪ್ಪ ಕೂಡ ಸೇರುತ್ತಾರೆ’ ಎಂದರು.

ಕೃತಿಕಾರ ಕುಂ.ವೀರಭದ್ರಪ್ಪ ಮಾತನಾಡಿ, ‘ಕಾದಂಬರಿ ಪ್ರಕಾರ ನನಗೆ ದಕ್ಕುವುದಿಲ್ಲವೆಂದು ಅನೇಕರು ಜರಿದಿದ್ದರು. ಇದನ್ನು ಸವಾಲಾಗಿ ಸ್ವೀಕರಿಸಿ ಕಾದಂಬರಿ ರಚನೆಯಲ್ಲಿ ತೊಡಗಿದೆ. ರಸ್ತೆ, ನೀರು, ವಿದ್ಯುತ್‌ ಇಲ್ಲದ ಕುಗ್ರಾಮವೊಂದ ದೀಪದ ಕೆಳಗೆ ಕುಳಿತು ‘ಕಪ್ಪು’ ಕಾದಂಬರಿಯನ್ನು 8 ದಿನಗಳಲ್ಲಿ ಬರೆದಿದ್ದೇನೆ’ ಎಂದು ಅನುಭವ ಹಂಚಿಕೊಂಡರು.

‘1997ರಲ್ಲಿ ನನ್ನ ಇಬ್ಬರು ಮಕ್ಕಳ ಶಾಲಾ ಪ್ರವೇಶಕ್ಕೆ ಹಣ ಇಲ್ಲದೇ ಪರದಾಡುತ್ತಿದ್ದೆ. ಪ್ರಕಾಶಕರೊಬ್ಬರ ಬಳಿ ಹೋಗಿ ಕಾದಂಬರಿ ಬರೆದುಕೊಡುವ ಒಪ್ಪಂದ ಮಾಡಿಕೊಂಡು ₹ 10 ಸಾವಿರ ಮುಂಗಡ ಹಣ ಪಡೆದೆ. ಪಟ್ಟು ಬಿಡದೇ ಕುಳಿತು 600 ಪುಟಗಳ ‘ಶಾಮಣ್ಣ’ ಕಾದಂಬರಿ ಬರೆದೆ. ಮೂರು ತಿಂಗಳ ಕಾಲ ನಿರಂತರ ಬರವಣಿಗೆ ಮಾಡಿದ್ದರಿಂದ ದೇಹದ ತೂಕ 12 ಕೆ.ಜಿ. ಕಡಿಮೆಯಾಗಿತ್ತು. ಅರಮನೆ ಕಾದಂಬರಿ ರಚಿಸಲು 15 ವರ್ಷ ತೆಗೆಕೊಂಡಿದ್ದೆ’ ಎಂದರು.

ಶಿವಮೂರ್ತಿ ಮುರುಘಾ ಶರಣರು, ಆಕಾಶವಾಣಿ ಕಾರ್ಯಕ್ರಮ ನಿರ್ವಾಹಕ ಡಾ.ಎಂ.ಜಿ.ವೇದಮೂರ್ತಿ, ಬಾಪೂಜಿ ಶಿಕ್ಷಣ ಸಂಸ್ಥೆಯ ಕಾರ್ಯದರ್ಶಿ ಕೆ.ಎಂ.ವೀರೇಶ್‌ ಇದ್ದರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 1

    Sad
  • 0

    Frustrated
  • 0

    Angry

Comments:

0 comments

Write the first review for this !