ಗದಗ: ‘ಈಗ ಇರುವ ದೇವರುಗಳೆಲ್ಲರೂ ಮನುಷ್ಯರೇ. ಆದರೆ, ನಾವು ಅವರನ್ನೇ ದೇವರು ಅಂತ ಮಾಡಿಕೊಂಡಿದ್ದೇವೆ. ದೈವ ನರ್ತಕರಿಗೆ ಸರ್ಕಾರ ₹2 ಸಾವಿರ ಮಾಸಾಶನ ಕೊಡುವ ಬದಲು; ಅವರು ದುಡಿದು ತಿನ್ನುವಂತೆ ಮಾಡಬೇಕು’ ಎಂದು ಜನತಾ ಪಕ್ಷದ ರಾಜ್ಯ ಘಟಕದ ಅಧ್ಯಕ್ಷೆ ಡಾ. ಬಿ.ಟಿ.ಲಲಿತಾ ನಾಯಕ್‌ ಹೇಳಿದರು.
ನಗರದಲ್ಲಿ ಭಾನುವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡಿ, ‘ದೈವ ನರ್ತಕರು ದೇವರು ಅಂತ ಹೇಳಿ ₹2 ಸಾವಿರ ಕೊಡುವ ಬದಲು ಅವರು ಘನತೆಯಿಂದ ₹10ರಿಂದ ₹15 ಸಾವಿರ ದುಡಿಯುವಂತೆ ವ್ಯವಸ್ಥೆ ಮಾಡಬೇಕು. ಮಾನವ ಶ್ರಮವನ್ನು ಸರ್ಕಾರ ಬಳಸಿಕೊಳ್ಳಬೇಕು. ಅದು ಬಿಟ್ಟು, ದೇವರ ಹೆಸರು ಹೇಳಿ ಕುಣಿಯುವವರಿಗೆ ಸಾರ್ವಜನಿಕರ ತೆರಿಗೆ ಹಣ ಕೊಡುವುದು ಎಷ್ಟು ಸರಿ’ ಎಂದು ಪ್ರಶ್ನಿಸಿದರು.
‘ಮಂಗಳಮುಖಿಯರು ಗಟ್ಟಿ ಮುಟ್ಟಾಗಿರುತ್ತಾರೆ. ಆದರೆ, ಕೆಲವರು ಅವರಿಗೆ ₹100 ಕೊಟ್ಟು, ₹1 ಅವರಿಂದ ಪಡೆದುಕೊಂಡು ಕಣ್ಣಿಗೆ ಒತ್ತಿಕೊಂಡು, ಜೇಬಿಗೆ ಇಟ್ಟುಕೊಳ್ಳುತ್ತಾರೆ. ಅವರು ದೇವರಿದ್ದಂತೆ, ಆಶೀರ್ವಾದ ಮಾಡುತ್ತಾರೆ ಎಂಬ ಮೂಢನಂಬಿಕೆ ಬಿತ್ತುತ್ತಿದ್ದಾರೆ. ಕೆಲವು ಗಂಡಸರು ಈಗ ಮಂಗಳಮುಖಿಯರ ವೇಷ ಧರಿಸಿ ದುಡ್ಡು ಕೀಳುತ್ತಿದ್ದಾರೆ’ ಎಂದು ದೂರಿದರು.
