ಸರ್ಕಾರದ ಸ್ವಾಧೀನಕ್ಕೆ ಜಿಎಸ್‌ಟಿಎನ್‌?
ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ವ್ಯವಸ್ಥೆಗೆ ಐ.ಟಿ ಮೂಲಸೌಕರ್ಯ ಒದಗಿಸುವ ಬೆನ್ನೆಲುಬು ಆಗಿರುವ ಜಿಎಸ್‌ಟಿ–ನೆಟ್‌ವರ್ಕ್‌ (ಜಿಎಸ್‌ಟಿಎನ್‌) ಅನ್ನು ಸರ್ಕಾರಿ ಸ್ವಾಮ್ಯದ ಕಂಪನಿಯನ್ನಾಗಿ ಪರಿವರ್ತಿಸಲು ಕೇಂದ್ರ ಸರ್ಕಾರ ಆಲೋಚಿಸುತ್ತಿದೆ.
ಸದ್ಯಕ್ಕೆ, ಖಾಸಗಿ ಹಣಕಾಸು ಸಂಸ್ಥೆಗಳು ಜಿಎಸ್‌ಟಿಎನ್‌ನಲ್ಲಿ ಶೇ 51ರಷ್ಟು ಮತ್ತು ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಜತೆಯಾಗಿ ಶೇ 49ರಷ್ಟು ಪಾಲು ಬಂಡವಾಳ ಹೊಂದಿವೆ.
‘ಜಿಎಸ್‌ಟಿಎನ್‌’ನಲ್ಲಿ ಸರ್ಕಾರದ ಪಾಲು ಬಂಡವಾಳವನ್ನು ಹೆಚ್ಚಿಸುವ ಅಥವಾ ಅದನ್ನು ಶೇ 100ರಷ್ಟು ಸರ್ಕಾರಿ ಸ್ವಾಮ್ಯದ ಸಂಸ್ಥೆಯನ್ನಾಗಿ ಪರಿವರ್ತಿಸುವ ಸಾಧ್ಯತೆ ಪರಿಶೀಲಿಸಲು ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಅವರು, ಹಣಕಾಸು ಕಾರ್ಯದರ್ಶಿ ಹಸ್ಮುಖ್‌ ಆಧಿಯಾ ಅವರಿಗೆ ಸೂಚಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಜಿಎಸ್‌ಟಿಎನ್‌ ಅಂತರ್ಜಾಲ ತಾಣವು ಈಗ ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ತೆರಿಗೆ ಸಂಗ್ರಹದಲ್ಲಿ ಸ್ಥಿರತೆ ಕಂಡುಬಂದಿದೆ. ಇ–ವೇಲ್‌ ಬಿಲ್ ಜಾರಿಗೆ ಎದುರಾಗಿದ್ದ ಅಡಚಣೆಗಳೂ ದೂರವಾಗಿವೆ. ತೆರಿಗೆ ಸಂಗ್ರಹದಿಂದ ದತ್ತಾಂಶ ವಿಶ್ಲೇಷಣೆಗೂ ‘ಜಿಎಸ್‌ಟಿಎನ್‌’ ಬಳಕೆ ಮಾಡಬಹುದಾಗಿದೆ. ಈ ಎಲ್ಲ ಕಾರಣಕ್ಕೆ ಸಂಸ್ಥೆಯಲ್ಲಿನ ತನ್ನ ಪಾಲನ್ನು ಹೆಚ್ಚಿಸಲು ಸರ್ಕಾರ ಆಲೋಚಿಸುತ್ತಿದೆ. ‘ಜಿಎಸ್‌ಟಿಎನ್‌’ ಅನ್ನು 2013ರಲ್ಲಿ ಖಾಸಗಿ ಲಿಮಿಟೆಡ್‌ ಕಂಪನಿಯಾಗಿ ಅಸ್ತಿತ್ವಕ್ಕೆ ತರಲಾಗಿತ್ತು.
ಸ್ವಾಮಿ ಆಕ್ಷೇಪ: ಸಂಸ್ಥೆಯ ಪಾಲು ಬಂಡವಾಳದ ಸ್ವರೂಪದ ಬಗ್ಗೆ ಬಿಜೆಪಿಯ ಸಂಸದ ಸುಬ್ರಮಣಿಯನ್‌ ಸ್ವಾಮಿ ಅವರು ಹಲವಾರು ಬಾರಿ ಆಕ್ಷೇಪ ವ್ಯಕ್ತಪಡಿಸಿದ್ದರು. ಖಾಸಗಿಯವರ ವಶದಲ್ಲಿ ಇರುವುದರಿಂದ ದತ್ತಾಂಶಗಳ ಸುರಕ್ಷತೆಗೆ ಧಕ್ಕೆ ಒದಗಲಿದೆ. ಸೂಕ್ಷ್ಮ ಮಾಹಿತಿಯು ಖಾಸಗಿ ಸಂಸ್ಥೆಯ ವಶದಲ್ಲಿ ಇರುವುದು ಯಾವುದೇ ಕಾರಣಕ್ಕೂ ಸರಿಯಲ್ಲ ಎಂದು ಅವರು ಪ್ರಧಾನಿಗೆ ಪತ್ರ ಬರೆದು ಒತ್ತಾಯಿಸಿದ್ದರು.
**
15 ರಿಂದ 5 ರಾಜ್ಯಗಳಲ್ಲಿ ಇ–ವೇ ಬಿಲ್
ಐದು ರಾಜ್ಯಗಳಲ್ಲಿ ಏಪ್ರಿಲ್ 15 ರಿಂದ ರಾಜ್ಯದೊಳಗಿನ ಸರಕು ಸಾಗಣೆಗೆ ಇ–ವೇ ಬಿಲ್ ವ್ಯವಸ್ಥೆ ಜಾರಿಗೆ ಬರಲಿದೆ. ಗುಜರಾತ್‌, ಉತ್ತರ ಪ್ರದೇಶ, ಕೇರಳ, ತೆಲಂಗಾಣ ಮತ್ತು ಆಂಧ್ರಪ್ರದೇಶ ರಾಜ್ಯಗಳಲ್ಲಿ ಮೊದಲ ಹಂತದಲ್ಲಿ ಈ ವ್ಯವಸ್ಥೆ ಜಾರಿಗೆ ಬರಲಿದೆ.
₹ 50 ಸಾವಿರಕ್ಕಿಂತ ಹೆಚ್ಚಿನ ಮೊತ್ತದ ಸರಕುಗಳನ್ನು ರಾಜ್ಯದೊಳಗೆ ಮತ್ತು ರಾಜ್ಯದಿಂದ ರಾಜ್ಯಕ್ಕೆ ಸಾಗಿಸುವಾಗ ಇ–ವೇ ಬಿಲ್ ಪಡೆಯುವುದು ಕಡ್ಡಾಯ.
ರಾಜ್ಯದಿಂದ ರಾಜ್ಯಕ್ಕೆ ಸರಕು ಸಾಗಣೆಗೆ ದೇಶದಾದ್ಯಂತ ಏಪ್ರಿಲ್ 1 ರಿಂದ ವ್ಯವಸ್ಥೆ ಜಾರಿಗೆ ಬಂದಿದೆ. ಏಪ್ರಿಲ್ 9ರವರೆಗೆ 63 ಲಕ್ಷಕ್ಕೂ ಅಧಿಕ ಇ–ವೇ ಬಿಲ್ ಸೃಷ್ಟಿಯಾಗಿದೆ. ಒಂದು ದಿನಕ್ಕೆ 75 ಲಕ್ಷದವರೆಗೂ ಬಿಲ್ ಸೃಷ್ಟಿಸುವ ಸಾಮರ್ಥ್ಯವನ್ನು ಜಾಲತಾಣ ಹೊಂದಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.