ಹುಬ್ಬಳ್ಳಿ: ಭಾರತೀಯ ಮಾನಕ ಬ್ಯುರೊ (ಬಿಐಎಸ್) ಮುದ್ರೆಯನ್ನು ದುರ್ಬಳಕೆ ಮಾಡಿಕೊಂಡ ಆರೋಪದ ಮೇಲೆ ನಗರದ ಅಂಗಡಿಯೊಂದರ ಮೇಲೆ ಬಿಐಎಸ್ ಅಧಿಕಾರಿಗಳುಮಂಗಳವಾರ ದಾಳಿ ನಡೆಸಿದ್ದಾರೆ.
ದುರ್ಗದ ಬೈಲ್‌ನ ಗೌಳಿ ಗಲ್ಲಿಯ ಗುಡಿ ಕಾಂಪ್ಲೆಕ್ಸ್‌ನಲ್ಲಿರುವ ಶುಭಂ ಕ್ವಾಲಿಟಿ ಹಾಲ್ಮಾರ್ಕ್ ಸೆಂಟರ್ ಮೇಲೆ ದಾಳಿ ನಡೆಸಿರುವ ಅಧಿಕಾರಿಗಳು, ಬಿಐಎಸ್ ನಕಲಿ ಮುದ್ರೆ ಹೊಂದಿದ 46 ಗ್ರಾಂ ಚಿನ್ನಾಭರಣ ಹಾಗೂ ನಕಲಿ ಮುದ್ರೆ ಹಾಕಲು ಬಳಸುತ್ತಿದ್ದ ಲೇಸರ್ ಮಾರ್ಕಿಂಗ್ ಯಂತ್ರವನ್ನು ವಶಪಡಿಸಿಕೊಂಡಿದ್ದಾರೆ.
ಬಿಐಎಸ್ ಹುಬ್ಬಳ್ಳಿ ಶಾಖೆಯ ಮುಖ್ಯಸ್ಥ ಹಾಗೂ ವಿಜ್ಞಾನಿ (ಇ) ಡಿ.ಪಿ. ಕುಮಾರ್ ಮತ್ತುವಿಜ್ಞಾನಿ (ಡಿ) ರಾಕೇಶ್ ತಣ್ಣೀರು ಮಾರ್ಗದರ್ಶನದಲ್ಲಿ ವಿಜ್ಞಾನಿ (ಬಿ) ಸೌವಿಕ್ ಎಸ್. ಮತ್ತು ಸೆಕ್ಷನ್ ಅಧಿಕಾರಿ ಎ.ಸಿ. ಪೂಜಾರಿ ಕಾರ್ಯಾಚರಣೆ ನಡೆಸಿದ್ದಾರೆ.
ಕಾರ್ಯಾಚರಣೆ ವೇಳೆ ಸ್ಥಳದಲ್ಲಿ ಸಂಗ್ರಹಿಸಿದ ಸಾಕ್ಷ್ಯಗಳನ್ನು ಆಧರಿಸಿ, ಭಾರತೀಯ ಮಾನಕ ಬ್ಯುರೊ ಕಾಯ್ದೆ–2016ರಡಿ ಸೆಂಟರ್ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸಲಾಗುವುದು. ಕಾಯ್ದೆಯಡಿ ತಪ್ಪು ಎಸಗಿದ ಸೆಂಟರ್ ಮಾಲೀಕರಿಗೆ ಜೈಲು ಶಿಕ್ಷೆ ಜತೆಗೆ, ₹1 ಲಕ್ಷದವರೆಗೆ ದಂಡ ವಿಧಿಸಲು ಅವಕಾಶವಿದೆ.
ಕೇಂದ್ರ ಸರ್ಕಾರವು ಹಾಲ್ಮಾರ್ಕ್ ಇರುವ ಚಿನ್ನಾಭರಣಗಳ ಮಾರಾಟವನ್ನು ಜೂನ್‌ ತಿಂಗಳಿಂದ ಕಡ್ಡಾಯ ಮಾಡಿದೆ. ಗ್ರಾಹಕರು BISCARE ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡುತಾವು ಖರೀದಿಸುವ ಚಿನ್ನಾಭರಣದ ಬಿಐಎಸ್ ಮುದ್ರೆಯ ಸತ್ಯಾಸತ್ಯತೆಯನ್ನು ಪರಿಶೀಲಿಸಬಹುದಾಗಿದೆ. ಆ್ಯಪ್ ಅಥವಾ ಗ್ರಾಹಕರ ವ್ಯವಹಾರಗಳ ಸಚಿವಾಲಯದ ಜಾಲತಾಣದ ಮೂಲಕ ದೂರು ಕೂಡ ಸಲ್ಲಿಸಬಹುದಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.
ಲ್ಯಾಪ್‌ಟಾಪ್ ಬ್ಯಾಗ್ ಕಳ್ಳತನ
ಹುಬ್ಬಳ್ಳಿ:ಬಸ್‌ನಲ್ಲಿ ಪ್ರಯಾಣಿಸುತ್ತಿದ್ದರೂಪೇಶಕುಮಾರ್ ಎಂಬುವರ ಲ್ಯಾಪ್‌ಟಾಪ್, ಔಷಧ ಮತ್ತಿತರ ವಸ್ತುಗಳಿದ್ದ ಬ್ಯಾಗ್ ಅನ್ನು ಕಳ್ಳರು ಕದ್ದಿರುವ ಘಟನೆ ಗೋಕುಲ ರಸ್ತೆಯ ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣದಲ್ಲಿ ಇತ್ತೀಚೆಗೆ ನಡೆದಿದೆ.
ಕಾರ್ಯನಿಮಿತ್ತ ನಗರಕ್ಕೆ ಬಂದಿದ್ದ ರೂಪೇಶಕುಮಾರ್ ಅವರು, ಕೆಲಸ ಮುಗಿಸಿಕೊಂಡು ಹಾನಗಲ್‌ಗೆ ತೆರಳಲು ಬಸ್ ಹತ್ತಿದ್ದರು. ಕಿಟಕಿ ಪಕ್ಕ ಲ್ಯಾಪ್‌ಟಾಪ್ ಇದ್ದ ಬ್ಯಾಗ್ ಇಟ್ಟು, ಮೊಬೈಲ್‌ನಲ್ಲಿ ಸಹೋದ್ಯೋಗಿ ಜತೆ ಅವರು ಮಾತನಾಡುತ್ತಿದ್ದಾಗ ಬ್ಯಾಗ್ ಕಳ್ಳತನವಾಗಿದೆ. ಗೋಕುಲ ರಸ್ತೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
