ಉಳ್ಳಾಲ: ಇಲ್ಲಿನ ಮೊಗವೀರಪಟ್ನ ಸಮುದ್ರ ತೀರದಲ್ಲಿ ದೈತ್ಯಾಕಾರದ ಮೀನಿನ ಕಳೇಬರ ಪತ್ತೆಯಾಗಿದೆ. ತಿಮಿಂಗಿಲವನ್ನು ಹೋಲುತ್ತಿದ್ದರೂ, ಸ್ಥಳೀಯರು ಇದನ್ನು ಕಡಲು ಹಂದಿ (ಪರ್ಪೋಯಿಸ್) ಕಳೇಬರ ಎಂದು ಗುರುತಿಸಿದ್ದಾರೆ.
ಸುಮಾರು 10 ಅಡಿ ಉದ್ದದ, ಟನ್ಗಟ್ಟಲೆ ಭಾರ ಹೊಂದಿರುವ ಕಡಲ ಹಂದಿ ಇದಾಗಿದೆ. ಗುರುವಾರ ನಸುಕಿನ ಜಾವ ಮೊಗವೀರಪಟ್ನದ ಸಮುದ್ರ ತೀರದಲ್ಲಿ ಪತ್ತೆಯಾಗಿದೆ. ಈ ದೈತ್ಯಾಕಾರದ ಕಡಲ ಹಂದಿಯನ್ನು ನೋಡಲು ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಸಮುದ್ರ ತೀರದಲ್ಲಿ ಜಮಾಯಿಸಿದ್ದರು.
‘ಕಳೇಬರ ಕೊಳೆತ ಸ್ಥಿತಿಯಲ್ಲಿ ಇರಲಿಲ್ಲ. ಮತ್ತೆ ಇದನ್ನು ಹೂಳಲು ಕ್ರೇನಿನ ಅಗತ್ಯವಿದ್ದು, ಸ್ಥಳದಲ್ಲೇ ಬಿಟ್ಟರೆ ಕೊಳೆತು ದುರ್ನಾತ ಬೀರುವ ಸಾಧ್ಯತೆ ಇರುವುದರಿಂದ ಎಲ್ಲರೂ ಸೇರಿ ಮತ್ತೆ ಸಮುದ್ರಕ್ಕೆ ಕಳೇಬರವನ್ನು ದೂಡಿ ಬಿಟ್ಟಿದ್ದೇವೆ’ ಎಂದು ಸ್ಥಳೀಯರು ಹೇಳಿದರು.
ಮಂಗಳೂರು ಮೀನುಗಾರಿಕಾ ಮಹಾವಿದ್ಯಾಲಯದ ವಿಜ್ಞಾನಿಗಳ ತಂಡ ಉಳ್ಳಾಲಕ್ಕೆ ಭೇಟಿ ನೀಡಿ, ಕಳೇಬರಹ ಪರೀಕ್ಷಿಸಿ, ಇದು ಕಡಲ ಹಂದಿಯೇ ಎಂದು ದೃಢಪಡಿಸಲು ಯತ್ನಿಸಿದರೂ, ಅಷ್ಟರಲ್ಲಾಗಲೇ ಸ್ಥಳೀಯರು ಕಳೇಬರವನ್ನು ಸಮುದ್ರಕ್ಕೆ ದೂಡಿ ಬಿಟ್ಟಿದ್ದರಿಂದ ಇದು ಸಾಧ್ಯವಾಗಲಿಲ್ಲ.