ಗುರುವಾರ , ಡಿಸೆಂಬರ್ 2, 2021
19 °C
ಶರಣ ಸಂಗಮ ಕಾರ್ಯಕ್ರಮದಲ್ಲಿ ವಿರಕ್ತಮಠದ ಬಸವಪ್ರಭು ಸ್ವಾಮೀಜಿ

ದಾವಣಗೆರೆ: ಕಾನೂನು ಅರಿವಿನಿಂದ ಅಪರಾಧ ನಿಯಂತ್ರಣ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ದಾವಣಗೆರೆ: ಜನಸಾಮಾನ್ಯರು ಮುಗ್ಧರಾಗಿರುತ್ತಾರೆ. ಆ ಮುಗ್ಧತೆಯನ್ನು ಬುದ್ಧಿವಂತರು ದುರುಪಯೋಗಪಡಿಸಿಕೊಂಡು ಮೋಸ ಮಾಡುತ್ತಾರೆ. ಈ ಅನ್ಯಾಯವನ್ನು, ನಯವಂಚನೆಯನ್ನು ತಪ್ಪಿಸಲು ಕಾನೂನಿನ ಅರಿವು ಅಗತ್ಯ ಎಂದು ವಿರಕ್ತಮಠದ ಬಸವಪ್ರಭು ಸ್ವಾಮೀಜಿ ಹೇಳಿದರು.

ಆರ್‌.ಎಲ್‌. ಕಾನೂನು ವಿದ್ಯಾಲಯ ಮತ್ತು ವಿರಕ್ತಮಠದ ಆಶ್ರಯದಲ್ಲಿ ನಗರದ ಶಿವಯೋಗಾಶ್ರಮ ಬಸವಕೇಂದ್ರದಲ್ಲಿ ಬುಧವಾರ ನಡೆದ ‘ಜನಸಾಮಾನ್ಯರಿಗಾಗಿ ಕಾನೂನು ಅರಿವು’ ಶರಣ ಸಂಗಮ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು.

ದೇಶದ ಕಾನೂನುಗಳನ್ನು ಎಲ್ಲರೂ ಪಾಲನೆ ಮಾಡಿದರೆ ಶಾಂತಿ ನೆಲೆಸುತ್ತದೆ. ಕಳಬೇಡ, ಕೊಲಬೇಡ, ಹುಸಿಯ ನುಡಿಯಬೇಡ, ಮುನಿಯಬೇಡ, ಅನ್ಯರಿಗೆ ಅಸಹ್ಯಪಡಬೇಡ, ತನ್ನ ಬಣ್ಣಿಸಬೇಡ, ಇದಿರು ಹಳಿಯಬೇಡ ಎಂಬ ಬಸವಣ್ಣನ ಸಪ್ತಶೀಲಗಳನ್ನು ಪಾಲನೆ ಮಾಡಿದರೆ ದೇಶದ ಕಾನೂನು ಪಾಲನೆಯಾಗುತ್ತದೆ ಎಂದು ತಿಳಿಸಿದರು.

ಗ್ರಾಮಾಂತರ ಪೊಲೀಸ್‌ ಉಪಾಧೀಕ್ಷಕ ನರಸಿಂಹ ವಿ. ತಾಮ್ರಧ್ವಜ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ, ‘ಬ್ಯಾಂಕ್‌ನವರು ಎಂದೋ, ಕೋವಿಡ್‌ ಲಸಿಕೆ ಹಾಕಲು ವಿವರ ಕೊಡಿ ಎಂದೋ ಅಪರಿಚಿತರು ಕರೆ ಮಾಡಿದರೆ ಬ್ಯಾಂಕ್‌ ಪಾಸ್‌ ಪುಸ್ತಕದ ವಿವರ ನೀಡಬೇಡಿ. ಬ್ಯಾಂಕ್‌ ವಿವರ ನೀಡಿ ಒಟಿಪಿ ಕೊಟ್ಟರೆ ಹಣ ಕಳೆದುಕೊಳ್ಳುತ್ತೀರಿ’ ಎಂದು ಎಚ್ಚರಿಸಿದರು.

ದಾವಣಗೆರೆಯಲ್ಲಿ ಚೀಟಿ ಹಣ ಹಾಕಿ ವಂಚನೆ ಮಾಡುವುದು ಮತ್ತು ಬೈಕ್‌ ಕಳ್ಳತನ ಇವೆರಡು ಭಾರಿ ಪ್ರಮಾಣದಲ್ಲಿ ನಡೆಯುತ್ತಿದೆ. ಈ ಬಗ್ಗೆ ಜಾಗರೂಕರಾಗಿರಿ. ಬಡ್ಡಿ, ಮೀಟರ್‌ ಬಡ್ಡಿ ವ್ಯವಹಾರ ಕೂಡ ಜಾಸ್ತಿ ಇದೆ. ಇಂಥವೆಲ್ಲ ಕಂಡರೆ ಕೂಡಲೇ ಪೊಲೀಸರಿಗೆ ತಿಳಿಸಿ ಎಂದು ಮನವಿ ಮಾಡಿದರು.

ಬೈಕಲ್ಲಿ ಬಂದು ಸರ ಕಿತ್ತುಕೊಂಡು ಪರಾರಿಯಾಗುವ ಪ್ರಕರಣಗಳು ಹೆಚ್ಚಾಗಿವೆ. ಅಂಥ ಪ್ರಕರಣ ನಡೆದ ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಿದರೆ ನಗರದ ಎಲ್ಲ ಒಳ ಬರುವ, ಹೊರಹೋಗುವ ರಸ್ತೆಗಳಲ್ಲಿ ಪೊಲೀಸರು ಬಂದೋಬಸ್ತು ಮಾಡುತ್ತಾರೆ. ಆಗ ಕಳ್ಳರು ಸಿಗುವ ಸಾಧ್ಯತೆ ಹೆಚ್ಚಿರುತ್ತದೆ. ತಡವಾಗಿ ತಿಳಿಸಿದರೆ ಅವರು ನಗರ ದಾಟಿ ಹೋಗಿಬಿಡುತ್ತಾರೆ ಎಂದು ತಿಳಿಸಿದರು.

 ಆರ್‌.ಎಲ್‌. ಕಾನೂನು ಕಾಲೇಜು ಪ್ರಾಚಾರ್ಯ ಡಾ. ಎಂ. ಸೋಮಶೇಖರಪ್ಪ, ‘ಸಂವಿಧಾನವೇ ಮೂಲ ಕಾಯ್ದೆ. ಮತ್ತೆಲ್ಲ ಕಾನೂನುಗಳು ಇದರಡಿಯಲ್ಲಿ ಬರುತ್ತದೆ. ಅಮೆರಿಕ, ಇಂಗ್ಲೆಂಡ್‌ನಂಥ ಆಧುನಿಕ ಸರ್ಕಾರಗಳು ಕೂಡ ಮೂಲಭೂತ ಹಕ್ಕುಗಳನ್ನು ಸಂವಿಧಾನದಲ್ಲಿ ಹೊಂದಿಲ್ಲ. ಭಾರತ ಹೊಂದಿದೆ’ ಎಂದು ತಿಳಿಸಿದರು.

ಈಗ ಸಂವಿಧಾನ ಹೊಂದಿರುವ ಆಶಯವನ್ನೇ 12ನೇ ಶತಮಾನದಲ್ಲಿ ಬಸವಾದಿ ಶರಣರು ನಡೆಸಿದ ಅನುಭವ ಮಂಟಪ ಹೊಂದಿತ್ತು ಎಂದರು.

ಸಹಾಯಕ ಪ್ರಾಧ್ಯಾಪಕರಾದ ಬಿ.ಪಿ. ಬಸವನಗೌಡ ಪಾಟೀಲ, ವಿದ್ಯಾಧರ ವೇದವರ್ಮ ಟಿ., ವಿದ್ಯಾರ್ಥಿ ಸಂಚಾಲಕ ಸಿದ್ಧನಗೌಡ ಕೆ. ಇದ್ದರು. ಶರಣಬಸವ ಸ್ವಾಗತಿಸಿದರು. ಕುಂಟೋಜಿ ಚನ್ನಪ್ಪ ಶರಣು ಸಲ್ಲಿಸಿದರು. ರೋಶನ್‌ ಕಾರ್ಯಕ್ರಮ ನಿರೂಪಿಸಿದರು. ರುಕ್ಮಾಬಾಯಿ ವಚನಗಾಯನ ಮಾಡಿದರು. ಬಸವ ಕಲಾ ಲೋಕದ ಸದಸ್ಯರು ವಚನ ಸಂಗೀತ ನಡೆಸಿದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.