ಹುಬ್ಬಳ್ಳಿ ಕಲಾವಿದರಿಗಿಲ್ಲ ಗ್ಯಾಲರಿ ಭಾಗ್ಯ!

7

ಹುಬ್ಬಳ್ಳಿ ಕಲಾವಿದರಿಗಿಲ್ಲ ಗ್ಯಾಲರಿ ಭಾಗ್ಯ!

Published:
Updated:

ಉತ್ತರ ಕರ್ನಾಟಕದಲ್ಲಿ ನೂರಾರು ಪ್ರಸಿದ್ಧ ಚಿತ್ರ ಕಲಾವಿದರಿದ್ದರೂ ಅವರಿಗೆ ತಮ್ಮ ಕಲಾಕೃತಿಗಳ ಪ್ರದರ್ಶನ ಏರ್ಪಡಿಸಬೇಕು ಎಂದರೆ ಎಲ್ಲಿಯೂ ಸೂಕ್ತವಾದ ಗ್ಯಾಲರಿ ಇಲ್ಲ. ಧಾರವಾಡ ಹೊರತು ಪಡಿಸಿದರೆ ಬೇರೆ ಯಾವ ಭಾಗದಲ್ಲಿಯೂ ಸರ್ಕಾರಿ ಆರ್ಟ್‌ ಗ್ಯಾಲರಿಯೇ ಇಲ್ಲ ಎನ್ನುವುದು ಅಚ್ಚರಿಯಾದರೂ ಸತ್ಯ.

ಹುಬ್ಬಳ್ಳಿ ಮಹಾನಗರದ ಕೇಂದ್ರ ಭಾಗದಲ್ಲಿರುವ ಇಂದಿರಾಗಾಜಿನ ಮನೆಯ ಆವರಣದೊಳಗಿದ್ದ ಎಂ.ವಿ.ಮಿಣಜಗಿ ಹೆಸರಿನ ಕಲಾ ಗ್ಯಾಲರಿ ಈಗ ಪಾಳುಬಿದ್ದಿದೆ. ಇದರಿಂದಾಗಿ ಈ ಭಾಗದ ಕಲಾವಿದರಿಗೆ ಚಿತ್ರಕಲಾ ಪ್ರದರ್ಶನಕ್ಕೆ ವೇದಿಕೆಯೇ ಇಲ್ಲದಂತಾಗಿ ಕಲಾವಿದರ ಹೊಟ್ಟೆಗೆ ಬರೆ ಎಳೆದಂತಾಗಿದೆ. ಎಷ್ಟು ಮಂದಿ ಕಲಾವಿದರು ಬೆಂಗಳೂರಿಗೇ ಹೋಗಿ ಕಲಾಪ್ರದರ್ಶನ ಮಾಡಲು ಸಾಧ್ಯ? ಈ ಗ್ಯಾಲರಿ ಮರಳಿ ಆರಂಭಿಸಲು ಒತ್ತಾಯಿಸಿ ಜನಪ್ರತಿನಿಧಿಗಳಿಗೆ, ಮಹಾನಗರ ಪಾಲಿಕೆಗೆ ಕಲಾವಿದರು ನೀಡಿದ ಮನವಿಗೆ ಸ್ಪಂದನೆಯೇ ಸಿಗುತ್ತಿಲ್ಲ.

ಹೀಗಾಗಿ ಕಲಾವಿದರು ಚಿತ್ರಕಲಾ ಪ್ರದರ್ಶನ ಮಾಡುವುದಾದರೆ ಧಾರವಾಡದ ಸರ್ಕಾರಿ ಕಲಾ ಗ್ಯಾಲರಿಗೆ ಎಡತಾಕಬೇಕು. ಉತ್ತರ ಕರ್ನಾಟಕ ಭಾಗದಲ್ಲಿ ಇದೊಂದೇ ಗ್ಯಾಲರಿಯಾಗಿರುವ ಕಾರಣ ಸಹಜವಾಗಿಯೇ ಬೇಡಿಕೆ ಹೆಚ್ಚು. ಚಿತ್ರಕಲಾ ಪ್ರದರ್ಶನ ಮಾಡುವುದಾದರೆ ಕಾಯುವಂತಾಗಿದೆ.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಪ್ರತಿ ವರ್ಷ ಚಿತ್ರಕಲಾ ಪ್ರದರ್ಶನ ಮಾಡುವ ಕಲಾವಿದರಿಗೆ ಪ್ರೋತ್ಸಾಹ ನೀಡುವ ಉದ್ದೇಶದಿಂದ ಪ್ರತಿ ವರ್ಷ ಒಬ್ಬ ಕಲಾವಿದನಿಗೆ ₹ 50 ಸಾವಿರ ಅನುದಾನ ನೀಡುತ್ತದೆ. ಈ ಅನುದಾನ ಸೂಕ್ತವಾಗಿ ಸದುಪಯೋಗವಾಗಬೇಕು ಅಂದರೆ ಅದಕ್ಕೆ ತಕ್ಕುದಾದ ಗ್ಯಾಲರಿಯ ಅಗತ್ಯವಿದೆ. ಇದಕ್ಕಾಗಿ ಈ ಭಾಗದ ಜನಪ್ರತಿನಿಧಿಗಳ ಬಳಿ ಮನವಿ ಪತ್ರ ಹಿಡಿದುಕೊಂಡು ಬಹಳಷ್ಟು ಕಲಾವಿದರು ಅಲೆದಾಡಿದ್ದಾರೆ. ಆದರೆ ಯಾವುದೇ ಪ್ರಯೋಜನವೂ ಆಗಿಲ್ಲ.

ಇದೇ ವರ್ಷ (2018) ಕಲಾವಿದ ಡಾ.ಎಂ.ವಿ.ಮಿಣಜಗಿ ಅವರ ಜನ್ಮಶತಮಾನೋತ್ಸವವನ್ನು ಹಮ್ಮಿಕೊಳ್ಳಲಾಗಿತ್ತು. ಆ ಸಂದರ್ಭದಲ್ಲಿ, ಈ ಪಾಳುಬಿದ್ದ ಗ್ಯಾಲರಿಯ ಬೀಗ ತೆಗೆಸಿ ಅಲ್ಲಿಯೇ ಸುಮಾರು 30 ಕಲಾವಿದರ ಚಿತ್ರಕಲಾ ಪ್ರದರ್ಶನವನ್ನು ಏರ್ಪಡಿಸಲಾಗಿತ್ತು. ಈ ಸಂದರ್ಭದಲ್ಲಿ ಮೇಯರ್‌ ಅವರನ್ನು ಕೂಡ ಕರೆಯಲಾಗಿತ್ತು. ಅವರು ಈ ವರ್ಷದ ಬಜೆಟ್‌ನಲ್ಲಿ ಸೂಕ್ತವಾದ ಅನುದಾನ ಇಡುವ ಮೂಲಕ ಈ ಕಲಾಗ್ಯಾಲರಿಯನ್ನು ಅಭಿವೃದ್ಧಿಪಡಿಸುವ ಭರವಸೆ ನೀಡಿದ್ದರು. ಹಾಗೆಯೇ ಶಾಸಕ ಜಗದೀಶ ಶೆಟ್ಟರ್‌ ಅವರಿಗೆ ಕೂಡ ಮನವಿ ಸಲ್ಲಿಸಿ ಗ್ಯಾಲರಿ ಅಭಿವೃದ್ಧಿ ಪಡಿಸುವಂತೆ ಒತ್ತಾಯಿಸಲಾಗಿದೆ ಎನ್ನುತ್ತಾರೆ ಕಲಾವಿದ ಜಿ.ಬಿ.ಘಾಟ್ಗೆ.

ಇಂದಿರಾ ಗಾಜಿನ ಮನೆಯ ಆವರಣದ ನಿರ್ವಹಣೆಯನ್ನು ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆ ನೋಡುಕೊಳ್ಳುತ್ತದೆ. ಆದರೆ ಗಾಜಿನ ಮನೆಯಲ್ಲಿರುವ ಈ ಕಲಾಗ್ಯಾಲರಿಯನ್ನು ನಿರ್ವಹಣೆ ಮಾಡಿ ಕಲಾವಿದರಿಗೆ ಉತ್ತೇಜನ ನೀಡಬೇಕು ಎಂಬ ವಿಚಾರದಲ್ಲಿ ಮಾತ್ರ ಪಾಲಿಕೆ ನಿರುತ್ಸಾಹ ತೋರಿಸುತ್ತಿದೆ ಎಂಬ ದೂರು ಕಲಾವಿದರದ್ದು.

‘ಉತ್ತರ ಕರ್ನಾಟಕದ ಪ್ರಮುಖ ವಾಣಿಜ್ಯ ನಗರಿಯಾದ ಹುಬ್ಬಳ್ಳಿಯಲ್ಲಿ ವ್ಯವಸ್ಥಿತವಾದ ಕಲಾಗ್ಯಾಲರಿ ಇದ್ದರೆ ನೂರಾರು ಕಲಾವಿದರಿಗೆ ಅನುಕೂಲವಾಗಲಿದೆ. ಈ ಬಗ್ಗೆ ಮಹಾನಗರ ಪಾಲಿಕೆ ತಕ್ಷಣವೇ ಕಾರ್ಯಪ್ರವೃತ್ತವಾಗಬೇಕು’ ಎಂಬುದು ಈ ಭಾಗದ ಎಲ್ಲ ಕಲಾವಿದರ ಒಕ್ಕೊರಲ ಆಗ್ರಹವಾಗಿದೆ.

ಈ ಹಿಂದೆ ಈ ಗ್ಯಾಲರಿಯಲ್ಲಿ ಸಾಕಷ್ಟು ಕಲಾ ಪ್ರದರ್ಶನ ನಡೆಯದ ಕಾರಣ ಪಾಲಿಕೆ ಕೂಡ ಇದರ ನಿರ್ಹಣೆಗೆ ಹೆಚ್ಚಿನ ಆಸಕ್ತಿ ತೋರಿಸಲಿಲ್ಲ. ಅದೇ ಕಟ್ಟಡದ ಕೆಳ ಅಂತಸ್ತಿನಲ್ಲಿ ಮತ್ಸ್ಯಾಲಯ ನಡೆಯುತ್ತಿದೆ. ಆದರೆ ಗ್ಯಾಲರಿ ಮಾತ್ರ ಮುಚ್ಚಿಕೊಂಡಿದೆ.

ಈಗ ಕಾಲ ಬದಲಾಗಿದೆ. ಕಲಾವಿದರಿಗೆ ಕಲಾ ಪ್ರದರ್ಶನಕ್ಕೆ ಸರ್ಕಾರದಿಂದ ಅನುದಾನ ಕೂಡ ಬರುತ್ತಿದೆ. ಸಾಕಷ್ಟು ಕಲಾವಿದರು ಕಲಾ ಪ್ರದರ್ಶನಕ್ಕೆ ತುದಿಗಾಲಲ್ಲಿ ನಿಂತಿದ್ದಾರೆ.

ಈಗಾಗಲೇ ವಿದ್ಯಾನಗರದಲ್ಲಿ ಹೊಸ ಕಟ್ಟಡವೊಂದರಲ್ಲಿ ಕಲಾಗ್ಯಾಲರಿಯೊಂದನ್ನು ಆರಂಭಿಸುವ ಪ್ರಸ್ತಾವ ಮಹಾನಗರ ಪಾಲಿಕೆಯಿಂದ ಬಂದಿತ್ತು. ಆದರೆ ಅದು ಹಲವು ಕಾರಣಗಳಿಂದ ಸಾಧ್ಯವಾಗಿಲ್ಲ ಎಂಬ ಮಾತೂ ಕಲಾವಲಯದಿಂದ ಕೇಳಿ ಬಂದಿದೆ.

ಚಿತ್ರಗಳು: ಈರಪ್ಪ ನಾಯ್ಕರ್

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !