ಧಾರವಾಡ: ಪಾಳು ಮನೆಯಲ್ಲಿ ವ್ಯಕ್ತಿಯ ಅಸ್ಥಿಪಂಜರ ಪತ್ತೆ

‘ಮಂಗಳವಾರ ಮಧ್ಯಾಹ್ನ ಸ್ಥಳೀಯರು ಕುತೂಹಲದಿಂದ ಪಾಳು ಬಿದ್ದ ಮನೆ ಪರಿಶೀಲಿಸಿದಾಗ, ಕೋಣೆಯೊಂದರಲ್ಲಿ ಹಾಸಿಗೆ ಮೇಲೆ ಅಸ್ಥಿಪಂಜರ ಕಂಡಿದೆ. ಮನೆಯಲ್ಲಿ ಚಂದ್ರಶೇಖರ್ ಎಂಬುವರು ವಾಸವಿದ್ದರು. ಅವರು ಯಾರ ಸಂಪರ್ಕದಲ್ಲೂ ಇರಲಿಲ್ಲ. ಅಸ್ಥಿಪಂಜರ ಅವರದ್ದೇ ಇರಬಹುದು. ಮನೆಯ ಎಲ್ಲಾ ಕಿಟಕಿಗಳು ಮುಚ್ಚಿದ್ದು, ಸುತ್ತಮುತ್ತ ಗಿಡಗಂಟಿ ಬೆಳೆದಿವೆ’ ಎಂದು ಹುಬ್ಬಳ್ಳಿ–ಧಾರವಾಡ ಮಹಾನಗರ ಪೊಲೀಸ್ ಕಮಿಷನರ್ ಶಶಿಕುಮಾರ್ ಬುಧವಾರ ಸುದ್ದಿಗಾರರಿಗೆ ತಿಳಿಸಿದರು.

‘ಅಸ್ಥಿಪಂಜರದ ಪಕ್ಕ ಸೆಲೈನ್‌ ಬಾಟಲಿ ಸಿಕ್ಕಿದೆ. ವ್ಯಕ್ತಿ ಮೃತಪಟ್ಟು ಮೂರು ಅಥವಾ ನಾಲ್ಕು ವರ್ಷ ಆಗಿರಬಹುದು ಎಂದು ವೈದ್ಯರು ತಿಳಿಸಿದ್ದಾರೆ. ಕೋವಿಡ್‌ ಸಂದರ್ಭದಲ್ಲಿ ಸತ್ತಿರಬಹುದೆಂದು ಸ್ಥಳೀಯರು ಅನುಮಾನ ವ್ಯಕ್ತಪಡಿಸಿದ್ದಾರೆ’ ಎಂದರು.