ಶನಿವಾರ, ಮಾರ್ಚ್ 28, 2020
19 °C

ಸೇನಾ ವೃತ್ತಿಯಿಂದ ಮರಳಿದ ಯೋಧನಿಗೆ ಅದ್ಧೂರಿ ಸ್ವಾಗತ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಧಾರವಾಡ: ಬಡತನದಲ್ಲೇ ಶಿಕ್ಷಣ ಪೂರೈಸಿ ದೇಶ ಸೇವೆಗೆ ಹೊರಟುನಿಂತ ಯುವಕನನ್ನು ಹೆಮ್ಮೆಯಿಂದ ಕಳಿಸಿಕೊಟ್ಟಿದ್ದ ತಾಲ್ಲೂಕಿನ ಹೆಬ್ಬಳ್ಳಿ ಗ್ರಾಮ, ಸಾರ್ಥಕ ಸೇವೆ ಪೂರೈಸಿ ಮರಳಿದ ಅದೇ ಸೈನಿಕನನ್ನು ಗುರುವಾರ ಅಷ್ಟೇ ಸಂಭ್ರಮ ಹಾಗೂ ಅಭಿಮಾನದಿಂದ ಬರಮಾಡಿಕೊಂಡಿತು.

ಗ್ರಾಮದ ಬಸವರಾಜ ಗಡಾದ ಅವರು 2001ರಲ್ಲಿ ಬಿ.ಎ. ಕಲಿತು ಭಾರತೀಯ ಸೇನೆ ಸೇರಿದ್ದರು. ಮದ್ರಾಸ್ ರೆಜಿಮೆಂಟ್‌ನಲ್ಲಿ ಹವಾಲ್ದಾರ್ ಆಗಿ ಕರ್ತವ್ಯ ಆರಂಭಿಸಿದ ಇವರು, ಜಮ್ಮು ಕಾಶ್ಮೀರ, ಸಿಯಾಚಿನ್, ಲೇಹ್, ಲಡಾಕ್ ಸೇರಿದಂತೆ ದೇಶದ ವಿವಿಧ ಪ್ರದೇಶಗಳಲ್ಲಿ 19 ವರ್ಷಗಳ ಗಡಿಕಾಯುವ ಕಾಯಕ ಮುಗಿಸಿ ನಿವೃತ್ತಿ ಹೊಂದಿದ ನಂತರ ಗ್ರಾಮಕ್ಕೆ ಮರಳಿದರು.

ತಮ್ಮ ಕರ್ತವ್ಯದಲ್ಲಿ ಜಮ್ಮು ಕಾಶ್ಮೀರದ ಉಗ್ರರೊಂದಿಗೆ ಸೆಣೆಸಾಡಿ ಮೂವರು ಉಗ್ರರನ್ನು ಸದೆಬಡಿದ ಕೀರ್ತಿ ಇವರದ್ದು. ಕುಪ್ವಾಡ ಜಿಲ್ಲೆಯ ಪಂಚಗಾಂವ್‌ ಊರಿನಲ್ಲಿ ಇಬ್ಬರು ಉಗ್ರರು ಹಾಗೂ ನೌಶಾರಾ ಜಿಲ್ಲೆಯಲ್ಲಿ ಒಬ್ಬ ಉಗ್ರನನ್ನು ಬಸವರಾಜ ಹೊಡೆದುರುಳಿಸಿದ್ದನ್ನು ಗ್ರಾಮದ ಜನರು ನೆನೆದು ಕೊಂಡಾಡಿದರು. ಇವರಿಗೆ ಸಂದ ಹೈಆಲ್ಟಿಟ್ಯೂಟ್ ಮೆಡಲ್, ಒಪಿ ರಕ್ಷಕ, ಇವೆನ್ ಮೆಡಲ್, ಸಿ ಕ್ರಾಸಿಂಗ್ ಮೆಡಲ್, ಅರುಣಾಚಲಪ್ರದೇಶ ಮೆಡಲ್‌ಗಳ ಕುರಿತು ಸ್ನೇಹಿತರು ಅಭಿಮಾನದಿಂದ ಹೇಳಿದರು.

ಸಮವಸ್ತ್ರದಲ್ಲಿ ಗ್ರಾಮಕ್ಕೆ ಮರಳಿದ ಬಸವರಾಜ ಅವರ ಸ್ವಾಗತಕ್ಕೆ ಇಡೀ ಗ್ರಾಮವೇ ಸಿಂಗಾರಗೊಂಡಿತ್ತು. ಗ್ರಾಮಕ್ಕೆ ಬಂದ ಇವರು ನೇರವಾಗಿ ಗ್ರಾಮದ ವೀರ ಯೋಧ ಉಮೇಶ ಸವದತ್ತಿ ಅವರ ಸಮಾಧಿಗೆ ಮಾಲಾರ್ಪಣೆ ಮಾಡಿ ಗೌರವ ಸಲ್ಲಿಸಿದರು. ನಂತರ ತೆರೆದ ವಾಹನದಲ್ಲಿ ಇವರ ಅದ್ಧೂರಿ ಮೆರವಣಿಗೆ ನಡೆಯಿತು. ಗ್ರಾಮಕ್ಕೆ ಮರಳಿದ ಯೋಧನಿಗೆ ಗ್ರಾಮಸ್ಥರು ಹಾರ ಹಾಕಿ, ಆರತಿ ಎತ್ತಿ, ಸಿಹಿ ತಿನ್ನಿಸಿ ಬರ ಮಾಡಿಕೊಂಡರು. ಹೆಮ್ಮೆಯ ಯೋಧನಿಗೆ ಸಲ್ಯೂಟ್ ಹೊಡೆದು ಗೌರವ ಸಲ್ಲಿಸಿದರು. ಸಮವಸ್ತ್ರದಲ್ಲಿದ್ದ ಬಸವರಾಜ ಅವರೊಂದಿಗೆ ಸ್ನೇಹಿತರು, ಗ್ರಾಮಸ್ಥರು ಸೆಲ್ಫಿ ತೆಗೆಸಿಕೊಂಡು ಸಂಭ್ರಮಿಸಿದರು.

ಗ್ರಾಮದಲ್ಲಿ ಅಪ್ನಾದೇಶ, ಶಾಲಾ ಮಕ್ಕಳು, ಹೆಬ್ಬಳ್ಳಿ ಗ್ರಾಮದ ಗುರು ಹಿರಿಯರು, ಬಸವರಾಜ ಗಡಾದ ಅವರ ಸ್ನೇಹಿತರ ಬಳಗದ ವತಿಯಿಂದ ಈ ಕಾರ್ಯಕ್ರಮ ಅದ್ಧೂರಿಯಾಗಿ ಹಮ್ಮಿಕೊಳ್ಳಲಾಗಿತ್ತು. ಗ್ರಾಮದ ವಿವಿಧ ಶಾಲೆಗಳ ಎಲ್ಲಾ ವಿದ್ಯಾರ್ಥಿಗಳು ಈ ಕಾರ್ಯಕ್ರಮಕ್ಕೆ ಸಾಕ್ಷಿಯಾದರು. ‘ಭಾರತ ಮಾತಾ ಕೀ ಜೈ’ ಘೋಷಣೆ ಮೊಳಗಿದವು. 

‘ಊರ ಜನರ ಮೆಚ್ಚುಗೆ ಬಗ್ಗೆ ನನಗೆ ಅಭಿಮಾನವಿದೆ’ ಎಂದು ಬಸವರಾಜ ಗಡಾಡ ಸಂತೋಷ ವ್ಯಕ್ತಪಡಿಸಿದರು. ತಮ್ಮ ಪತ್ನಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ಇಡೀ ಕುಟುಂಬ ಸದಸ್ಯರು ಅಭಿಮಾನ ವ್ಯಕ್ತಪಡಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು