ಕರಂಗಲ್ಪಾಡಿಯಲ್ಲಿ ಮನೆ ಕೆಡವುವಾಗ ಲಿಂಟಲ್ ಕುಸಿದು ಗುರುವಾರ ಮೃತಪಟ್ಟ ಅಡ್ವಿನ್ ಹೆರಾಲ್ಡ್ ಮಾಬೆನ್‌ (54) ಅವರ ಸೋದರಿ ರೇಷ್ಮಾ ಅಂಚನ್‌ ನೋವನ್ನು ಹಂಚಿಕೊಂಡಿದ್ದು ಹೀಗೆ.
‘ಅಣ್ಣ ಮನೆಯಿಂದ ಹೊರಟು ಕೆಲವೇ ನಿಮಿಷಗಳಲ್ಲಿ ದೊಡ್ಡ ಸದ್ದಾಯಿತು. ಸ್ಥಳಕ್ಕೆ ಧಾವಿಸಿ ನೋಡಿದಾಗ ಇಬ್ಬರು ಲಿಂಟಲ್ ಕೆಳಗಡೆ ಸಿಲುಕಿದ್ದರು. ಮುಖ ಜಜ್ಜಿ ಹೋಗಿದ್ದರಿಂದ ಅಲ್ಲಿರುವುದು ನಮ್ಮ ಅಣ್ಣ ಎಂದು ತಿಳಿಯಲೇ ಇಲ್ಲ. ಯಾರೋ ಕೆಲಸದವರು ಲಿಂಟಲ್ ಅಡಿ ಸಿಲುಕಿದ್ದಾರೆ ಎಂದೇ ಭಾವಿಸಿದ್ದೆವು. ಮಣ್ಣಾಗಿದ್ದ ಅಂಗಿಯನ್ನು ಸರಿಯಾಗಿ ನೋಡಿದ ಬಳಿಕವಷ್ಟೇ ಅದು ನಮ್ಮಣ್ಣ ಎಂಬುದು ಖಾತರಿಯಾಯಿತು‘ ಎನ್ನುವಾಗ ಅವರ ಕಣ್ತುಂಬಿ ಬಂತು.
‘ಈ ಮನೆಯಲ್ಲಿ ಅಣ್ಣ ಹಾಗೂ ಅಮ್ಮ ಮಾತ್ರ ಇದ್ದರು. ಹಾಸಿಗೆ ಹಿಡಿದಿದ್ದ ಅಮ್ಮನಿಗೆ (ಸೆಲೆಸ್ಟಿನ್ ಮಾಬೆನ್‌) ಈಗ 79 ವರ್ಷ. ಔಷಧ ನೀಡಿ, ಮಸಾಜ್‌ ಮಾಡಿ, ಆಕೆಯನ್ನು ಚೆನ್ನಾಗಿ ನೋಡಿಕೊಳ್ಳುತ್ತಿದ್ದ ಅಣ್ಣ ಈಗ ಇಲ್ಲ ಎಂಬುದನ್ನು ನಂಬಲಾಗುತ್ತಿಲ್ಲ’ ಎಂದು ನೋವಿನಿಂದ ಹೇಳಿದರು.
ಪತಿಯನ್ನು ಕಳೆದುಕೊಂಡಿದ್ದ ಸೆಲೆಸ್ಟಿನ್ ಮಾಬೆನ್‌ ಅವರಿಗೆ ಸಿಎಸ್‌ಐ ಚರ್ಚ್ ಆ ಮನೆಯನ್ನು ನೀಡಿತ್ತು. ಅದರ ದಕ್ಷಿಣದಲ್ಲಿ ಜೇಮ್ಸ್ ಜತ್ತನ್ನ (ತಾಯಿಯ ಸೋದರ ಸಂಬಂಧಿ) ಅವರ ಮನೆ ಇತ್ತು. ಎರಡೂ ಮನೆಗಳು ಒಂದೇ ಗೋಟೆಯನ್ನು ಹಂಚಿಕೊಂಡಿವೆ.
ಜೇಮ್ಸ್ ಜತ್ತನ್ನ ಅವರ ಮನೆ ಕೆಡವುವಾಗ ಸೆಲೆಸ್ಟಿನ್ ಮಾಬೆನ್‌ ಅವರ ಮನೆಯ ಗೋಡೆ ಹಾಗೂ ಚಾವಣಿಯೂ ಹಾಣಿಗೊಳಗಾಗಿದೆ.
