ಬೆಲೆ ಏರಿಕೆಯೇ ಬಿಜೆಪಿ ಸಾಧನೆ: ರಣದೀಪ್ ಸುರ್ಜೇವಾಲ ಆರೋಪ

ನಗರದ ಕಾಂಗ್ರೆಸ್ ಕಚೇರಿಯಲ್ಲಿ ಶನಿವಾರ ಭಾರತ್ ಜೋಡೊಯಾತ್ರೆ ಅಂಗವಾಗಿ ಹಮ್ಮಿಕೊಂಡಿದ್ದ ಕಾರ್ಯಕರ್ತರು, ಮುಖಂಡರ ಸಭೆಯಲ್ಲಿ ಅವರು ಮಾತನಾಡಿದರು.

‘ನಮ್ಮ ಯಾತ್ರೆ ಚುನಾವಣೆ ಗಿಮಿಕ್ ಅಲ್ಲ. ಗಿಮಿಕ್ ಮಾಡುವುದು, ಕೋಮು ಭಾವನೆ ಕೆರಳಿಸುವುದು ಬಿಜೆಪಿಯವರಿಗೆ ಅಂಟಿರುವ ಜಾಢ್ಯ. ಕೇವಲ 9 ಜನರನ್ನು ಮತ್ತಷ್ಟು ಹಣವಂತರನ್ನಾಗಿಸಲು ಮೋದಿ ಸರ್ಕಾರ ಇರಬೇಕೆ? ಬಡವರು ಬೆಲೆ ಏರಿಕೆ ತುಳಿತಕ್ಕೆ ಸಿಕ್ಕಿ ನಲುಗುತ್ತಿದ್ದರೆ, ಅಂಬಾನಿ, ಆದಾನಿಯಂತಹವರು ಸುಖದ ಸುಪ್ಪತ್ತಿಗೆ ಮೇಲೆ ತೇಲುತ್ತಿದ್ದಾರೆ. ಸಾರ್ವಜನಿಕ ಉದ್ಯಮಗಳನ್ನು ಒಂದೊಂದಾಗಿ ಮುಚ್ಚುವ ಮೂಲಕ ದೇಶವನ್ನು ಖಾಸಗೀಕರಣದ ಸುಳಿಗೆ ಸಿಲುಕಿಸುವ ಹುನ್ನಾರ ನಡೆದಿದೆ’ ಎಂದು ದೂರಿದರು.

‘ವೈದ್ಯಕೀಯ ಪದವಿ ಬಡವರಿಗೆ ಗಗನ ಕುಸುಮವಾಗಿದೆ. ಬಸವರಾಜ ಬೊಮ್ಮಾಯಿ ಗೃಹಸಚಿವರಾಗಿದ್ದಾಗ ಎಸ್‌ಐ ನೇಮಕಾತಿ ಹಗರಣ ನಡೆದಿತ್ತು. ಮುಖ್ಯಮಂತ್ರಿ ವಿರುದ್ಧ ಪ್ರಧಾನಿ ತನಿಖೆ ನಡೆಸಲು ಸಿದ್ಧರಿದ್ದಾರೆಯೇ’ ಎಂದು ಪ್ರಶ್ನಿಸಿದರು.

ಮುಖಂಡರಾದ ಸಲೀಂ ಅಹಮ್ಮದ್, ಧ್ರುವ ನಾರಾಯಣ, ಡಿ. ಸುಧಾಕರ್, ಎಚ್. ಆಂಜನೇಯ, ಟಿ. ರಘುಮೂರ್ತಿ ಬಿ.ಜಿ. ಗೋವಿಂದಪ್ಪ, ಎಚ್.ಎಂ. ರೇವಣ್ಣ, ಬಿ.ಎನ್. ಚಂದ್ರಪ್ಪ, ಎಂ.ಕೆ. ತಾಜ್ ಪೀರ್, ಜಿ.ಎಸ್. ಮಂಜುನಾಥ್, ನೇರ್ಲಗುಂಟೆ ತಿಪ್ಪೇಸ್ವಾಮಿ, ಹನುಮಲಿ ಷಣ್ಮುಖಪ್ಪ, ಜೆ.ಜೆ. ಹಟ್ಟಿ ತಿಪ್ಪೇಸ್ವಾಮಿ, ಯೋಗೇಶ್ ಬಾಬು, ಅಬ್ದುಲ್ ಜಬ್ಬರ್ ಸಾಬ್, ಜಯಮ್ಮ ಬಾಲರಾಜ್, ಹಾಲೇಶ್ ಕುಮಾರ್, ಗೀತಾನಂದಿನಿ ಗೌಡ, ಬಸವರಾಜ್, ಖಾದಿರಮೇಶ್, ಈರಲಿಂಗೇಗೌಡ ಇದ್ದರು.