ಪ್ರಧಾನಿ ಅಂದರೆ ಒಕ್ಕೂಟದ ಎಲ್ಲ ರಾಜ್ಯಗಳನ್ನೂ ಒಳಗೊಂಡ ಇಡಿಯ ದೇಶಕ್ಕೆ ಒಬ್ಬ ಯಜಮಾನ ಇದ್ದಂತೆ. ಅವರು ಹೇಳುವ ಮಟ್ಟಿಗೆ ಒಂದು ರಾಜ್ಯ ಕೆಟ್ಟು ಹೋಗಿರುವುದೇ ಆದರೆ, ಇಷ್ಟೆಲ್ಲ ಬೆಳವಣಿಗೆ ನಡೆಯುತ್ತಿರುವಾಗ ಈ ಯಜಮಾನ ಏನು ಮಾಡುತ್ತಿದ್ದರು? ಅದನ್ನು ಸರಿಪಡಿಸುವುದು ಅಥವಾ ಇಲ್ಲಿನ ಸರ್ಕಾರದ ವಿರುದ್ಧ ಕ್ರಮ ಜರುಗಿಸುವುದು ಅವರ ಜವಾಬ್ದಾರಿಯೂ ಅಲ್ಲವೇ? ಎಲ್ಲಕ್ಕಿಂತಲೂ ಮುಖ್ಯವಾಗಿ ದೇಶದ ಪ್ರಧಾನಿಯೇ ಒಂದು ರಾಜ್ಯದ ಬಗ್ಗೆ ಇಷ್ಟು ಕೆಟ್ಟ ಚಿತ್ರಣ ನೀಡಿದರೆ, ಅವರ ಮಾತನ್ನು ಸತ್ಯ ಎಂದು ನಂಬಿ ಹೂಡಿಕೆದಾರರು ಇಲ್ಲಿ ಹೂಡಿಕೆ ನಡೆಸಲು ಹಿಂದೇಟು ಹಾಕಿದರೆ ಅದರಿಂದಾಗಿ ಆ ರಾಜ್ಯಕ್ಕೆ ಮಾತ್ರವಲ್ಲ, ಒಟ್ಟಾರೆ ದೇಶದ ಆರ್ಥಿಕ ಬೆಳವಣಿಗೆಯ ಮೇಲೆಯೇ ನಕಾರಾತ್ಮಕ ಪರಿಣಾಮ ಉಂಟಾಗುವುದಿಲ್ಲವೇ?