ಧಾರಾವಾಹಿ ಕಲಾವಿದೆ ಸಾವು

ಟಿ.ಎನ್‌.ಸೀತಾರಾಂ ನಿರ್ದೇಶನದ ‘ಮಗಳು ಜಾನಕಿ’ ಧಾರಾವಾಹಿಯಲ್ಲಿ ಇವರು ಮಂಗಳಾ ಎಂಬ ಪಾತ್ರಧಾರಿಯಾಗಿದ್ದರು. ಹಲವು ಸಿನಿಮಾ ಹಾಗೂ ಧಾರಾವಾಹಿಗಳಲ್ಲಿಯೂ ನಟಿಸಿದ್ದರು.

‘ಬುಧವಾರ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ಮಂಗಳಕ್ಕ ಪಾತ್ರಧಾರಿ ಎಸ್‌.ವಿ.ಶೋಭಾ ಮೃತಪಟ್ಟಿದ್ದಾರೆ. ಇವರು ಅತ್ಯಂತ ಸಜ್ಜನ ಹಾಗೂ ಸೌಮ್ಯ ಸ್ವಭಾವದವರಾಗಿದ್ದರು. ಅವರ ಅಗಲಿಕೆಯಿಂದ ‘ಮಗಳು ಜಾನಕಿ’ ತಂಡಕ್ಕೆ ದೊಡ್ಡ ನಷ್ಟವಾಗಿದೆ’ ಎಂದು ಧಾರಾವಾಹಿ ತಂಡ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದೆ.

‘ಶೋಭಾ ಅವರು ಮಗಳು ಧಾರಾವಾಹಿ ಕಲಾವಿದೆ ಎಂಬುದು ದೃಢಪಟ್ಟಿದೆ. ಎಲ್ಲ ಐದು ಶವಗಳನ್ನು ಗುರುವಾರ ನಸುಕಿನ 2 ಗಂಟೆಯ ಹೊತ್ತಿಗೆ ಕುಟುಂಬಕ್ಕೆ ಹಸ್ತಾಂತರ ಮಾಡಲಾಗಿದೆ. ಗಾಯಗೊಂಡಿರುವ ಪ್ರವಿತಾ ಅವರನ್ನು ಹೆಚ್ಚಿನ ಚಿಕಿತ್ಸೆಗೆ ಬೆಂಗಳೂರಿಗೆ ಸ್ಥಳಾಂತರಿಸಲಾಗಿದೆ’ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಡಾ.ಕೆ.ಅರುಣ್‌ ತಿಳಿಸಿದ್ದಾರೆ.