ಯೋಗೀಶಗೌಡ ಕೊಲೆ: ಅಂದು ಧಾರವಾಡದಲ್ಲಿ ಬೆಳ್ಳಂ ಬೆಳಿಗ್ಗೆ ಝಳಪಿಸಿತ್ತು ಮಾರಕಾಸ್ತ್ರ

ಧಾರವಾಡದ ಸಪ್ತಾಪುರದ ಜಿಮ್ ಒಂದರ ಬಳಿ ಜಿಲ್ಲಾ ಪಂಚಾಯತ್ ಸದಸ್ಯ ಯೋಗೀಶಗೌಡ ಗೌಡರನ್ನು ದುಷ್ಕರ್ಮಿಗಳು ಮಾರಕಾಸ್ತ್ರಗಳಿಂದ ಕೊಚ್ಚಿ ಹತ್ಯೆ ಮಾಡಿದರು.

ಘಟನೆಗೂ ಮುನ್ನ 8 ಬೈಕ್ ಮತ್ತು ಕಪ್ಪು ಕಾರಿನಲ್ಲಿ ಬಂದ ಗುಂಪು ತಲವಾರು, ಮಚ್ಚು ಹಿಡಿದುಕೊಂಡು ಜಿಮ್‌ ಪಕ್ಕದ ರಸ್ತೆಯಲ್ಲಿ ಹೋಗಿದ್ದನ್ನು ಪ್ರತ್ಯಕ್ಷದರ್ಶಿಗಳು ಗಮನಿಸಿದ್ದರು.

ದುಷ್ಕರ್ಮಿಗಳು ಯೋಗೀಶಗೌಡ ಅವರ ತಲೆ, ಕುತ್ತಿಗೆ, ಕೈ ಮತ್ತು ಕಾಲು ಸೇರಿದಂತೆ ದೇಹದ ಒಟ್ಟು 26 ಕಡೆಗಳಲ್ಲಿ ಮಾರಕಾಸ್ತ್ರಗಳಿಂದ ಗಂಭೀರವಾಗಿ ಹಲ್ಲೆ ನಡೆಸಿದ್ದರು.

ಆರೋಪಿಗಳು ಸ್ಥಳದಲ್ಲಿ ಯಾವುದೇ ಸುಳಿವು ಬಿಟ್ಟು ಹೋಗಿರಲಿಲ್ಲ. ಅಂದಿನ ಪೊಲೀಸ್ ಆಯುಕ್ತ ಪಾಂಡುರಂಗ ರಾಣೆ ಅವರು ಘಟನೆಗೆ ಕಾರಣ ಅಸ್ಪಷ್ಟ ಎಂಬುದನ್ನು ಖಚಿತಪಡಿಸಿದ್ದರು.

ಕೊಲೆಯ ಸುದ್ದಿ ಕಾಳ್ಗಿಚ್ಚಿನಂತೆ ಹರಡಿದ್ದರಿಂದ ಸ್ಥಳದಲ್ಲಿ ನೂರಾರು ಜನರು ಜಮಾಯಿಸಿದ್ದರು, ಇದು ಪೊಲೀಸರಿಗೆ ಜನರನ್ನು ನಿಯಂತ್ರಿಸಲು ಸವಾಲಾಗಿ ಪರಿಣಮಿಸಿತ್ತು.