ದಾವಣಗೆರೆ: 90 ವರ್ಷದ ವೃದ್ಧೆ, ಒಂದು ವರ್ಷದ ಹೆಣ್ಣು ಮಗು ಸೇರಿ 162 ಮಂದಿಗೆ ಕೊರೊನಾ ಸೋಂಕು ತಗುಲಿರುವುದು ಸೋಮವಾರ ದೃಢಪಟ್ಟಿದೆ. ಮೂವರು ಮೃತಪಟ್ಟಿದ್ದಾರೆ.
ಬೆಳವನೂರಿನ 70 ವರ್ಷದ ವೃದ್ಧ ತೀವ್ರ ಉಸಿರಾಟದ ಸಮಸ್ಯೆಯಿಂದ ಮೃತಪಟ್ಟರು. ವಿನೋಬನಗರದ 85 ವರ್ಷದ ವೃದ್ಧ ಮತ್ತು ಹರಿಹರ ತಾಲ್ಲೂಕು ಬೆಳ್ಳೂಡಿಯ 53 ವರ್ಷದ ಮಹಿಳೆ ಉಸಿರಾಟದ ಸಮಸ್ಯೆ, ಹೃದಯ ಸಂಬಂಧಿ ಕಾಯಿಲೆ, ರಕ್ತದೊತ್ತಡಗಳಿಂದ ಬಳಲಿ ನಿಧನರಾದರು.
27 ವೃದ್ಧರು, 15 ವೃದ್ಧೆಯರು, ಮೂವರು ಬಾಲಕರು, 9 ಮಂದಿ ಬಾಲಕಿಯರಿಗೆ ಕೊರೊನಾ ಬಂದಿದೆ.
ಪೊಲೀಸ್ ಕ್ವಾರ್ಟರ್ಸ್ನ ಇಬ್ಬರು, ಎಸ್ಎಸ್ ಆಸ್ಪತ್ರೆಯ ಇಬ್ಬರು, ಎಸ್ಎಸ್ ಆಸ್ಪತ್ರೆ ಕ್ವಾರ್ಟರ್ಸ್ನ ಒಬ್ಬರು, ಬಾಪೂಜಿ ಆಸ್ಪತ್ರೆಯ ಒಬ್ಬರು, ಸಿಜಿ ಆಸ್ಪತ್ರೆಯ ಒಬ್ಬರು, ನಲ್ಕುಂದ ಪ್ರಾಥಮಿಕ ಆರೋಗ್ಯ ಕೇಂದ್ರದ ಒಬ್ಬರಿಗೆ ಕೊರೊನಾ ಬಂದಿದೆ.
ದಾವಣಗೆರೆ ತಾಲ್ಲೂಕಿನ 79 ಮಂದಿಗೆ ಸೋಂಕು ತಗುಲಿದೆ. ತೋಳಹುಣಸೆ, ಕಡ್ಲೇಬಾಳ್, ಬಾವಿಕಲ್, ಬಸವನಾಳ್, ಲೋಕಿಕೆರೆ, ಯರಗುಂಟೆ, ನಲ್ಕುಂದ ಹೀಗೆ ಎಂಟು ಮಂದಿ ಗ್ರಾಮೀಣ ಭಾಗದವರು. ಉಳಿದ 71 ಮಂದಿ ಮಹಾನಗರ ಪಾಲಿಕೆ ವ್ಯಾಪ್ತಿಯವರು.