ಮಲೇಬೆನ್ನೂರು |‘125 ಎಕರೆ ಭತ್ತದ ಬೆಳೆಗೆ ಹಾನಿ‘

ಕಳೆದೆರಡು ದಿನಗಳಿಂದ ರಾತ್ರಿವೇಳೆ ಮಿಂಚು ಗುಡುಗಿನ ಆರ್ಭಟದೊಂದಿಗೆ ಗಾಳಿ ಸಹಿತ ಬಿರುಮಳೆ ಸುರಿಯುತ್ತಿದೆ. ಮುಂಚಿತವಾಗಿ ನಾಟಿ ಮಾಡಿದ ಭತ್ತ ಕಾಳು ಕಟ್ಟುತ್ತಿದ್ದು ಕೆಲವೆಡೆ ಮುರಿದುಕೊಂಡು ಬಿದ್ದಿದೆ, ಕೆಲವೆಡೆ ಚಾಪೆ ಹಾಸಿದೆ.

ನಾಲೆಯ ನೀರು ಸಿಗದೆ ಸಂಕಷ್ಟಕ್ಕೆ ಸಿಲುಕಿದ್ದ ಕೃಷಿಕರು ಈಗ ಸುರಿಯುತ್ತಿರುವ ಅಕಾಲಿಕ ಮಳೆಯಿಂದ ತೆನೆ ಕಟ್ಟಿದ ಭತ್ತದ ಬೆಳೆ ಹಾಳಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಹೋಬಳಿ ವ್ಯಾಪ್ತಿಯಲ್ಲಿ ಗುರುವಾರ ಮಳೆ ಮುಂದುವರಿದಿದೆ. ಕೆಲವು ಭಾಗದಲ್ಲಿ ತಡವಾಗಿ ನಾಟಿ ಮಾಡಿದವರಿಗೆ ಮಳೆ ಸಂತಸ ತಂದಿದೆ.

ಕಂಬತ್ತನಹಳ್ಳಿ 10 ಎಕರೆ, ಹುಲುಗಿನಹೊಳೆ 10, ಎಳೆಹೊಳೆ 10, ಧೂಳೆಹೊಳೆ 25, ಇಂಗಳಗೊಂದಿ 15, ವಾಸನ 20, ಉಕ್ಕಡಗಾತ್ರಿ 10, ಕುಣಿಬೆಳೆಕೆರೆ 25 ಎಕರೆ ಬೆಳೆ ಹಾನಿಗೊಳಗಾಗಿದೆ.

ಕಂದಾಯ ಹಾಗೂ ಕೃಷಿ ಇಲಾಖೆ ಅಧಿಕಾರಿಗಳು ಗ್ರಾಮಗಳಿಗೆ ಭೇಟಿ ನೀಡಿ ನಷ್ಟದ ಅಂದಾಜು ಮಾಡುತ್ತಿದ್ದಾರೆ.