ಧಾರವಾಡ| ಕೃಷಿ ವಿವಿ ವಸತಿ ನಿಲಯದಲ್ಲಿ ಯುವಕನ ಶವ ಪತ್ತೆ

ವಿಜಯನಗರ ಜಿಲ್ಲೆಯ ಕೊಟ್ಟೂರ ಮೂಲದ ರೋಹಿತ ಟಿ.ಪಿ. (22) ಆತ್ಮಹತ್ಯೆ ಮಾಡಿಕೊಂಡ ವಿದ್ಯಾರ್ಥಿ. ಇವರು ಕೃಷಿ ವಿಶ್ವವಿದ್ಯಾಲಯದಲ್ಲಿ ಸಮುದಾಯ ವಿಜ್ಞಾನ ಕಾಲೇಜಿನ ಬಿಎಸ್ಸಿ ಕೊನೆಯ ವರ್ಷದಲ್ಲಿ ಓದುತ್ತಿದ್ದರು.

‘ಇವರ ಬಟ್ಟೆಗಳು ಬೈಕ್‌ ಒಂದರ ಮೇಲೆ ಸಿಕ್ಕಿವೆ. ಆತ್ಮಹತ್ಯೆ ಮಾಡಿಕೊಂಡಿರುವ ಶಂಕೆ ಇದೆ. ಈ ಕುರಿತು ತನಿಖೆ ನಡೆಸಲಾಗುತ್ತಿದೆ’ ಎಂದು ಉಪನಗರ ಠಾಣೆ ಪೊಲೀಸರು ತಿಳಿಸಿದ್ದಾರೆ.

ಯುವಕನ ಮೇಲೆ ಹಲ್ಲೆ ನಡೆಸಿದವರ ಬಂಧನ

ಧಾರವಾಡ: ಹಳೆಯ ದ್ವೇಷದ ಹಿನ್ನೆಲೆಯಲ್ಲಿ ‌ಯುವಕನ ಮೇಲೆ‌ ಬಾಟಲಿಗಳಿಂದ ಹಲ್ಲೆ ನಡೆಸಿದ್ದ ಐವರು ದುಷ್ಕರ್ಮಿಗಳನ್ನು ಶಹರ ಠಾಣೆಯ ಪೊಲೀಸರು ಸೋಮವಾರ ಬಂಧಿಸಿದ್ದಾರೆ.

ಇಲ್ಲಿನ ಜಕಣಿ ಬಾವಿ ಬಳಿಯ ಗೌಳಿ ಗಲ್ಲಿಯ ಅಜಯ್ ಪಟಾರೆ ಎಂಬ ಯುವಕನ ಮೇಲೆ ಅದೇ ಬಡಾವಣೆಯ ಓಂಕಾರ ರಾಯಚೂರ ಮತ್ತು ನಾಲ್ವರು ಸಹಚರರು‌ ಹಲ್ಲೆ ನಡೆಸಿದ್ದರು.

ಎಂಟು ದಿನಗಳ ಹಿಂದೆ‌ ನಡೆದ ವಿಚಾರವೊಂದಕ್ಕೆ ಸಂಬಂಧಿಸಿದಂತೆ ಭಾನುವಾರ ರಾತ್ರಿ ಜಕಣಿ ಬಾವಿ ಬಳಿ ಪರಸ್ಪರರಲ್ಲಿ ವಾಗ್ವಾದ ನಡೆದಿತ್ತು. ಈ ವೇಳೆ ಓಂಕಾರ ರಾಯಚೂರ ಸೇರಿದಂತೆ ಐವರು ಯುವಕರು ಅಜಯ್‌ ಮೇಲೆ ಏಕಾಏಕಿ ಬಾಟಲಿಗಳಿಂದ ಹಲ್ಲೆ ನಡೆಸಿದ್ದರು. ಗಾಯಾಳು ಅಜಯ್‌ ಸದ್ಯ ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪ್ರಕರಣ ದಾಖಲಿಸಿಕೊಂಡಿರುವ ಶಹರ‌ ಠಾಣೆಯ ಪೊಲೀಸರು, ಸಿಪಿಐ ಪ್ರಭು ಗಂಗನಹಳ್ಳಿ ನೇತೃತ್ವದಲ್ಲಿ ಆರೋಪಿಗಳನ್ನು ಬಂಧಿಸಿದ್ದಾರೆ.