‘ನಿಮ್ಮ ಮನೆಗೆ ನಮ್ಮ ಪುಸ್ತಕ’ ಅ.17ಕ್ಕೆ

7

‘ನಿಮ್ಮ ಮನೆಗೆ ನಮ್ಮ ಪುಸ್ತಕ’ ಅ.17ಕ್ಕೆ

Published:
Updated:

ಚಿತ್ರದುರ್ಗ: ಪುಸ್ತಕ ಪ್ರೀತಿ ಬೆಳೆಸುವ ಉದ್ದೇಶದಿಂದ ಕನ್ನಡ ಪುಸ್ತಕ ಪ್ರಾಧಿಕಾರ ನಡೆಸುತ್ತಿರುವ ‘ನಿಮ್ಮ ಮನೆಗೆ ನಮ್ಮ ಪುಸ್ತಕ’ ಅಭಿಯಾನಕ್ಕೆ ಕೋಟೆ ನಾಡಿನಲ್ಲೂ ಸಿದ್ಧತೆ ಆರಂಭವಾಗಿದೆ. ಇತಿಹಾಸತಜ್ಞ ಡಾ.ಬಿ.ರಾಜಶೇಖರಪ್ಪ ಅವರ ಮನೆಯಲ್ಲಿ ಅ.17ರಂದು ಆಯೋಜಿಸಿರುವ ಕಾರ್ಯಕ್ರಮಕ್ಕೆ ಬರುವ ಸಾಹಿತ್ಯಾಸಕ್ತರಿಗೆ ಉಚಿತ ಪುಸ್ತಕ ಸಿಗಲಿದೆ.

ಜೆಸಿಆರ್‌ ಬಡಾವಣೆಯ 2ನೇ ಕ್ರಾಸ್‌ನಲ್ಲಿರುವ ರಾಜಶೇಖರಪ್ಪ ಅವರ ‘ಧರ್ಮಶ್ರೀ’ ನಿವಾಸದಲ್ಲಿ ಬೆಳಿಗ್ಗೆ 10ಕ್ಕೆ ಕಾರ್ಯಕ್ರಮ ಆರಂಭವಾಗಲಿದೆ. ಪ್ರಾಧಿಕಾರದ ಅಧ್ಯಕ್ಷೆ ಡಾ.ವಸುಂದರಾ ಭೂಪತಿ, ಪ್ರೊ.ಜಿ.ಶರಣಪ್ಪ ಹಾಗೂ ತಾರಿಣಿ ಶುಭದಾಯಿನಿ ಪಾಲ್ಗೊಳ್ಳಲಿದ್ದಾರೆ.

ಪ್ರಾಧಿಕಾರಕ್ಕೆ 25 ವರ್ಷ ತುಂಬಿದ ಹಿನ್ನೆಲೆಯಲ್ಲಿ ಈ ವಿನೂತನ ಅಭಿಯಾನ ಹಮ್ಮಿಕೊಳ್ಳಲಾಗಿದೆ. ಸಂಶೋಧಕ ಡಾ.ಎಂ.ಚಿದಾನಂದಮೂರ್ತಿ, ಲೇಖಕಿ ಬಿ.ಟಿ.ಲಲಿತಾ ನಾಯಕ್‌ ಅವರ ಬೆಂಗಳೂರಿನ ನಿವಾಸ, ಡಾ.ಪ್ರಧಾನ ಗುರುದತ್ತ ಅವರ ಮೈಸೂರಿನ ಮನೆಯಲ್ಲಿ ಈಗಾಗಲೇ ಈ ಕಾರ್ಯಕ್ರಮ ನಡೆದಿವೆ. ಬಳ್ಳಾರಿ ಸೇರಿ ರಾಜ್ಯದ ಹಲವೆಡೆ ನಡೆದಿರುವ ಕಾರ್ಯಕ್ರಮಕ್ಕೆ ಸಾಹಿತ್ಯಾಭಿಮಾನಿಗಳಿಂದ ಮೆಚ್ಚುಗೆ ವ್ಯಕ್ತವಾಗಿದೆ.

‘ಸಾಹಿತಿಗಳು ಹಾಗೂ ಸಂಶೋಧಕರ ಮನೆ ಬಾಗಿಲಿಗೆ ಪ್ರಾಧಿಕಾರವೇ ತೆರಳುವುದು ವಿಭಿನ್ನ ಪ್ರಯೋಗ. ಅವರ ಮನೆಯ ಸುತ್ತಲಿನ ನಿವಾಸಿಗಳನ್ನು ಸೇರಿಸಿ ಪುಸ್ತಕ ಪ್ರೀತಿ ಬೆಳೆಸುವ ಕಾಳಜಿಯಿಂದ ಅಭಿಯಾನ ಹುಟ್ಟಿಕೊಂಡಿದೆ. ವಿವಿಧ ಲೇಖಕರ ಹಲವು ಪುಸ್ತಕಗಳನ್ನು ಓದುಗರಿಗೆ ಉಚಿತವಾಗಿ ನೀಡಲಾಗುತ್ತದೆ’ ಎಂದು ಪ್ರಾಧಿಕಾರದ ಅಧ್ಯಕ್ಷೆ ಡಾ.ವಸುಂದರಾ ಭೂಪತಿ ತಿಳಿಸಿದ್ದಾರೆ.

ಸಾಮಾಜಿಕ ಜಾಲತಾಣ, ತಂತ್ರಜ್ಞಾನದ ಬೆಳವಣಿಗೆಯ ಫಲವಾಗಿ ಪುಸ್ತಕ ಓದುಗರ ಸಂಖ್ಯೆ ಕ್ಷೀಣಿಸುತ್ತಿದೆ. ಪುಸ್ತಕಗಳತ್ತ ಯುವ ಸಮೂಹ ಹಾಗೂ ಹೊಸ ಓದುಗರನ್ನು ಸೆಳೆಯುವ ಉದ್ದೇಶವೂ ಈ ಅಭಿಯಾನದ ಹಿಂದಿದೆ.

Tags: 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !