‘2014ರ ಮಹಾತ್ಮಾ ಗಾಂಧಿ ಆದರ್ಶ ಗ್ರಾಮ, 2016ರ ನಿರ್ಮಲ ಗ್ರಾಮ, ನೈರ್ಮಲ್ಯ ರತ್ನ ಪುರಸ್ಕಾರವನ್ನು ಈ ಪಂಚಾಯ್ತಿ ಪಡೆದಿದೆ. ನಿಯಮ ಉಲ್ಲಂಘಿಸಿ ಪ್ಲಾಸ್ಟಿಕ್ ಬಳಸುವವರ ಬಗ್ಗೆ ಪಂಚಾಯ್ತಿಗೆ ಮಾಹಿತಿ ನೀಡಿದವರ ಹೆಸರು ಗೋಪ್ಯವಾಗಿಡಲಾಗುವುದು. ವಸೂಲಾದ ದಂಡದ ಪೈಕಿ ಅವರಿಗೆ ₹ 50 ಪ್ರೋತ್ಸಾಹಧನ ನೀಡಲಾಗುತ್ತದೆ. ಹೀಗಾಗಿ ಪಂಚಾಯ್ತಿಯ ಜನಪರ ಕಾರ್ಯಕ್ಕೆ ಇಡೀ ಪಂಚಾಯ್ತಿಯ ನಾಗರಿಕರು ಕೈಜೋಡಿಸಿದ್ದಾರೆ. ಹೆಬ್ಬಾಳ, ಲಾಲವಾಡಿ, ಕಾರಲಗಾ ಹಟ್ಟಿ, ಹೆಬ್ಬಾಳ ಹಟ್ಟಿ, ನಾವಗಾ ಮತ್ತು ಕಾರಲಗಾ ಗ್ರಾಮಗಳ ಜನರು ಪ್ಲಾಸ್ಟಿಕ್ ಉತ್ಪನ್ನಗಳಿಗೆ ಪರ್ಯಾಯವಾಗಿ ಬಟ್ಟೆ ಅಥವಾ ಕಾಗದದ ಉತ್ಪನ್ನಗಳನ್ನು ಬಳಸುತ್ತಿದ್ದಾರೆ’ ಎಂದು ಹೆಬ್ಬಾಳ ಗ್ರಾಮ ಪಂಚಾಯ್ತಿ ಪಿಡಿಒ ಯಶವಂತ ಘಾಡಿ ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು.