ಸೋಮವಾರ, ನವೆಂಬರ್ 18, 2019
27 °C

ಮಾದಕವಸ್ತು ಮಾರಾಟ: ನಾಲ್ವರ ಬಂಧನ

Published:
Updated:

ಮಂಗಳೂರು: ನಗರದ ಮೋರ್ಗನ್ಸ್‌ ಗೇಟ್‌ ಬಳಿ ವಿದ್ಯಾರ್ಥಿಗಳಿಗೆ ಮಾದಕವಸ್ತು ಮಾರಾಟ ಮಾಡುತ್ತಿದ್ದ ನಾಲ್ವರನ್ನು ಬಂಧಿಸಿರುವ ಪೊಲೀಸರು, ಕೊಕೇನ್‌, ಚರಸ್‌ ಹಾಗೂ ಮಾದಕವಸ್ತುಗಳಾಗಿ ಬಳಸುವ ಎಂಡಿಎಂಎ, ಎಲ್‌ಎಸ್‌ಡಿ ಮತ್ತು ಫಿಲ್ಸ್‌ ಮಾತ್ರೆಗಳನ್ನು ವಶಪಡಿಸಿಕೊಂಡಿದ್ದಾರೆ.

ರಥಬೀದಿ ನಿವಾಸಿ ಕಿಶನ್‌ ಹೆಗ್ಡೆ (19), ಫಳ್ನೀರ್‌ನ ವಾಸ್‌ ಲೇನ್‌ ನಿವಾಸಿ ಹಬೀಲ್‌ ಅಹಮ್ಮದ್ (19), ರಥಬೀದಿ ನಿವಾಸಿ ಅನಂತ್‌ ಕುಡ್ವ (21) ಮತ್ತು ಅತ್ತಾವರದ ವೈದ್ಯನಾಥ ನಗರದ ಗೋಪಿನಾಥ ಭಂಡಾರ್ಕರ್‌ (24) ಬಂಧಿತರು. ಆರೋಪಿಗಳಿಂದ 22 ಗ್ರಾಂ. ಕೊಕೇನ್‌, 6 ಗ್ರಾಂ. ಎಂಡಿಎಂಎ ಮಾತ್ರೆಗಳು, 5 ಎಲ್‌ಎಸ್‌ಡಿ ಮಾತ್ರೆಗಳು ಮತ್ತು 75 ಫಿಲ್ಸ್‌ ಗುಳಿಗೆಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ನಗರ ಪೊಲೀಸ್‌ ಕಮಿಷನರ್‌ ಡಾ.ಪಿ.ಎಸ್‌.ಹರ್ಷ ತಿಳಿಸಿದ್ದಾರೆ.

ಆರೋಪಿಗಳಿಂದ ಮೂರು ಮೊಬೈಲ್‌ ಫೋನ್‌, ದ್ವಿಚಕ್ರ ವಾಹನವನ್ನೂ ವಶಪಡಿಸಿಕೊಳ್ಳಲಾಗಿದೆ. ಒಟ್ಟು ₹ 3 ಲಕ್ಷ ಮೌಲ್ಯದ ಸ್ವತ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ನಗರ ಅಪರಾಧ ಘಟಕ (ಸಿಸಿಬಿ) ಹಾಗೂ ಆರ್ಥಿಕ ಅಪರಾಧ ಮತ್ತು ಮಾದಕವಸ್ತು ನಿಯಂತ್ರಣ (ಇ ಅಂಡ್‌ ಎನ್‌) ಪೊಲೀಸ್‌ ಠಾಣೆಯ ಪೊಲೀಸರು ಜಂಟಿ ಕಾರ್ಯಾಚರಣೆ ನಡೆಸಿ ಆರೋಪಿಗಳನ್ನು ಬಂಧಿಸಿದ್ದಾರೆ. ಇ ಅಂಡ್‌ ಎನ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.

ಪ್ರತಿಕ್ರಿಯಿಸಿ (+)