ಹಿರಿಯೂರು: ತಾಲ್ಲೂಕಿನ ರೈತರ ಜೀವನಾಡಿ ವಾಣಿವಿಲಾಸ ಸಾಗರದಿಂದ ಫೆ. 3ರಿಂದ ಪ್ರಸಕ್ತ ವರ್ಷ ಮೂರು ಬಾರಿ ಅಚ್ಚುಕಟ್ಟು ಪ್ರದೇಶಕ್ಕೆ ನೀರು ಹರಿಸಲು ಸೋಮವಾರ ಜಿಲ್ಲಾಡಳಿತ ಸಭಾಂಗಣದಲ್ಲಿ ನಡೆದ ಜಿಲ್ಲಾಡಳಿತ, ನೀರಾವರಿ ಇಲಾಖೆ, ಸಲಹಾ ಸಮಿತಿ ಸಭೆಯಲ್ಲಿ ತೀರ್ಮಾನಿಸಲಾಯಿತು.
ಬೇಸಿಗೆ ಸಮೀಪಿಸುತ್ತಿರುವುದರಿಂದ ರೈತರ ಬೆಳೆಗಳಾದ ಮೆಕ್ಕೆಜೋಳ, ತೆಂಗು, ತೋಟಗಾರಿಕಾ ಬೆಳೆಗಳಿಗೆ ನೀರಿನ ಅವಶ್ಯಕತೆ ಇರುವುದರಿಂದ ಮೂರು ಬಾರಿ ನೀರು ಹರಿಸಲು ನಿರ್ಧರಿಸಲಾಗಿದೆ. ಇದರಿಂದ ತಾಲ್ಲೂಕಿನ 12,155 ಹೆಕ್ಟೇರ್ ಪ್ರದೇಶಕ್ಕೆ ನೀರುಣಿಸಲಾಗುವುದು. ಪ್ರಸ್ತುತ ಡ್ಯಾಂನಲ್ಲಿ 129.95 ಅಡಿ ನೀರು ಇರುವುದರಿಂದ ರೈತರು ಸಂತೋಷವಾಗಿದ್ದಾರೆ.
ಮೊದಲನೇ ಕಂತಿನ ನೀರು ಫೆ. 2ರಿಂದ ಮಾರ್ಚ್ 4ರವರೆಗೆ ಹರಿಯಲಿದೆ. ಎರಡನೇ ಕಂತಿನ ನೀರು ಮಾರ್ಚ್ 24ರಿಂದ ಏ. 23ರವರೆಗೆ. ಮೂರನೇ ಕಂತಿನ ನೀರು ಮೇ 19ರಿಂದ ಜೂನ್ 17ರವರೆಗೆ ನೀರು ಹರಿಯಲಿದೆ.
ಗಾಯತ್ರಿ ಜಲಾಶಯ ಪ್ರದೇಶಕ್ಕೆ: 1ನೇ ಕಂತಿನ ನೀರು ಮಾರ್ಚ್ 10ರಿಂದ 29ರವರೆಗೆ, 2ನೇ ಕಂತಿನ ನೀರು ಏ. 28ರಿಂದ ಮೇ 17ರವರೆಗೆ ನೀರು ಹರಿಸಲಾಗುವುದು.
ನೀರು ಹರಿಯಲಿರುವ ಅಚ್ಚಕಟ್ಟು ಪ್ರದೇಶದ ರೈತರು ತಮ್ಮ ಜಾನುವಾರುಗಳ ಸಂರಕ್ಷಣೆಗೆ ಎಚ್ಚರ ವಹಿಸಬೇಕು. ಜತೆಗೆ ನೀರನ್ನು ಮಿತವ್ಯಯವಾಗಿ ಬಳಸಬೇಕು. ರೈತರು ನೀರು ಪೋಲು ಮಾಡಬಾರದು ಎಂದು ನೀರಾವರಿ ಇಲಾಖೆ ಪ್ರಕಟಣೆಯಲ್ಲಿ ತಿಳಿಸಿದೆ.
