ತೆರಿಗೆ ಕಡಿತದ ನಿರೀಕ್ಷೆಯಲ್ಲಿ ವರ್ತಕರು

7
ಒಂದು ವರ್ಷ ಸಾಗಿ ಬಂದ ಜಿಎಸ್‌ಟಿಗೆ ಬೇಕು ಇನ್ನಷ್ಟು ಸುಧಾರಣೆ

ತೆರಿಗೆ ಕಡಿತದ ನಿರೀಕ್ಷೆಯಲ್ಲಿ ವರ್ತಕರು

Published:
Updated:
Deccan Herald

ದಾವಣಗೆರೆ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಜಾರಿಗೊಳಿಸಿದಾಗ ಉಂಟಾಗಿದ್ದ ಬಹುತೇಕ ಗೊಂದಲಗಳು ನಿವಾರಣೆಯಾಗಿವೆ. ಒಂದು ವರ್ಷದಲ್ಲಿ ಈ ವ್ಯವಸ್ಥೆಗೆ ಹೊಂದಿಕೊಂಡ ವ್ಯಾಪಾರಿಗಳೂ ಈಗ ಬಹುತೇಕ ನಿರಾಳರಾಗಿದ್ದಾರೆ.

ಜಿಎಸ್‌ಟಿಯಿಂದಾಗಿ ದಾಖಲೆಗಳ ನಿರ್ವಹಣೆ ಸ್ವಲ್ಪ ಕಷ್ಟವಾಗುತ್ತಿದ್ದರೂ, ಈ ವ್ಯವಸ್ಥೆಯ ಬಗ್ಗೆ ಜವಳಿ ಉದ್ಯಮ ಕ್ಷೇತ್ರದ ಹಲವು ವ್ಯಾಪಾರಿಗಳಲ್ಲಿ ಸಕಾರಾತ್ಮಕ ಭಾವ ಇರುವುದು ಕಂಡುಬರುತ್ತಿದೆ. ಜೊತೆಗೆ ವ್ಯವಸ್ಥೆಯಡಿ ಆಗಬೇಕಾದ ಸಣ್ಣಪುಟ್ಟ ಬದಲಾವಣೆ ಹಾಗೂ ತೆರಿಗೆ ಕಡಿತದ ಬಗ್ಗೆಯೂ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.

‘ಆರಂಭದಲ್ಲಿ ವ್ಯವಸ್ಥೆಯನ್ನು ಅರ್ಥ ಮಾಡಿಕೊಂಡು ಅನುಷ್ಠಾನಗೊಳಿಸುವಲ್ಲಿ ತೊಂದರೆಯಾಗಿತ್ತು. ಈಗ ಬಹುತೇಕ ಸಮಸ್ಯೆಗಳಿಗೆ ಪರಿಹಾರ ಸಿಕ್ಕಿವೆ. ದಾಖಲೆಗಳನ್ನು ಆನ್‌ಲೈನ್‌ನಲ್ಲಿ ಭರ್ತಿ ಮಾಡಿದ ಬಳಿಕ ಅವುಗಳನ್ನು ತಪಾಸಣೆ ಮಾಡಲು ಇನ್ನೂ ಸೂಕ್ತ ತಂತ್ರಾಂಶವನ್ನು ತಂದಿಲ್ಲ. ಸದ್ಯಕ್ಕೆ ಅಬಕಾರಿ ಇಲಾಖೆಯವರು ನಮ್ಮ ಬಿಲ್‌ಗಳನ್ನು ಪರಾಮರ್ಶೆ ಮಾಡುತ್ತಿಲ್ಲ. ನಿತ್ಯ ಸಾವಿರಾರು ಬಿಲ್‌ಗಳು ಸೃಷ್ಟಿಯಾಗುವ ದೊಡ್ಡ ವ್ಯಾಪಾರಿಗಳು ಅಪ್‌ಲೋಡ್‌ ಮಾಡುವ ದಾಖಲೆಗಳನ್ನು ಸುಲಭವಾಗಿ ಪರಾಮರ್ಶೆ ಮಾಡುವ ವ್ಯವಸ್ಥೆಯನ್ನೂ ಮಾಡಬೇಕು’ ಎನ್ನುತ್ತಾರೆ ಬಿ.ಎಸ್‌. ಚನ್ನಬಸಪ್ಪ ಜವಳಿ ಅಂಗಡಿಯ ಮಾಲೀಕರಾದ ಬಿ.ಸಿ. ಶಿವಕುಮಾರ್‌.

‘ಜಿಎಸ್‌ಟಿ ಗ್ರಾಹಕರ ಮೇಲೆ ನೇರವಾಗಿ ತೊಂದರೆ ಉಂಟುಮಾಡಿಲ್ಲ. ಈಗ ವ್ಯಾಪಾರ ಸ್ವಲ್ಪಮಟ್ಟಿಗೆ ಕುಸಿತಗೊಂಡಿದ್ದರೂ ಇದಕ್ಕೆ ಜಿಎಸ್‌ಟಿಯೇ ನೇರ ಕಾರಣ ಎಂದು ಹೇಳಲು ಆಗದು. ಸತತ ಬರಗಾಲ, ಜನರಲ್ಲಿನ ಖರೀದಿ ಸಾಮರ್ಥ್ಯ ತಗ್ಗಿರುವುದು, ಬ್ಯಾಂಕ್‌ಗಳ ವಹಿವಾಟಿನ ಮೇಲೆ ಆದಾಯ ತೆರಿಗೆ ಇಲಾಖೆ ನಿಗಾ ವಹಿಸುತ್ತಿರುವಂತಹ ಹಲವು ಕಾರಣಗಳಿಂದಲೂ ವಹಿವಾಟಿನ ಮೇಲೆ ಪರಿಣಾಮ ಬೀರಿವೆ’ ಎಂದು ಶಿವಕುಮಾರ್‌ ವಿಶ್ಲೇಷಿಸಿದರು.

‘ಸಣ್ಣ ಪ್ರಮಾಣದ ವಹಿವಾಟು ನಡೆಸುವ ವ್ಯಾಪಾರಿಗಳಿಗೆ ಮೂರು ತಿಂಗಳ ಒಳಗೆ ರಿಟರ್ನ್‌ ಫೈಲ್‌ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ಇದರಿಂದಾಗಿ ಅವರ ಬಳಿ ವ್ಯಾಪಾರ ಮಾಡಿದ ಬಿಲ್‌ನ ದಾಖಲೆ ಅಪ್‌ಡೇಟ್‌ ಆಗಿರುವುದಿಲ್ಲ. ಅವರೊಂದಿಗೆ ವ್ಯವಹಾರ ನಡೆಸುವ ದೊಡ್ಡ ವ್ಯಾಪಾರಿಗಳ ಬಿಲ್‌ಗಳನ್ನು ತಪಾಸಣೆ ಮಾಡುವಾಗ ಸಮಸ್ಯೆ ಎದುರಾಗುವ ಸಾಧ್ಯತೆ ಇದೆ. ಸಂಪೂರ್ಣ ಸಿದ್ಧತೆ ಮಾಡಿಕೊಳ್ಳದೇ ಜಾರಿಗೊಳಿಸಿದ್ದರಿಂದ ನಿಯಮಾವಳಿಗಳನ್ನು ಪಾಲಿಸುವುದು ಸ್ವಲ್ಪ ಕಷ್ಟವಾಗುತ್ತಿದೆ’ ಎಂಬುದು ಅವರ ಅನುಭವದ ಮಾತು.

‘ನೂತನ ವ್ಯವಸ್ಥೆಯಲ್ಲಿ ವ್ಯಾಪಾರಸ್ಥರ ಹೊಣೆಗಾರಿಕೆ (ಅಕೌಂಟೆಬಿಲಿಟಿ) ಹೆಚ್ಚಾಗಿದೆ. ಇದರಲ್ಲಿ ಪ್ರತಿಯೊಂದಕ್ಕೂ ಸಮರ್ಪಕವಾಗಿ ದಾಖಲೆ ಇಡಬೇಕು. ಜಿ.ಎಸ್‌.ಟಿ. ಉದ್ದೇಶ ಒಳ್ಳೆಯದಿದೆ. ಸರಿಯಾದ ಮಾರ್ಗದಲ್ಲಿ ವ್ಯಾಪಾರ ಮಾಡುವವರಿಗೆ ಈ ವ್ಯವಸ್ಥೆ ಖುಷಿ ತಂದಿದೆ. ‘ವ್ಯಾಟ್‌’ ಇದ್ದಾಗ ರೆಡಿಮೇಡ್‌ ಬಟ್ಟೆಯ ಮೇಲೆ ಶೇ 5.5 ತೆರಿಗೆ ವಿಧಿಸಲಾಗುತ್ತಿತ್ತು. ಈಗ ಶೇ 5 ಹಾಕಲಾಗುತ್ತಿದೆ. ₹ 999ಕ್ಕಿಂತಲೂ ಹೆಚ್ಚಿನ ಬೆಲೆಯ ಬಟ್ಟೆಗಳಿಗೆ ಶೇ 12 ಜಿಎಸ್‌ಟಿ ಹಾಕಲಾಗುತ್ತಿದೆ. ಸ್ವಲ್ಪ ದುಬಾರಿ ಬಟ್ಟೆ ಖರೀದಿಸಲು ಗ್ರಾಹಕರು ಹಿಂದೇಟು ಹಾಕುತ್ತಿದ್ದಾರೆ. ಈ ಸ್ಲ್ಯಾಬ್‌ ತೆಗೆದುಹಾಕಿದರೆ ಗ್ರಾಹಕರಿಗೆ ಹಾಗೂ ವ್ಯಾಪಾರಸ್ಥರಿಗೂ ಅನುಕೂಲವಾಗಲಿದೆ’ ಎನ್ನುತ್ತಾರೆ ಮಂಡಿಪೇಟೆಯ ವಾಸವಿ ಗಾರ್ಮೆಂಟ್‌ನ ಮಾಲೀಕರಲ್ಲೊಬ್ಬರಾದ ರಾಘವೇಂದ್ರ ಉಮಾಕಾಂತ ಖಟಾವಕರ್‌.

‘ಜಿಎಸ್‌ಟಿಯಲ್ಲಿ ನಾವು ಪ್ರತಿ ತಿಂಗಳು ರಿಟರ್ನ್‌ ಅನ್ನು ಆನ್‌ಲೈನ್‌ನಲ್ಲಿ ಫೈಲ್‌ ಮಾಡಬೇಕಾಗಿದೆ. ಇದರಿಂದಾಗಿ ಅನಿವಾರ್ಯವಾಗಿ ಲೆಕ್ಕಪರಿಶೋಧಕರನ್ನು ಅವಲಂಬಿಸಬೇಕಾಗಿದೆ. ಇದನ್ನು ನಾವೇ ನೋಡಿಕೊಳ್ಳಲು ಹೋದರೆ ವಹಿವಾಟಿನ ಮೇಲೆ ಹೆಚ್ಚು ಗಮನ ನೀಡಲು ಸಾಧ್ಯವಾಗುವುದಿಲ್ಲ. ಜಿಎಸ್‌ಟಿ ಬಂದ ಮೇಲೆ ಲೆಕ್ಕಪರಿಶೋಧಕರ ಶುಲ್ಕವೂ ಹೆಚ್ಚಾಗಿದೆ. ಅದರಲ್ಲೂ ಹೊಸದಾಗಿ ವ್ಯಾಪಾರ ಆರಂಭಿಸಿದವರಿಗೆ ಈ ವ್ಯವಸ್ಥೆಯಲ್ಲಿ ಹೆಚ್ಚಿನ ತೊಂದರೆ ಆಗುತ್ತಿದೆ’ ಎಂದು ರಾಘವೇಂದ್ರ ತಮ್ಮ ಅನುಭವ ಹಂಚಿಕೊಂಡರು.

‘ಹೊಸ ವ್ಯವಸ್ಥೆ ಹೊಣೆಗಾರಿಕೆಯನ್ನು ಹೆಚ್ಚಿಸಿದ್ದು, ವ್ಯಾಪಾರದ ದೃಷ್ಟಿಯಿಂದ ಇದು ಒಳ್ಳೆಯದು. ಮೊದಲು ಬೇರೆ ಬೇರೆ ರಾಜ್ಯಗಳಲ್ಲಿ ಪ್ರತ್ಯೇಕವಾಗಿ ತೆರಿಗೆ ಪಾವತಿಸುವುದರಿಂದ ಬಟ್ಟೆಗಳ ಸಾಗಾಟಕ್ಕೆ ತೊಂದರೆಯಾಗುತ್ತಿತ್ತು. ಜಿಎಸ್‌ಟಿ ಬಂದ ಬಳಿಕ ಸರಕು ವಹಿವಾಟು ನಡೆಸಲು ಅನುಕೂಲವಾಗಿದೆ’ ಎಂಬುದು ಚಾಮರಾಜಪೇಟೆಯ ‘ಆಶಾ ದೀಪ’ ಬಟ್ಟೆ ಅಂಗಡಿ ಮಾಲೀಕ ಮಹೇಂದ್ರ ತುಲಸಿಯಾನ್‌ ಅಭಿಪ್ರಾಯ.

‘ಮೊದಲು ಸೀರೆ ಹಾಗೂ ಬಟ್ಟೆ ಮೇಲೆ ತೆರಿಗೆ ವಿಧಿಸುತ್ತಿರಲಿಲ್ಲ. ಸಿದ್ಧ ಉಡುಪುಗಳ ಮೇಲೆ ಶೇ 5.5 ವ್ಯಾಟ್‌ ವಿಧಿಸಲಾಗುತ್ತಿತ್ತು. ಈಗ ಎಲ್ಲ ವಿಧಗಳ ಬಟ್ಟೆಗಳ ಮೇಲೂ ಕನಿಷ್ಠ ಶೇ 5 ಜಿಎಸ್‌ಟಿ ಹಾಕಲಾಗುತ್ತಿದೆ. ಅಂಗಿ ಹೊಲಿಸಲು ಅರಿವೆ ಖರೀದಿಸಿದರೂ ಶೇ 5ರಷ್ಟು ತೆರಿಗೆ ಕೊಡುವುದು ಅನಿವಾರ್ಯ. ₹ 999ಗಿಂತ ಹೆಚ್ಚಿನ ಬೆಲೆಯ ಬಟ್ಟೆಗಳ ಮೇಲೆ ಶೇ 12 ತೆರಿಗೆ ವಿಧಿಸಿರುವುದು ಜನಸಾಮಾನ್ಯರಿಗೆ ಹೊರೆಯಾಗುತ್ತಿದೆ’ ಎಂಬುದು ಬಟ್ಟೆ ಖರೀದಿಸಲು ಬಂದಿದ್ದ ಗ್ರಾಹಕ ವಸಂತ ಅವರ ವಾದ.

ವಾಮಮಾರ್ಗಕ್ಕೆ ಎಡೆ ಮಾಡಿಕೊಟ್ಟ ಸ್ಲ್ಯಾಬ್‌

ದುಬಾರಿ ಬೆಲೆಯ ಬಟ್ಟೆಗೆ ಹೆಚ್ಚಿನ ತೆರಿಗೆ ವಿಧಿಸುವ ಸ್ಲ್ಯಾಬ್‌ ಮಾಡಿರುವುದು ತೆರಿಗೆ ಕಡಿಮೆ ಮಾಡಿಕೊಳ್ಳಲು ವಾಮಮಾರ್ಗಕ್ಕೆ ಎಡೆಮಾಡಿಕೊಟ್ಟಿದೆ.

₹ 999ರ ವರೆಗಿನ ಬಟ್ಟೆಗೆ ಶೇ 5 ತೆರಿಗೆ ಹಾಗೂ ಅದಕ್ಕಿಂತ ಹೆಚ್ಚಿನ ಬೆಲೆಯ ಬಟ್ಟೆಗಳಿಗೆ ₹ 12 ತೆರಿಗೆ ವಿಧಿಸಲಾಗುತ್ತಿದೆ. ಈ ರೀತಿ ಸ್ಲ್ಯಾಬ್‌ ಮಾಡಿರುವುದರಿಂದ ಈಗ ₹ 1,000 ಬೆಲೆಯ ಉಡುಪಿಗೆ ₹ 120 ಜಿ.ಎಸ್‌.ಟಿ ಕಟ್ಟಬೇಕಾಗುತ್ತಿದೆ. ಇದಕ್ಕೆ ಗ್ರಾಹಕರು ಆಕ್ಷೇಪವನ್ನೂ ವ್ಯಕ್ತಪಡಿಸುತ್ತಿದ್ದಾರೆ. ಜೊತೆಗೆ ವ್ಯಾಪಾರಿಗಳಿಗೆ ಸಿಗುವ ಲಾಭಾಂಶದಲ್ಲೂ ಕಡಿಮೆಯಾಗುತ್ತಿದೆ. ಇದಕ್ಕೆ ಪರ್ಯಾಯ ಮಾರ್ಗ ಕಂಡುಕೊಂಡಿರುವ ಕೆಲವು ವ್ಯಾಪಾರಿಗಳು, ಬಿಲ್‌ ಹಣವನ್ನು ವಿಂಗಡಿಸುತ್ತಿದ್ದಾರೆ. ಉದಾಹರಣೆಗೆ ಒಂದು ಚೂಡಿದಾರವನ್ನೇ ಟಾಪ್‌ ಹಾಗೂ ಬಾಟಮ್‌ಗೆ ಪ್ರತ್ಯೇಕ ದರ ನಿಗದಿಗೊಳಿಸಿ ₹ 999ಕ್ಕಿಂತ ಕಡಿಮೆ ಬೆಲೆ ತೋರಿಸುತ್ತಿದ್ದಾರೆ. ಈ ಮೂಲಕ ತೆರಿಗೆ ಕಳ್ಳತನ ಮಾಡಲಾಗುತ್ತಿದೆ ಎಂದು ವ್ಯಾಪಾರಿಯೊಬ್ಬರು ಉದ್ಯಮದಲ್ಲಿನ ಒಳಹುಗಳನ್ನು ತೆರೆದಿಟ್ಟರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !