ಶುಲ್ಕದ ಹೊರೆ; ವಿದ್ಯಾರ್ಥಿಗಳಿಗೆ ಬರೆ

ವೈದ್ಯಕೀಯ ತಪಾಸಣಾ, ಕ್ರೀಡಾ ಶುಲ್ಕ ಭರಿಸಬೇಕು. ಆದರೆ, ಅದರಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ. ಅಭಿವೃದ್ಧಿ ಶುಲ್ಕ ಹೆಚ್ಚಳ ಮಾಡಿರುವುದು ಪದವಿ ಆಕಾಂಕ್ಷಿಗಳಿಗೆ ಹೊರೆಯಾಗಿ ಪರಿಣಮಿಸಿದೆ.

ವಿಶ್ವವಿದ್ಯಾಲಯದ ವ್ಯಾಪ್ತಿಗೆ ದಾವಣಗೆರೆ–ಚಿತ್ರದುರ್ಗ ಕಾಲೇಜುಗಳು ಒಳಪಡುತ್ತವೆ. ಸರ್ಕಾರಿ, ಅನುದಾನ, ಅನುದಾನರಹಿತ ಕಾಲೇಜುಗಳ ಸಂಖ್ಯೆ ಸುಮಾರು 81ಕ್ಕೂ ಹೆಚ್ಚು. ಪ್ರತಿ ಕೋರ್ಸ್‌ಗೂ 60ರಿಂದ 90ರವರೆಗೆ ಪ್ರವೇಶ ಕಲ್ಪಿಸಬಹುದು. 5 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಪ್ರತಿ ವರ್ಷ ಪ್ರವೇಶ ಪಡೆಯುತ್ತಾರೆ. ಇವರಿಂದ ಪಡೆಯುವ ಹೆಚ್ಚುವರಿ ಶುಲ್ಕವನ್ನು ನೀವೇ ಊಹಿಸಿ ಎಂಬುದು ಹೆಸರು ಹೇಳಬಯಸದ ಪ್ರಾಂಶುಪಾಲರೊಬ್ಬರ ಆರೋಪ.

‘ಮೊದಲೇ ವೃತ್ತಿಪರ ಕೋರ್ಸ್‌ಗಳತ್ತ ವಿದ್ಯಾರ್ಥಿಗಳು ಹೆಚ್ಚು ಆಕರ್ಷಿತರಾಗುತ್ತಿದ್ದಾರೆ. ವಿಶ್ವವಿದ್ಯಾಲಯಗಳು ಕಾರ್ಪೊರೇಟ್‌ ಸಂಸ್ಕೃತಿ ಅಳವಡಿಸಿಕೊಳ್ಳದೇ ಬಡ ವಿದ್ಯಾರ್ಥಿಗಳಿಗೆ ಶಿಕ್ಷಣ ಕೈಗೆಟುಕುವ ಕ್ರಮ ಕೈಗೊಳ್ಳಬೇಕು. ಆದರೆ, ಶುಲ್ಕ ಏರಿಕೆ, ಪದೇ ಪದೇ ಶುಲ್ಕ ಪಡೆದುಕೊಳ್ಳುವ ಪದ್ಧತಿ ಸರಿಯಲ್ಲ. ಸರ್ಕಾರ ಶುಲ್ಕ ಕಡಿತ ಮಾಡಿದ್ದರೂ ವಿವಿಗಳ ಅಭಿವೃದ್ಧಿ ಶುಲ್ಕ ಹೆಚ್ಚಾಗಿರುವುದು ದುರಂತ’ ಎಂಬ ಆರೋಪಗಳು ಕೇಳಿಬರುತ್ತಿವೆ.

ಪದೇ ಪದೇ ರಾದ್ಧಾಂತ: ಪದವಿಯ ಪರೀಕ್ಷೆ ತೆಗೆದುಕೊಂಡಾಗ ಪ್ರತಿಬಾರಿಯೂ ಪರೀಕ್ಷಾ ಶುಲ್ಕ, ಅಂಕಪಟ್ಟಿ ಶುಲ್ಕ ಎಂದು ಕಟ್ಟಿಸಿಕೊಳ್ಳಲಾಗುತ್ತಿದೆ. ವಿದ್ಯಾರ್ಥಿ ಅನುತ್ತೀರ್ಣಗೊಂಡರೆ ಅಂಕಪಟ್ಟಿ ಕೊಡುವುದಿಲ್ಲ. ಆತ ಮತ್ತೆ ಪರೀಕ್ಷೆ ತೆಗೆದುಕೊಂಡಾಗ ಅಂಕಪಟ್ಟಿ ಶುಲ್ಕವನ್ನು ಭರಿಸಬೇಕಾಗಿದೆ. ಉತ್ತೀರ್ಣನಾದರೆ ಮಾತ್ರ ಅಂಕಪಟ್ಟಿ ನೀಡುತ್ತಾರೆ. ಪದೇ ಪದೇ ಅಂಕಪಟ್ಟಿ ಶುಲ್ಕ ಭರಿಸಬೇಕಾಗಿರುವುದು ವಿದ್ಯಾರ್ಥಿಗಳಿಗೆ ಹೊರೆಯಾಗಿದೆ. ಪದವಿಪ್ರಮಾಣ ಪತ್ರಕ್ಕೂ (ಕಾನ್ವಕೇಷನ್‌) ಇದೇ ಪದ್ಧತಿಯಿದ್ದು, ಅದನ್ನು ಬದಲಾವಣೆ ಮಾಡಬೇಕು. ಒಮ್ಮೆ ಶುಲ್ಕ ಕಟ್ಟಿಸಿಕೊಂಡ ಮೇಲೆ ಅಂಕಪಟ್ಟಿ ಶುಲ್ಕ, ಪದವಿಪ್ರಮಾಣ ಪತ್ರ ನೀಡಬೇಕು ಎಂಬುದು ಪದವೀಧರರ ಆಗ್ರಹ.

ಪ್ರತಿಕ್ರಿಯೆಗೆ ಸಿಗದ ಕುಲಪತಿ!
ವಿವಿ ನಿಧಿ ಹೆಚ್ಚಳಕ್ಕೆ ಸಂಬಂಧಿಸಿದಂತೆ ಕುಲಪತಿ ಪ್ರೊ.ಬಿ.ಬಿ.ಕಲಿವಾಳ ಅವರನ್ನು ಸಂಪರ್ಕಿಸಲು ಪ್ರಯತ್ನಿಸಿದರೂ ಅವರು ಮೊಬೈಲ್‌ ರಿಸೀವ್ ಮಾಡಲಿಲ್ಲ.

ವಾಪಸ್‌ ಪಡೆಯಲು ಮನವಿ
ದಾವಣಗೆರೆ– ಚಿತ್ರದುರ್ಗದ ಎಲ್ಲ ಪದವಿ ಕಾಲೇಜುಗಳ ಪ್ರಾಂಶುಪಾಲರು ವಿವಿ ಕುಲಪತಿ ಅವರನ್ನು ಭೇಟಿ ಮಾಡಿ, ಶುಲ್ಕ ಹೆಚ್ಚಳ ವಾಪಸ್‌ ಪಡೆಯಲು ಮನವಿ ಮಾಡಲು ನಿರ್ಧರಿಸಿದ್ದಾರೆ. ಕಳೆದ ವರ್ಷವೂ ಶುಲ್ಕ ಹೆಚ್ಚಳ ಮಾಡಲಾಗಿತ್ತು. ಕಾಲೇಜುಗಳಿಂದ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ವಾಪಸ್‌ ಪಡೆಯಲಾಗಿತ್ತು. ಈ ಬಾರಿ ಸಹ ಯಾರಿಗೂ ತಿಳಿಯದಂತೆ ಶುಲ್ಕ ಹೆಚ್ಚಳ ಮಾಡಿ ಆಯಾ ಕಾಲೇಜುಗಳಿಗೆ ಆದೇಶ ನೀಡಿರುವುದು ಗೊಂದಲಕ್ಕೆ ಕಾರಣವಾಗಿದೆ.