ಚಳ್ಳಕೆರೆ: ಆಮ್ಲಜನಕಕ್ಕಾಗಿ ದೊಂಬಿ

ಆಸ್ಪತ್ರೆ ಆವರಣದಲ್ಲಿ ಆಮ್ಲಜನಕಕ್ಕಾಗಿ ಮಂಗಳವಾರ ದೊಂಬಿ ನಡೆಸುತ್ತಿದ್ದ ಕೆಲವರನ್ನು ಪೋಲಿಸ್ ನಿರೀಕ್ಷರು ನಿಯಂತ್ರಿಸಿದ ಘಟನೆ ಜರುಗಿತು.

ಸ್ಯಾಚುರೇಷನ್ ಲೆವೆಲ್‌ 95-96 ಇರುವವರೂ ಆಮ್ಲಜನಕ ನೀಡುವಂತೆ ಬೇಡಿಕೆ ಇಡುತ್ತಾರೆ. ಇದರಿಂದ ತೀರಾ ಅವಶ್ಯಕತೆ ಇರುವವರಿಗೆ ಈಗ ಆಸ್ಪತ್ರೆಯಲ್ಲಿ ಆಕ್ಸಿಜನ್ ತುಂಬಿದ ಸಿಲಿಂಡರ್ ಇಲ್ಲವಾಗಿದೆ ಎಂದು ಮೂಲಗಳು ತಿಳಿಸಿವೆ.

ಸ್ಯಾಚುರೇಷನ್ ಲೆವೆಲ್‌ ಕನಿಷ್ಠ 60, 70, 80 ಇರುವ ರೋಗಿಗಳಿಗೆ ಆಮ್ಲಜನಕ ನೀಡುವ ಅವಶ್ಯಕತೆ ಇದೆ. ನಿತ್ರಾಣಗೊಂಡ ಸಂದರ್ಭದಲ್ಲಿ ರೋಗಿ ಸ್ವಲ್ಪ ಚೇತರಿಸಿಕೊಳ್ಳಲು ಕನಿಷ್ಠ ಒಂದು ಗಂಟೆ ಆಮ್ಲಜನಕ ನೀಡಿದರೆ ಸಾಕಾಗುತ್ತದೆ. ನಂತರ ಬಿಸಿ ನೀರು, ಪೌಷ್ಠಿಕ ಆಹಾರ ಸೇವನೆ ಮೂಲಕ ಉಸಿರಾಟದ ತೊಂದರೆಯನ್ನು ನೀಗಿಸಿಕೊಳ್ಳಬಹುದು ಎನ್ನುತ್ತಾರೆ ಆರೋಗ್ಯ ಇಲಾಖೆ ಸಿಬ್ಬಂದಿ.

‘ಕೆಲವರು ಅವಶ್ಯಕತೆ ಇಲ್ಲದಿದ್ದರೂ ಆಮ್ಲಜನಕ ನೀಡುವಂತೆ ಜನ ಪ್ರತಿನಿಧಿಗಳಿಂದ ಒತ್ತಡ ಹಾಕಿಸುತ್ತಾರೆ. ವಿಳಂಬ ಮಾಡಿದರೆ ಜಗಳಕ್ಕೆ ಬರುತ್ತಾರೆ’ ಎಂದು ಆರೋಗ್ಯ ಸಹಾಯಕಿಯೊಬ್ಬರು ಅಳಲು ತೋಡಿಕೊಂಡಿದ್ದಾರೆ.

‘ಮೇಲ್ವಿಚಾರಕರ ಸಲಹೆ ಮೇರೆಗೆ ಸೋಂಕಿತರಿಗೆ ಆಮ್ಲಜನಕ ನೀಡುತ್ತೇವೆ. ಆಮ್ಲಜನಕ ತುಂಬಿದ ಎರಡು ಸಿಲಿಂಡರ್‌ಗಳನ್ನು ತುರ್ತು ಪ್ರಕರಣಗಳಿಗೆ ಆಸ್ಪತ್ರೆಯಲ್ಲಿ ಕಾಯ್ದಿರಿಸಲಾಗಿದೆ. ಇನ್ನೂ 9 ಸಿಲಿಂಡರ್ ಚಿತ್ರದುರ್ಗದಿಂದ ಬರಲಿದೆ. ಅಗತ್ಯ ಬಿದ್ದಾಗ ಹರಿಹರ, ದಾವಣಗೆರೆಯಿಂದಲೂ ಆಮ್ಲಜನಕ ತುಂಬಿದ ಸಿಲಿಂಡರ್ ತರಿಸಲಾಗುವುದು. ಸೋಂಕಿತರು ಭಯಪಡುವ ಅಗತ್ಯವಿಲ್ಲ’ ಎಂದು ತಾಲ್ಲೂಕು ಆಡಳಿತ ವೈದ್ಯಾಧಿಕಾರಿ ಡಾ.ವೆಂಕಟೇಶ್ ತಿಳಿಸಿದ್ದಾರೆ.