ತುಕ್ಕು ಹಿಡಿದ ಮೇಲ್ಸೇತುವೆ

7
ಸಂಚಾರಕ್ಕೆ ಭಯ ಪಡುತ್ತಿರುವ ಪಾದಚಾರಿಗಳು– ಸಾರ್ವಜನಿಕರ ಆತಂಕ

ತುಕ್ಕು ಹಿಡಿದ ಮೇಲ್ಸೇತುವೆ

Published:
Updated:
ಬಿಡದಿ ಬಳಿ ಬೆಂಗಳೂರು–ಮೈಸೂರು ಹೆದ್ದಾರಿಗೆ ಅಡ್ಡಲಾಗಿ ನಿರ್ಮಿಸಿರುವ ಕಬ್ಬಿಣದ ಮೇಲ್ಸೇತುವೆ

ಬಿಡದಿ (ರಾಮನಗರ): ಬಿಡದಿ ಬಳಿ ಬೆಂಗಳೂರು-–ಮೈಸೂರು ಹೆದ್ದಾರಿಗೆ ಅಡ್ಡಲಾಗಿ ನಿರ್ಮಿಸಿರುವ ಕಬ್ಬಿಣದ ಮೇಲ್ಸೇತುವೆ ಶಿಥಿಲಾವಸ್ಥೆಗೆ ತಲುಪಿದ್ದು, ಸಾರ್ವಜನಿಕರು ಆತಂಕ ವ್ಯಕ್ತಪಡಿಸಿದ್ದಾರೆ.

ಸದಾ ವಾಹನಗಳ ಸಂಚಾರ ದಟ್ಟಣೆಯಿಂದ ಕೂಡಿರುವ ಬೆಂಗಳೂರು–ಮೈಸೂರು ಹೆದ್ದಾರಿಯನ್ನು ಪಾದಚಾರಿಗಳು ದಾಟಲು ಬಿಡದಿ ಪಟ್ಟಣದ ಬಿಎಂಟಿಸಿ ಬಸ್‌ ನಿಲ್ದಾಣದ ಎದುರು ಕಬ್ಬಿಣದ ಮೇಲ್ಸುತೇವೆಯನ್ನು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ವತಿಯಿಂದ ನಿರ್ಮಿಸಲಾಗಿದೆ. ಈ ಮೇಲ್ಸೇತುವೆ ಸೂಕ್ತ ನಿರ್ವಹಣೆಯಿಲ್ಲದೆ ತುಕ್ಕು ಹಿಡಿಯಲಾರಂಭಿಸಿದೆ. ಅಲ್ಲಲ್ಲಿ ರಂಧ್ರಗಳು ಕಂಡುಬಂದಿವೆ. ಹೀಗಾಗಿ ಮೇಲ್ಸೇತುವೆ ಉಪಯೋಗಿಸುವ ಪಾದಚಾರಿಗಳು ಭಯ ಭೀತರಾಗಿ ಓಡಾಡುವ ಸ್ಥಿತಿ ನಿರ್ಮಾಣವಾಗಿದೆ.

ಭಯದಲ್ಲಿ ಪಾದಚಾರಿಗಳು: ಬಿಡದಿಯ ಬಿಎಂಟಿಸಿ ಬಸ್‌ ನಿಲ್ದಾಣದ ಎದುರು ಬೆಂಗಳೂರು-ಮೈಸೂರು ಹೆದ್ದಾರಿಯಿದ್ದು, ನಿತ್ಯ ಪಾದಚಾರಿಗಳು ರಸ್ತೆ ದಾಟಲು ಮೇಲ್ಸೇತುವೆ ಬಳಸುವುದು ಅನಿವಾರ್ಯವಾಗಿದೆ.

ಹೀಗಾಗಿ ರಾಷ್ಟ್ರೀಯ ಹೆದ್ದಾರಿ ನಾಲ್ಕು ಪಥದ ರಸ್ತೆಯನ್ನಾಗಿ ಪರಿವರ್ತಿಸುವಾಗ ಕಬ್ಬಿಣದ ಮೇಲ್ಸೇತುವೆ ನಿರ್ಮಿಸಲಾಗಿದೆ. ಪಾದಚಾರಿಗಳು ಮೇಲ್ಸೇತುವೆ ಉಪಯೋಗಿಸದೆ ಹೆದ್ದಾರಿ ದಾಟುತ್ತಿದ್ದ ಪರಿಣಾಮ ಆಗಾಗ ಅಪಘಾತಗಳು ಸಂಭವಿಸಿ ಸಾವು- ನೋವುಗಳು ಸಂಭವಿಸುತ್ತಿದ್ದವು. ಈ ಅನಾಹುತಗಳನ್ನು ತಪ್ಪಿಸುವ ಸಲುವಾಗಿ ಬಿಡದಿ ಪಟ್ಟಣದಲ್ಲಿ ಸುಮಾರು 100 ಮೀಟರ್‌ನಷ್ಟು ತಂತಿ ಬೇಲಿ ನಿರ್ಮಿಸಸಲಾಗಿದೆ. ಇದರಿಂದಾಗಿ ಪಾದಚಾರಿಗಳು ರಸ್ತೆ ದಾಟಲು ಕಬ್ಬಿಣದ ಮೇಲ್ಸೇತುವೆ ಬಳಕೆ ಮಾಡುತ್ತಾರೆ.

ಶಿಥಿಲಾವಸ್ಥೆ ತಲುಪಿದ ಸೇತುವೆ: ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಸೂಕ್ತ ನಿರ್ವಹಣೆಯಿಲ್ಲದೆ, ಈಗ ಕಬ್ಬಿಣದ ಮೇಲ್ಸೇತುವೆ ಶಿಥಿಲಾವಸ್ಥೆ ತಲುಪಿದೆ. ಸೇತುವೆಯ ಮೆಟ್ಟಿಲುಗಳು ತುಕ್ಕು ಹಿಡಿದು ದೊಡ್ಡ ಪ್ರಮಾಣದ ರಂಧ್ರಗಳಾಗಿ ಮಾರ್ಪಟ್ಟಿವೆ.

ಮೇಲ್ಸೇತುವೆ ಬಳಕೆ ಮಾಡುವ ಪಾದಚಾರಿಗಳು ಸ್ವಲ್ಪ ಎಚ್ಚರ ತಪ್ಪಿದರೂ ಅನಾಹುತ ನಿಶ್ಚಿತ. ಸೇತುವೆಗೆ ಅಳವಡಿಸಿರುವ ಕಬ್ಬಿಣದ ತಗಡುಗಳು ತುಕ್ಕು ಹಿಡಿದು ಹಾಳಾಗುತ್ತಿವೆ. ಅಲ್ಲಲ್ಲಿ ಬಿದ್ದಿರುವ ರಂಧ್ರಗಳು ದಿನೇದಿನೇ ದೊಡ್ಡದಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಆಗಬಹುದಾದ ದುರಂತಕ್ಕೆ ಅಣಿಯಾಗುತ್ತಿವೆ ಎಂಬ ದೂರು ಕೇಳಿಸಿದೆ.

ಮೇಲ್ಸೇತುವೆ ಶಿಥಿಲಾವಸ್ಥೆಗೆ ತಲುಪಿರುವುದರಿಂದ ಹಾಗೂ ಸೇತುವೆ ಏರುವ ಪ್ರವೇಶ ದ್ವಾರದಲ್ಲಿ ಚರಂಡಿ ನಿರ್ಮಾಣಕ್ಕಾಗಿ ದೊಡ್ಡ ಹಳ್ಳವೊಂದನ್ನು ತೆಗೆಯಲಾಗಿದ್ದು, ಕಾಮಗಾರಿ ಪೂರ್ಣಗೊಳ್ಳದೆ ಅರ್ಧಕ್ಕೆ ನಿಂತಿರುವುದರಿಂದ ಹಳ್ಳದಲ್ಲಿ ಕೊಚ್ಚೆ ನೀರು ಶೇಖರಣೆಯಾಗಿ ಗಬ್ಬುನಾರುತ್ತಿದೆ.

ಹೀಗಾಗಿ ಸೇತುವೆ ಬಳಕೆ ಮಾಡಲು ಸಾರ್ವಜನಿಕರು ಹಿಂದೇಟು ಹಾಕುತ್ತಿದ್ದಾರೆ. ಸೇತುವೆ ದುರಸ್ತಿ ಮಾಡುವಂತೆ ಕೆಲವು ಜನರು ಅಧಿಕಾರಿಗಳ ಗಮನ ಸೆಳೆದರೂ ಯಾವ ಪ್ರಯೋಜನವಾಗಿಲ್ಲ ಎಂಬ ದೂರುಗಳು ವ್ಯಕ್ತವಾಗಿವೆ.

ಬಿಡದಿ ಬಸ್‌ ನಿಲ್ದಾಣ ಸಮೀಪ ಪಾದಚಾರಿಗಳಿಗಾಗಿ ನಿರ್ಮಿಸಿರುವ ಕಬ್ಬಿಣದ ಮೇಲ್ಸೇತುವೆ ಸೂಕ್ತ ನಿರ್ವಹಣೆಯಿಲ್ಲದ ಕಾರಣ ತುಕ್ಕು ಹಿಡಿಯಲಾರಂಭಿಸಿದೆ. ಕಳೆದ ಎರಡು ವರ್ಷಗಳ ಹಿಂದೆ ಹೆದ್ದಾರಿ ಪ್ರಾಧಿಕಾರಕ್ಕೆ ಸಂಬಂಧಿಸಿದ ಅಧಿಕಾರಿಯೊಬ್ಬರ ಗಮನ ಸೆಳೆದ ಮೇರೆಗೆ ಸಣ್ಣ-ಪುಟ್ಟ ದುರಸ್ತಿ ಕೈಗೊಂಡು ಸೇತುವೆಗೆ ಬಣ್ಣ ಬಳಿಸಿದ್ದರು. ಅಂದು ಸರಿಯಾಗಿ ದುರಸ್ತಿ ಮಾಡದ ಕಾರಣ ಈಗ ಮತ್ತಷ್ಟು ಶಿಥಿಲಾವಸ್ಥೆ ತಲುಪಿದೆ. ಈ ಬಗ್ಗೆ ಸಂಬಂಧಪಟ್ಟವರು ಪಾದಚಾರಿಗಳ ಸುರಕ್ಷತೆಯಿಂದ ಶೀಘ್ರವೇ ಕ್ರಮ ಕೈಗೊಳ್ಳಬೇಕು ಎಂದು ಪರಮಶಿವಯ್ಯ ತಿಳಿಸಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !