ಹುಬ್ಬಳ್ಳಿ: ಹುಬ್ಬಳ್ಳಿ– ಧಾರವಾಡ ಪಾಲಿಕೆ ವ್ಯಾಪ್ತಿಯ ಮೇಯರ್‌, ಉಪಮೇಯರ್‌, ಸ್ಥಾಯಿ ಸಮಿತಿ ಕಚೇರಿಗಳು ಹಾಗೂ ವಿರೋಧ ಪಕ್ಷದ ನಾಯಕರ ಕಚೇರಿಗಳ ನವೀಕರಣದ ವೆಚ್ಚ ನೀಡುವಂತೆ ಹಾಗೂ ಬಿಲ್‌ ಬಿಡುಗಡೆಗೆ ಮುನ್ನ ಅಧಿಕಾರಿಗಳ ಸಮಿತಿ ರಚನೆ ಮಾಡುವಂತೆ ಪಾಲಿಕೆ ಸದಸ್ಯ ಮಹ್ಮದ ಇಸ್ಮಾಯಿಲ್‌ ಭದ್ರಾಪುರ ಆಗ್ರಹಿಸಿದ್ದಾರೆ.
ಈ ಸಂಬಂಧ ಹುಬ್ಬಳ್ಳಿ– ಧಾರವಾಡ ಮೇಯರ್‌ ಈರೇಶ ಅಂಚಟಗೇರಿ ಅವರಿಗೆ ಪತ್ರ ಬರೆದಿರುವ ಅವರು, ಪಾಲಿಕೆ ಒಡೆತನದ ಪ್ರಮುಖ ಕಚೇರಿಗಳನ್ನು ಈಗಾಗಲೇ ನವೀಕರಣ ಮಾಡಲಾಗಿದೆ. ಇದೀಗ ಮತ್ತೆ ನವೀಕರಣ ಮಾಡುತ್ತಿರುವುದೇಕೆ? ಇದಕ್ಕೆ ಯಾವ ಅನುದಾನ ನೀಡಲಾಗುತ್ತಿದೆ ಎನ್ನುವ ಮಾಹಿತಿಯನ್ನು ಲಿಖಿತ ರೂಪದಲ್ಲಿ ನೀಡುವಂತೆ ಆಗ್ರಹಿಸಿದ್ದಾರೆ.
ಕಾಮಗಾರಿ ಗುಣಮಟ್ಟದಿಂದ ಕೂಡಿಲ್ಲ. ಹೀಗಾಗಿ, ಗುತ್ತಿಗೆದಾರರಿಗೆ ಬಿಲ್‌ ಬಿಡುಗಡೆ ಮಾಡುವ ಮುನ್ನ ಉನ್ನತ ಮಟ್ಟದ ಅಧಿಕಾರಿಗಳ ಸಮಿತಿ ರಚಿಸ, ವರದಿಯ ಆಧಾರದ ಮೇಲೆ ಬಿಲ್‌ ಮಾಡಬೇಕು ಎಂದಿದ್ದಾರೆ.
