ದಾವಣಗೆರೆ: ಕಾರು ಮನೆಯಲ್ಲೇ ನಿಂತಿದ್ದರೂ ಫಾಸ್ಟ್ಯಾಗ್‌ನಿಂದ ಹಣ ಕಡಿತವಾಗಿದ್ದು, ಈ ಬಗ್ಗೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಹಾಗೂ ಸಿಇಎನ್ ಠಾಣೆಗೆ ದೂರು ನೀಡಲಾಗಿದೆ ಎಂದು ವಕೀಲ ಎಸ್. ಪರಮೇಶ್ ಹೇಳಿದರು.
‘ಇನೋವಾ ಕಾರು ಮಾರ್ಚ್ 31ರ ರಾತ್ರಿ ನನ್ನ ಮನೆಯ ಕಾಂಪೌಂಡ್ ಒಳಗಡೆಯೇ ಇದೆ. ಆದರೆ ಹೆಬ್ಬಾಳ್ ಟೋಲ್‌ನಲ್ಲಿ ₹ 60, ಕುಲಮನಹಳ್ಳಿ ಟೋಲ್‌ನಲ್ಲಿ ₹ 15, ನವಯುಗ ಟೋಲ್‌ನಲ್ಲಿ ₹ 20 ಕಡಿತವಾಗಿದೆ. ಅಲ್ಲದೇ ಗುಯಿಲಾಳು ಟೋಲ್‌ನಲ್ಲಿ ₹ 70 ಹಾಗೂ ಕರ್ಜೀವನ ಟೋಲ್‌ ಪ್ಲಾಜಾದಲ್ಲಿ ₹ 85 ಕಡಿತವಾಗಿದೆ’ ಎಂದು ಆರೋಪಿಸಿದರು.
‘ಇದೇ ರೀತಿ ಮಾರ್ಚ್ 19 ಹಾಗೂಮಾರ್ಚ್ 23ರಂದು ಒಟ್ಟು 7 ಬಾರಿ ಹಣ ಕಡಿತಗೊಂಡಿದ್ದು, ಇದೊಂದು ವೈಟ್ ಕಾಲರ್ ಅಪರಾಧವಾಗಿದೆ. ವಿನಾಕಾರಣ ಹಣ ಕಡಿತಗೊಂಡಿರುವುದರ ಬಗ್ಗೆ ಕೋರ್ಟ್‌ನಲ್ಲಿ ಖಾಸಗಿ ದೂರು (ಪಿಸಿಆರ್) ಹಾಗೂ ಗ್ರಾಹಕ ನ್ಯಾಯಾಲಯದಲ್ಲಿ ಮೊಕದ್ದಮೆ ದಾಖಲಿಸಿ ₹ 5 ಲಕ್ಷದವರೆಗೂ ಪರಿಹಾರ ಕೇಳಲಾಗುವುದು’ ಎಂದು ಎಚ್ಚರಿಸಿದರು.
