ಹೈಟೆಕ್‌ ಗ್ರಾಮಕ್ಕೆ ‘ಗಾಂಧಿ’ ಗರಿ

7
ಪಂಚಾಯಿತಿ ವ್ಯಾಪ್ತಿಯ ಮೂರು ಸ್ಥಳಗಳಲ್ಲಿ ವೈ–ಫೈ ಸೌಲಭ್ಯ

ಹೈಟೆಕ್‌ ಗ್ರಾಮಕ್ಕೆ ‘ಗಾಂಧಿ’ ಗರಿ

Published:
Updated:
Deccan Herald

ಚಿತ್ರದುರ್ಗ: ಪಂಚಾಯಿತಿ ವ್ಯಾಪ್ತಿಯ ಗ್ರಾಮಸ್ಥರಿಗೆ ವೈ–ಫೈ ಸೌಲಭ್ಯ ಕಲ್ಪಿಸಿ ‘ಇ–ಆಡಳಿತ’ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿರುವ ಮಠದ ಕುರುಬರಹಟ್ಟಿ (ಎಂ.ಕೆ) ಗ್ರಾಮ ಪಂಚಾಯಿತಿ ‘ಗಾಂಧಿ ಗ್ರಾಮ ಪುರಸ್ಕಾರ’ಕ್ಕೆ ಭಾಜನವಾಗಿದೆ.

ಚಿತ್ರದುರ್ಗ ನಗರಕ್ಕೆ ಹೊಂದಿಕೊಂಡಿರುವ ಗ್ರಾಮ ಪಂಚಾಯಿತಿಗೆ ಸಿಕ್ಕ ಈ ಪುರಸ್ಕಾರ ಅಭಿವೃದ್ಧಿಗೆ ಇನ್ನಷ್ಟು ಪ್ರೇರಣೆ ನೀಡಿದೆ. ನಗರ ವ್ಯಾಪ್ತಿಯ ಮೂರು ಬಡಾವಣೆ ಹಾಗೂ ನಾಲ್ಕು ಗ್ರಾಮಗಳನ್ನು ಒಳಗೊಂಡ ಈ ಪಂಚಾಯಿತಿ ವ್ಯಾಪ್ತಿಯಲ್ಲಿ 3,500 ಕುಟುಂಬಗಳಿದ್ದು, 10 ಸಾವಿರಕ್ಕೂ ಹೆಚ್ಚು ಜನ ವಾಸವಾಗಿದ್ದಾರೆ.

‘ಇ–ಆಡಳಿತ’ದ ಅಂಗವಾಗಿ ಗ್ರಾಮ ಪಂಚಾಯಿತಿ 2017ರಲ್ಲಿ ‘ವೈ–ಫೈ’ ಸೌಲಭ್ಯ ಅಳವಡಿಸಿಕೊಂಡಿದೆ. ಪಂಚಾಯಿತಿ ಕಚೇರಿ, ಅಂಗನವಾಡಿ ಹಾಗೂ ಸರ್ಕಾರಿ ಶಾಲೆಯ ಬಳಿ ಈ ಸೌಲಭ್ಯವನ್ನು ಕಲ್ಪಿಸಲಾಗಿದೆ. 100 ಮೀಟರ್‌ ವ್ಯಾಪ್ತಿಯಲ್ಲಿ ಅಂತರ್ಜಾಲ ಸಂಪರ್ಕ ಪಡೆಯಲು ಸಾಧ್ಯವಿದೆ. ವ್ಯಕ್ತಿಯೊಬ್ಬರು ದಿನಕ್ಕೆ 200 ಕೆಬಿ ವರೆಗೆ ಅಂತರ್ಜಾಲ ಸೇವೆ ಬಳಸಲು ಅವಕಾಶ ನೀಡಲಾಗಿದೆ. ‘ಪಂಚಮಿತ್ರ’ ಸೇವೆಯನ್ನು ಗ್ರಾಮಸ್ಥರು ಸುಲಭವಾಗಿ ಪಡೆಯಲು ಇದು ನೆರವಾಗಿದೆ.

ಕಂದಾಯ ಸಂಗ್ರಹದಲ್ಲಿ ಮುಂದೆ:

ಕಂದಾಯ ಸಂಗ್ರಹದಲ್ಲಿ ಈ ಪಂಚಾಯಿತಿ ಮುಂದೆ ಇದ್ದು, 2017–18ನೇ ಆರ್ಥಿಕ ವರ್ಷದಲ್ಲಿ ₹ 19 ಲಕ್ಷ ಆದಾಯ ಗಳಿಸಿದೆ. 2017ರಲ್ಲಿ ಸರ್ಕಾರ ಕಂದಾಯ ಹೆಚ್ಚಳ ಮಾಡಿ ಹೊರಡಿಸಿದ ಪರಿಷ್ಕೃತ ಆದೇಶವನ್ನು ಸಂಪೂರ್ಣವಾಗಿ ಅನುಷ್ಠಾನಗೊಳಿಸಿದ ಶ್ರೇಯಕ್ಕೂ ಪಂಚಾಯತಿ ಪಾತ್ರವಾಗಿದೆ.

ಪರಿಷ್ಕೃತ ಆದೇಶದ ಪ್ರಕಾರ ಮನೆ, ಕೈಗಾರಿಕೆ, ವಾಣಿಜ್ಯ ಮಳಿಗೆ ಹಾಗೂ ಬಡಾವಣೆಗಳ ಕಂದಾಯದಲ್ಲಿ ಹೆಚ್ಚಳವಾಗಿದೆ. 2016–17ರಲ್ಲಿ ಈ ಪಂಚಾಯಿತಿ ₹ 10 ಲಕ್ಷ ಆದಾಯ ಗಳಿಸಿತ್ತು. ಮರುವರ್ಷವೇ ₹ 9 ಲಕ್ಷ ಹೆಚ್ಚುವರಿ ಕಂದಾಯವನ್ನು ಸರ್ಕಾರದ ಬೊಕ್ಕಸಕ್ಕೆ ಒಪ್ಪಿಸಿದೆ.

ನಿರ್ಮಲ–ವಿಕಾಸ ಗ್ರಾಮ:

ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಎಲ್ಲ ಕುಟುಂಬಗಳು ಶೌಚಾಲಯ ಹೊಂದಿವೆ. ಬಯಲು ಬಹಿರ್ದೆಸೆ ಮುಕ್ತ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಗ್ರಾಮ ಪಂಚಾಯಿತಿಗೆ 2010ರಲ್ಲಿ ‘ನಿರ್ಮಲ ಗ್ರಾಮ’ ಪುರಸ್ಕಾರವೂ ಲಭಿಸಿದೆ.

ಕೇಂದ್ರ ಸರ್ಕಾರದ ‘ವಿಕಾಸ ಗ್ರಾಮ’ಕ್ಕೆ ಪಂಚಾಯಿತಿ ವ್ಯಾಪ್ತಿಯ ಎಂ.ಕೆ.ಹಟ್ಟಿ ಹಾಗೂ ಗುತ್ತಿನಾಡು ಗ್ರಾಮಗಳು ಆಯ್ಕೆಯಾಗಿವೆ. ಈ ಯೋಜನೆಯಡಿ ಪ್ರತಿ ಗ್ರಾಮಕ್ಕೆ ₹ 1 ಕೋಟಿ ಅನುದಾನ ಹರಿದು ಬರಲಿದೆ. ಈಗಾಗಲೇ ₹ 40 ಲಕ್ಷ ಬಿಡುಗಡೆಯಾಗಿದ್ದು, ಕಾಮಗಾರಿ ಇನ್ನಷ್ಟೇ ಆರಂಭವಾಗಬೇಕಿದೆ.

ಶುದ್ಧ ಕುಡಿಯುವ ನೀರು:

ಪಂಚಾಯಿತಿ ವ್ಯಾಪ್ತಿಯಲ್ಲಿ ಎಂ.ಕೆ.ಹಟ್ಟಿ ಸೇರಿ ನಾಲ್ಕು ಗ್ರಾಮಗಳಿವೆ. ಗುತ್ತಿನಾಡು, ಸೀಬಾರ, ಮಲ್ಲನಕಟ್ಟೆಯಲ್ಲಿ ಶುದ್ಧ ಕುಡಿಯುವ ನೀರು ಘಟಕ ಸ್ಥಾಪಿಸಲಾಗಿದೆ. ಸೀಬಾರದ ಶುದ್ಧ ನೀರು ಘಟಕ ಉದ್ಘಾಟನೆ ಆಗಬೇಕಿದೆ. ಎರಡು ಖಾಸಗಿ ಶುದ್ಧ ಕುಡಿಯುವ ನೀರಿನ ಘಟಕಗಳಿಗೆ ಅನುಮತಿ ನೀಡಲಾಗಿದೆ.

ಉದ್ಯೋಗ ಖಾತ್ರಿ ಯೋಜನೆಯ ಅನುದಾನದಡಿ ಪರಿಣಾಮಕಾರಿ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ. ಪಂಚಾಯಿತಿ ದಾಖಲಾತಿಗಳ ನಿರ್ವಹಣೆಗೆ ಆದ್ಯತೆ ನೀಡಲಾಗಿದೆ. ಪರಿಶಿಷ್ಟ ಜಾತಿ, ಪಂಗಡದ ಅಭಿವೃದ್ಧಿಗೆ ಮೀಸಲಾಗಿರುವ ಅನುದಾನ ಬಳಕೆಯಲ್ಲಿಯೂ ಮುಂದಿದೆ. ಗ್ರಾಮಗಳ ಬಹುತೇಕ ರಸ್ತೆಗಳು ಕಾಂಕ್ರೀಟಿಕರಣಗೊಂಡಿವೆ. ಒತ್ತುವರಿ ತೆರವುಗೊಳಿಸಿ ಪಂಚಾಯಿತಿ ಆಸ್ತಿಯನ್ನು ಸಂರಕ್ಷಣೆ ಮಾಡಲಾಗಿದೆ.

ತಾಜ್ಯ ವಿಲೇವಾರಿಯಲ್ಲಿ ಹಿಂದೆ

ಗಾಂಧಿ ಗ್ರಾಮ ಪುರಸ್ಕಾರಕ್ಕೆ ಭಾಜವಾದರೂ ತ್ಯಾಜ್ಯ ವಿಲೇವಾರಿಯಲ್ಲಿ ಪಂಚಾಯಿತಿ ಹಿಂದಿದೆ. ರಾಷ್ಟ್ರೀಯ ಹೆದ್ದಾರಿ–4ರ ಸರ್ವಿಸ್‌ ರಸ್ತೆಗಳಲ್ಲಿ ಸಂಚರಿಸಿದರೆ ಇದು ಅರಿವಿಗೆ ಬರಲಿದೆ.

ಸರ್ವಿಸ್‌ ರಸ್ತೆಯ ಎರಡೂ ಬದಿಗಳಲ್ಲಿ ಕಸದ ರಾಶಿ ಬಿದ್ದಿರುತ್ತದೆ. ವಾರ ಕಳೆದರೂ ಈ ಕಸ ವಿಲೇವಾರಿ ಆಗುವುದಿಲ್ಲ. ರಸ್ತೆಯಲ್ಲಿ ಸಂಚರಿಸುವ ವಾಹನ ಸವಾರರು ದುರ್ವಾಸನೆಯ ಕಿರಿಕಿರಿ ಅನುಭವಿಸುತ್ತಿದ್ದಾರೆ. ಸುತ್ತಲಿನ ನಿವಾಸಿಗಳಲ್ಲಿ ಸಾಂಕ್ರಾಮಿಕ ರೋಗ ಹರಡುವ ಭೀತಿ ಎದುರಿಸುತ್ತಿದ್ದಾರೆ.

‘ವಾಣಿಜ್ಯ ಮಳಿಗೆಗಳ ಮಾಲೀಕರು ರಸ್ತೆ ಬದಿಯಲ್ಲಿ ಕಸ ಸುರಿಯುತ್ತಿರುವುದು ಗಮನಕ್ಕೆ ಬಂದಿದೆ. ಇದಕ್ಕೆ ಕಡಿವಾಣ ಹಾಕಲು ನಗರಸಭೆಯ ನೆರವು ಕೋರಿದ್ದೇವೆ. ಕಸ ವಿಲೇವಾರಿಗೂ ಸಹಕಾರ ನೀಡುವಂತೆ ಮನವಿ ಮಾಡಿಕೊಂಡಿದ್ದೇವೆ’ ಎನ್ನುತ್ತಾರೆ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ (ಪಿಡಿಒ) ಆರ್‌.ಪಾತಣ್ಣ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !