ಕಡಬ: ತಾಲ್ಲೂಕಿನ ಇಚ್ಲಂಪಾಡಿ ಸಮೀಪದ ಕೊರಮೇರು ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯನ್ನು ದಾಖಲಾತಿ ಕೊರತೆಯಿಂದ ತಾತ್ಕಾಲಿಕವಾಗಿ ಮುಚ್ಚಲಾಗಿದೆ.
‘ಈ ಶೈಕ್ಷಣಿಕ ವರ್ಷದಲ್ಲಿ 3 ಮಕ್ಕಳು ಮಾತ್ರ ದಾಖಲಾತಿ ಆಗಿದ್ದು, ಅವರನ್ನು ಹತ್ತಿರದ ಶಾಲೆಗೆ ದಾಖಲು ಮಾಡಲಾಗಿದೆ. ವಿದ್ಯಾರ್ಥಿಗಳ ಕೊರತೆ ಕಾರಣದಿಂದ ಶಾಲೆಯನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿದ್ದು, ವಿದ್ಯಾರ್ಥಿಗಳ ದಾಖಲಾತಿ ಆದರೆ ಶಾಲೆಯನ್ನು ಮರು ಪ್ರಾರಂಭಿಸಲಾಗುವುದು’ ಎಂದು ಕಡಬ ಕ್ಷೇತ್ರ ಪ್ರಭಾರ ಶಿಕ್ಷಣಾಧಿಕಾರಿ ಲೋಕೇಶ್ ತಿಳಿಸಿದ್ದಾರೆ.
‘ಸುಮಾರು 38 ವರ್ಷಗಳಿಂದ ಶಾಲೆ ಇದೆ. ಸ್ಥಳೀಯವಾಗಿ ಇಂಗ್ಲಿಷ್‌ ಮಾಧ್ಯಮ ಶಾಲೆಗಳು ಹೆಚ್ಚಾಗಿದ್ದು, ಈ ಶಾಲೆಗೆ ಮಕ್ಕಳ ಸಂಖ್ಯೆ ಕಡಿಮೆ ಆಗುತ್ತಾ ಬಂದು ಶಾಲೆಯೇ ಮುಚ್ಚುವಂತಾಯಿತು. ಹೀಗಾಗಬಾರದಿತ್ತು. ಶಾಲೆಯನ್ನು ಉಳಿಸುವ ಆಗಬೇಕಾಗಿದೆ ಎಂದು ಸ್ಥಳೀಯರಾದ ಕೇಶವ ಗೌಡ ಕೊರಮೇರು ತಿಳಿಸಿದ್ದಾರೆ.
ಇಲ್ಲಿ 1ರಿಂದ 5ರ ವರೆಗೆ ತರಗತಿಗಳಿದ್ದು, ಇಲ್ಲಿದ್ದ ಒಬ್ಬರು ಶಿಕ್ಷಕರನ್ನು ಬೇರೆಡೆ ನಿಯೋಜಿಸಲಾಗಿದೆ. ಕಳೆದ ಶೈಕ್ಷಣಿಕ ವರ್ಷದಲ್ಲಿ 9 ಅನುದಾನ ರಹಿತ ಸೇರಿದಂತೆ ಒಟ್ಟು 14 ಶಾಲೆಗಳು ಮುಚ್ಚಿದ್ದವು.
