ಚಳ್ಳಕೆರೆ | ಅಕ್ಕಡಿ ಬೆಳೆಗಳಿಗೆ ಕರಿಜೋನಿ ಕೀಟಬಾಧೆ; ರೈತರಲ್ಲಿ ಆತಂಕ

ಮುಂಗಾರು ಮಳೆಯ ಕಣ್ಣಾಮುಚ್ಚಾಲೆಯ ಕಾರಣ ಪ್ರತಿ ವರ್ಷ ಒಂದಲ್ಲಾ ಒಂದು ರೀತಿಯ ಸಂಕಷ್ಟಕ್ಕೆ ಸಿಲುಕುತ್ತಲೇ ಬಂದಿದ್ದೇವೆ. ಈಗ ಕೀಟಬಾಧೆಯಿಂದ ಇಳುವರಿ ಕುಂಠಿತವಾಗುವ ಆತಂಕ ಇದ್ದು, ಸೂಕ್ತ ಪರಿಹಾರ ನೀಡಬೇಕು ಎಂದು ಉಪ್ಪಾರಹಟ್ಟಿ ಗ್ರಾಮದ ರೈತ ಚಿಕ್ಕಣ್ಣ ಮನವಿ ಮಾಡಿದ್ದಾರೆ.

ಸಜ್ಜೆ 66, ತೊಗರಿ 6,105, ಹುರುಳಿ 252, ಸಜ್ಜೆ 66, ಅಲಸಂದಿ 12, ಹರಳು (ಔಡಲ) 10, ಎಸರು 6, ಮಡಿಕೆಸರು 3 ಸೇರಿ ತಾಲ್ಲೂಕಿನಲ್ಲಿ ಒಟ್ಟು 6,454 ಹೆಕ್ಟೆರ್ ಪ್ರದೇಶದಲ್ಲಿ ಅಕ್ಕಡಿ ಬೆಳೆ ಬೆಳೆಯಲಾಗಿದೆ ಎಂದು ಕೃಷಿ ಇಲಾಖೆ ತಾಂತ್ರಿಕ ಅಧಿಕಾರಿ ರವಿಕುಮಾರ್ ತಿಳಿಸಿದರು.

ಕರಿಜೋನಿ ಕೀಟಬಾಧೆ ಇನ್ನೂ ಪ್ರಾರಂಭಿಕ ಹಂತದಲ್ಲಿದ್ದು, 15-20 ದಿನಗಳಲ್ಲಿ ಹೆಚ್ಚು ಮಳೆ ಬಿದ್ದರೆ ಕೀಟಬಾಧೆ ನಿವಾರಣೆಯಾಗುತ್ತದೆ.
ಮಳೆ ಬೀಳದಿದ್ದಲ್ಲಿ ರೋಗ ಮತ್ತಷ್ಟು ವ್ಯಾಪಿಸಿ ಶೇಂಗಾ ಗಿಡದ ಹೂವುಗಳು ಬತ್ತಿಹೋಗಿ ಬೆಳೆಯ ಇಳುವರಿ ಕುಂಠಿತವಾಗುವ ಸಂಭವಿರುತ್ತದೆ. ಬರೀ ಅಲಸಂದೆಗೇ ಅಲ್ಲ ತೊಗರಿಗೂ ಅಲ್ಲಲ್ಲಿ ಹಳದಿ ರೋಗ ಕಾಣಿಸಿಕೊಂಡಿದೆ. ರೋಗಪೀಡಿತ ಗಿಡಗಳನ್ನು ಕಿತ್ತು ಹಾಕಬೇಕು ಎಂದು ತಿಳಿಸಿದರು.

ಅಸಿಟಾಮೀಫ್ರಿಡ್, ಫಿನಾಜಾಕ್ಸಿನ್ ಅಥವಾ ಪ್ರೊಪಾರೈಟ್ ತಲಾ ಎಂ.ಎಲ್ ಪ್ರತಿ ಲೀಟರ್ ನೀರಿನಲ್ಲಿ ಮಿಶ್ರಣ ಮಾಡಿ ಅಕ್ಕಡಿ ಬೆಳೆಗೆ ಸಿಂಪಡಣೆ ಮಾಡುವುದರಿಂದ ಕೀಟಬಾಧೆ ಹತೋಟಿಗೆ ಬರುತ್ತದೆ ಎಂದು ಕೃಷಿ ಅಧಿಕಾರಿಗಳು ಸಲಹೆ ನೀಡಿದ್ದಾರೆ.