ಕೊಲೆ ಎಂದು ಬೆಸ್ತು ಬೀಳಿಸಿ,ಪೊಲೀಸರನ್ನೇ ದಾರಿ ತಪ್ಪಿಸಿದ್ದ ಯುವಕ ಪೊಲೀಸ್‌ ವಶಕ್ಕೆ

ಯಲ್ಲಮ್ಮ ನಗರದ 12ನೇ ಕ್ರಾಸ್‌ ನಿವಾಸಿ ಪರಶುರಾಮ ಎಂಬ ಯುವಕನೇ ಪೊಲೀಸರನ್ನೂ, ಸಾರ್ವಜನಿಕರನ್ನೂ ಈ ರೀತಿ ದಾರಿ ತಪ್ಪಿಸಿದವನು.

ಶನಿವಾರ ಕತ್ತಲಾಗುತ್ತಿದ್ದಂತೆ ಮಾಧ್ಯಮ, ಪೊಲೀಸರು ಸೇರಿ ಎಲ್ಲರ ಮೊಬೈಲ್‌ಗಳಿಗೆ ಕೊಲೆಯಾದ ಯುವಕನ ಫೋಟೊವೊಂದು ಫಾರ್ವರ್ಡ್‌ ಆಗಿತ್ತು. ರಕ್ತಸಿಕ್ತವಾದ ಮುಖದ ಜತೆಗೆ ಪರುಶರಾಮ ಎಂಬ ಯುವಕನನ್ನು ಕೊಲೆ ಮಾಡಲಾಗಿದೆ ಎಂಬ ಒಕ್ಕಣೆ ಅದರ ಜತೆಗೆ ಇತ್ತು. ಈ ಸಂದೇಶದ ಮೂಲ ಯಾವುದು ಎಂದು ಹುಡುಕಿ ಆ ನಂಬರ್‌ಗೆ ಕರೆ ಮಾಡಿದರೆ ಸ್ವಿಚ್‌ಡ್‌ ಆಫ್‌ ಬರುತ್ತಿತ್ತು. ಅದಕ್ಕೆ ಸರಿಯಾಗಿ ಪರಶುರಾಮ ಕಾಣೆಯಾಗಿದ್ದಾನೆ ಎಂದು ಆತನ ಹೆತ್ತವರು ಬಡಾವಣೆ ಪೊಲೀಸರಿಗೆ ದೂರು ನೀಡಿದ್ದರು.

ಭಾನುವಾರ ಆ ಮೊಬೈಲ್‌ ಆನ್‌ ಆದಾಗ ಪೊಲೀಸರು ಪತ್ತೆ ಹಚ್ಚಿ ಪರಶುರಾಮನನ್ನು ಹಿಡಿದುಕೊಂಡು ಬಂದಿದ್ದಾರೆ. ವಿಚಾರಣೆ ನಡೆಸಿದಾಗ ಆತನೇ ಕುಂಕುಮವನ್ನು ನೀರಲ್ಲಿ ಕಲಸಿ ಹಾಕಿಕೊಂಡಿರುವುದಾಗಿ ಒಪ್ಪಿಕೊಂಡಿದ್ದಾನೆ. ಗೆಳೆಯನೊಬ್ಬನಿಗೆ ಕಳುಹಿಸಿದ್ದೆ. ಆತ ವೈರಲ್‌ ಮಾಡಿದ್ದಾನೆ ಎಂದು ಹೇಳಿಕೊಂಡಿದ್ದಾನೆ.