ಶೌಚಾಲಯಕ್ಕಿಲ್ಲಿ ಬೀಗ...ಬಯಲಿಗೆ ಓಡು ಬೇಗ: ಇದು ದಾವಣೆಗೆರೆಯ ದುಸ್ಥಿತಿ

***

ಸಾರ್ವಜನಿಕರ ಪ್ರತಿಕ್ರಿಯೆಗಳು...

ಇಡೀ ಎಪಿಎಂಸಿ ಆವರಣದಲ್ಲಿ ಎರಡು ಶೌಚಾಲಯಗಳಿದ್ದು, ಒಂದನ್ನು ಮುಚ್ಚಲಾಗಿದೆ. ಬೆಳಿಗ್ಗೆಯಿಂದ ಸಂಜೆತನಕ ವ್ಯಾಪಾರ ಮಾಡುತ್ತೇವೆ. ನಾಲ್ಕೈದು ಬಾರಿ ಹೋಗಬೇಕೆಂದರೆ ಒಂದು ಸಲಕ್ಕೆ ₹5 ರಂತೆ ₹25 ನೀಡಬೇಕು. ವ್ಯಾಪಾರ ಮಾಡಿ ಜೀವನ ನಡೆಸುವುದೇ ಕಷ್ಟವಾಗಿರುವ ಕಾರಣ ಕೆಲವರು ಬಯಲಿಗೇ ಹೋಗುತ್ತಾರೆ. ಇರುವ ಶೌಚಾಲಯದ ಮುಂದೆ ಪುರುಷರು ಬೀಡಿ, ಸಿಗರೇಟು ಸೇದಿಕೊಂಡು ನಿಂತಿರುತ್ತಾರೆ. ಮಹಿಳೆಯರ ವಿಭಾಗಕ್ಕೆ ಅಡ್ಡಲಾಗಿ ಪರದೆಯೂ ಇಲ್ಲ. ಹೋಗಿಬರಲು ಮುಜುಗರವಾಗುತ್ತದೆ. ಮುಚ್ಚಿರುವ ಶೌಚಾಲಯವನ್ನು ತೆರೆಸಿ ಮಹಿಳೆಯರಿಗೆ ಮೀಸಲಿರಿಸಿದರೆ ಒಳ್ಳೆಯದು.

–ಗಂಗಮ್ಮ, ತರಕಾರಿ ವ್ಯಾಪಾರಿ, ಎಪಿಎಂಸಿ ಆವರಣ

ಸ್ಮಾರ್ಟ್‌ಸಿಟಿ ಯೋಜನೆ ಅಡಿ ಆರಂಭದಲ್ಲಿ ಕೆಲ ಉದ್ಯಾನಗಳಲ್ಲಿ ಇ–ಶೌಚಾಲಯಗಳನ್ನು ನಿರ್ಮಿಸಲಾಯಿತು. ಸಾರ್ವಜನಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಬಯಲು ಶೌಚವನ್ನು ಮುಕ್ತಗೊಳಿಸಲು ನಗರದ ಜನಸಂದಣಿ ಪ್ರದೇಶಗಳಲ್ಲಿ ಇ–ಶೌಚಾಲಯಗಳನ್ನು ನಿರ್ಮಿಸುವ ಕಾಮಗಾರಿ ಪ್ರಗತಿಯಲ್ಲಿದೆ.

–ಕೆ.ಎಂ. ಗುರುಪಾದಯ್ಯ, ಕಾರ್ಯನಿರ್ವಾಹಕ ಎಂಜಿನಿಯರ್‌, ಸ್ಮಾರ್ಟ್‌ಸಿಟಿ

ಸಮುದಾಯ ಶೌಚಾಲಯ ನಿರ್ಮಿಸಿ ಮೂರು ವರ್ಷವಾದರೂ, ಸಾರ್ವಜನಿಕರ ಉಪಯೋಗಕ್ಕೆ ನೀಡದೆ ಬೀಗ ಹಾಕಲಾಗಿದೆ. ಆದಕಾರಣ ಇಲ್ಲಿನ ರಾಜಕಾಲುವೆ ಇಲ್ಲವೇ ಬಂದ್‌ ಆಗಿರುವ ರೈಸ್‌ ಮಿಲ್‌ ಆವರಣಕ್ಕೆ ನಿತ್ಯಕರ್ಮ ಮುಗಿಸಲು ತೆರಳಬೇಕು. ಮಿಲ್‌ ಜಾಗವನ್ನು ನಿವೇಶನವಾಗಿಸಿದರೆ ಎಲ್ಲಿ ಹೋಗಬೇಕು.? ಗರ್ಭಿಣಿಯರು, ಬಾಣಂತಿಯರು ದೂರ ಹೋಗಲು ಸಾಧ್ಯವಾಗದೆ ಚರಂಡಿ ಮೇಲೆಯೇ ಕೂರುತ್ತಿದ್ದಾರೆ. ಪರಿಣಾಮವಾಗಿ ಅನಾರೋಗ್ಯ ಸಮಸ್ಯೆ ಎದುರಿಸುವಂತಾಗಿದೆ. ನೀರಿನ ವ್ಯವಸ್ಥೆ ಉತ್ತಮವಾಗಿದ್ದು ಸಾರ್ವಜನಿಕರ ಉಪಯೋಗಕ್ಕೆ ನೀಡಲು ಅಧಿಕಾರಿಗಳು ಕ್ರಮ ಕೈಗೊಳ್ಳಬೇಕು.

–ಎಚ್‌.ವಿ. ಪ್ರಭುಲಿಂಗಪ್ಪ, ಎಚ್‌.ಕೆ. ನಗರ ನಿವಾಸಿ

ಶೌಚಾಲಯವಿಲ್ಲದವರು ಮುಂಜಾನೆ ಇಲ್ಲವೇ ಕತ್ತಲಾದ ಮೇಲೆ ಬಯಲಿಗೆ ತೆರಳಬೇಕಾದ ಸ್ಥಿತಿ ಇದೆ. ಹೀಗೆ ತೆರಳಿದಾಗ ಹೆಣ್ಣಮಕ್ಕಳು ಪುಂಡರಿಂದ ತೊಂದರೆಗೊಳಗಾದ ಸಂದರ್ಭಗಳು ಹಲವು. ಗರ್ಭಿಣಿಯೊಬ್ಬರು ಶೌಚಕ್ಕೆ ತೆರಳಿದ್ದಾಗ ಹೆರಿಗೆ ನೋವು ಕಾಣಿಸಿಕೊಂಡು ಅಲ್ಲಿಯೇ ಹೆರಿಗೆಯಾಗಿ ಮಗು ತೀರಿಕೊಂಡ ಉದಾಹರಣೆ ಇದೆ. ಸಮುದಾಯ ಶೌಚಾಲಯವಿದ್ದರೂ ಹದಿನೈದು ವರ್ಷಗಳಿಂದ ಬೀಗ ಜಡಿಯಲಾಗಿದೆ. ಸುತ್ತಲೂ ಕೊಳಚೆ ತುಂಬಿ ಪಾಳು ಬಿದ್ದಿದೆ. ನೀರಿನ ವ್ಯವಸ್ಥೆ ಕಲ್ಪಿಸಿ, ಸ್ಥಳೀಯರಿಗೆ ನಿರ್ವಹಣೆ ಜವಾಬ್ದಾರಿ ನೀಡಿದರೆ ಅನುಕೂಲವಾಗುತ್ತದೆ. ಕಾಯಿಲೆಗಳಿಗೆ ತುತ್ತಾಗುವುದೂ ತಪ್ಪುತ್ತದೆ. ‌

–ಬಿಬಿಜಾನ್‌, ಬಾಷಾನಗರ 2ನೇ ಕ್ರಾಸ್‌

ಈ ಹಿಂದೆ ಬಯಲು ಶೌಚಕ್ಕೆ ತೆರಳಿದ್ದ ಇಲ್ಲಿನ ಹೆಣ್ಣುಮಗಳೊಬ್ಬಳ ಮೇಲೆ ಅತ್ಯಾಚಾರವಾಯಿತು. ಕೊನೆಗೆ ಆಕೆ ಮಾನಸಿಕ ಸ್ಥಿಮಿತ ಕಳೆದುಕೊಂಡು ತೀರಿಕೊಂಡಳು. ಈಗಲೂ ಬಯಲಿಗೇ ತೆರಳಬೇಕಾದ ಸ್ಥಿತಿ ಇದೆ. ಪಾಲಿಕೆ, ವಿಧಾನಸಭೆ, ಲೋಕಸಭೆ ಚುನಾವಣೆಗಳಲ್ಲಿ ಕೊಳೆಗೇರಿಗಳಿಗೆ ಭೇಟಿ ನೀಡುವ ನಾಯಕರು ನಂತರದಲ್ಲಿ ಈಕಡೆ ತಿರುಗಿಯೂ ನೋಡುವುದಿಲ್ಲ. ಇಲ್ಲಿನ ಸಮುದಾಯ ಶೌಚಾಲದಲ್ಲಿ ಜಿಮ್‌ ನಡೆಸುತ್ತಿದ್ದು, ಅದನ್ನು ತೆರವುಗೊಳಿಸಿ ಮಹಿಳೆಯರ ಉಪಯೋಗಕ್ಕೆ ನೀಡಬೇಕು.

–ಶಾಹಿನಾ ಬೇಗಂ, ಶಿವಾನಗರ

ರಾಜಕಾಲುವೆ ನಿರ್ಮಾಣಕ್ಕಾಗಿ ಇಲ್ಲಿನ ಶೌಚಾಲಯವನ್ನು ಕೆಡವಿದ್ದರಿಂದ ಇಲ್ಲಿನ ಬಹುತೇಕರು ಬಯಲಿಗೆ ತೆರಳುತ್ತಿದ್ದೇವೆ. ಕಳೆದ ಮೂರು ವರ್ಷಗಳಿಂದ ಕಾಮಗಾರಿ ನಡೆಸುತ್ತಿದ್ದು, ತಿರುಗಾಡುವುದೂ ಕಷ್ಟವಾಗಿದೆ. ದೊಡ್ಡ ದೊಡ್ಡ ನಾಯಕರು ನಮ್ಮಂತಹವರು ವಾಸಿಸುವ ಪ್ರದೇಶಗಳಿಗೆ ಭೇಟಿ ನೀಡುವುದಿಲ್ಲ. ಹಾಗಾಗಿ ನಮ್ಮ ಕಷ್ಟ ಯಾರಿಗೂ ಗೊತ್ತಾಗುವುದಿಲ್ಲ. ಹೊಸ ದಾವಣಗೆರೆಯಲ್ಲದೇ ನಮ್ಮ ಪ್ರದೇಶವನ್ನೂ ಸ್ಮಾರ್ಟ್‌ ಮಾಡಲು ಕ್ರಮ ಕೈಗೊಳ್ಳಿ.

–ರತ್ನಮ್ಮ, ಕೊರಚರ ಕಾಲೊನಿ

ನಮ್ಮ ಕೇರಿಯ ಪ್ರತಿಮನೆಯಲ್ಲಿ ಶೌಚಾಲಯವಿರುವ ಕಾರಣ ಯಾರೂ ಸಮುದಾಯ ಶೌಚಾಲಯ ಬಳಸುವುದಿಲ್ಲ. ಆದರೆ, ಸುತ್ತಮುತ್ತಲಿನವರು ಇಲ್ಲಿಗೆ ಬರುತ್ತಾರೆ. ನೀರಿನ ವ್ಯವಸ್ಥೆ ಇಲ್ಲದ ಕಾರಣ ಚೊಂಬಿನಲ್ಲಿ ನೀರು ತಂದು ಗಲೀಜು ಮಾಡಿ ಹೋಗುತ್ತಾರೆ. ಹೇಳುವವರು ಕೇಳುವವರು ಯಾರೂ ಇಲ್ಲದಾಗಿದೆ. ಗಬ್ಬು ವಾಸನೆಯಿಂದಾಗಿ ಮನೆಯಲ್ಲಿರುವುದೂ ಕಷ್ಟವಾಗಿದೆ. ಶೌಚಾಲಯ ನಿರ್ವಹಣೆಗೆ ಯಾರನ್ನಾದರೂ ನೇಮಿಸಲಿ ಇಲ್ಲವೇ ತೆಗೆದುಹಾಕಲಿ.

–ನೂರ್‌ಜಾನ್‌ಬಿ, ಮುದ್ದಾಭೋವಿ ಕಾಲೊನಿ, ಬೇತೂರ್‌ ರಸ್ತೆ

ಸ್ವಚ್ಛ ಭಾರತ್‌ ಯೋಜನೆ ಅಡಿ ಶೌಚಾಲಯವಿಲ್ಲದವರಿಗೆ ಶೌಚಾಲಯ ಕಟ್ಟಿಸಿಕೊಡಲು ಸ್ಕೋಡ್‌ವೇಸ್‌ ಎಂಬ ಸ್ವಯಂ ಸೇವಾ ಸಂಸ್ಥೆಗೆ ಜವಾಬ್ದಾರಿ ನೀಡಲಾಗಿತ್ತು. ಆದರೆ, ಕೆಲ ಕೊಳೆಗೇರಿಗಳಲ್ಲಿ ಮೊದಲ ಕಂತಿನ ಹಣ ಬಿಡುಗಡೆಯಾಗಿದ್ದು, ಮತ್ತೆ ಹಣ ಬಿಡುಗಡೆಯಾಗಿಲ್ಲ. ಕೆಲವರು ಕೈಯಿಂದ ಹಣ ಹಾಕಿ ಪೂರ್ಣಗೊಳಿಸಿದ್ದಾರೆ. ಸಾಧ್ಯವಾಗದವರು ಹಾಗೇ ಬಿಟ್ಟಿದ್ದಾರೆ. ಇರುವ ಶೌಚಾಲಯಗಳೂ ಮೂಲಸೌಕರ್ಯಗಳ ಕೊರತೆ ಇಲ್ಲವೇ ನಿರ್ವಹಣೆ ಇಲ್ಲದೆ ಪಾಳುಬಿದ್ದಿವೆ. ಮಹಿಳೆಯರು ಬಹಿರ್ದೆಸೆಗೆ ತೆರಳಿದಾಗ ನಾನಾ ಸಮಸ್ಯೆಗಳಿಗೆ ಗುರಿಯಾಗುತ್ತಿದ್ದಾರೆ.

–ರೇಣುಕಾ ಎಲ್ಲಮ್ಮ ಜಿ. ಹಾವೇರಿ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ, ಸ್ಲಂ ಜನಾಂದೋಲನ ಕರ್ನಾಟಕ

ಸ್ವಚ್ಛ ಭಾರತ್‌ ಯೋಜನೆ ಅಡಿ ಸಮೀಕ್ಷೆ ಮೂಲಕ ಶೌಚಾಲಯ ಇಲ್ಲದವರಿಗೆ ಶೌಚಾಲಯಗಳನ್ನು ನಿರ್ಮಿಸಿಕೊಡಲಾಗಿದೆ. 60 ಜನರಿಗೆ ಮಾತ್ರ ಎರಡನೇ ಕಂತಿನ ಹಣ ಶೀಘ್ರದಲ್ಲಿಯೇ ಬಿಡುಗಡೆಯಾಗಲಿದೆ. ಯಾರಿಗೆ ಶೌಚಾಲಯ ಇಲ್ಲವೋ ಅಂಥಹವರು ಕಟ್ಟಿಸಿಕೊಳ್ಳಲು ಮುಂದೆ ಬಂದರೆ ನೆರವು ನೀಡಲಾಗುವುದು. ಕೊಳೆಗೇರಿಗಳಲ್ಲಿ ಬೀಗ ಹಾಕಲಾಗಿರುವ ಸಮುದಾಯ ಶೌಚಾಲಯಗಳನ್ನು ಸಾರ್ವಜನಿಕರ ಉಪಯೋಗಕ್ಕೆ ನೀಡುವ ಬಗ್ಗೆ ಕ್ರಮ ಕೈಗೊಳ್ಳಲಾಗುವುದು.

–ಮಂಜುನಾಥ ಬಳ್ಳಾರಿ, ಆಯುಕ್ತ, ದಾವಣಗೆರೆ ಮಹಾನಗರ ಪಾಲಿಕೆ.

***

* ನಗರದಲ್ಲಿರುವ ಸಮುದಾಯ ಶೌಚಾಲಯಗಳು –7

*ನಗರದಲ್ಲಿರುವ ಸಾರ್ವಜನಿಕ ಶೌಚಾಲಯಗಳು –30

*ಸ್ಮಾರ್ಟ್‌ಸಿಟಿ ಯೋಜನೆ ಅಡಿ ವಿವಿಧ ಉದ್ಯಾನಗಳಲ್ಲಿ ನಿರ್ಮಿಸಿರುವ ಇ–ಶೌಚಾಲಯಗಳು‌ –9

*ಸ್ಮಾರ್ಟ್‌ಸಿಟಿ ಯೋಜನೆ ಅಡಿ ನಗರದ ಜನಸಂದಣಿ ಪ್ರದೇಶಗಳಲ್ಲಿ ನಿರ್ಮಾಣದ ಹಂತದಲ್ಲಿರುವ ಇ–ಶೌಚಾಲಯಗಳು –37

*ಸ್ವಚ್ಛ ಭಾರತ್‌ ಯೋಜನೆ ಅಡಿ ವಿವಿಧ ಪ್ರದೇಶಗಳಲ್ಲಿ ವೈಯಕ್ತಿಕವಾಗಿ ಇದುವರೆಗೆ ನಿರ್ಮಿಸಿಕೊಡಲಾಗಿರುವ ಶೌಚಾಲಯಗಳು –3669

* ಸ್ವಚ್ಛ ಭಾರತ್‌ ಯೋಜನೆ ಅಡಿ ವೈಯಕ್ತಿಕವಾಗಿ ಶೌಚಾಲಯ ನಿರ್ಮಾಣಕ್ಕಾಗಿ ಕರ್ನಾಟಕ ನಗರಾಭಿವೃದ್ಧಿ ಮತ್ತು ಹಣಕಾಸು ನಿಗಮದಿಂದ ನೀಡಲಾಗುವ ಹಣ –₹10,500

*ಸ್ವಚ್ಛ ಭಾರತ್‌ ಯೋಜನೆ ಅಡಿ ವೈಯಕ್ತಿಕವಾಗಿ ಶೌಚಾಲಯ ನಿರ್ಮಾಣಕ್ಕಾಗಿ ದಾವಣಗೆರೆ ಮಹಾನಗರ ಪಾಲಿಕೆ ವತಿಯಿಂದ ನೀಡಲಾಗುವ ಹಣ –₹3,000