ಗದಗ: ಜಿಲ್ಲೆಯಲ್ಲಿ ಮಂಗಳವಾರ ಒಂದೇ ದಿನ ಒಟ್ಟು 9 ಮಂದಿಗೆ ಕೊರೊನಾ ಸೋಂಕು ದೃಢಪಟ್ಟಿದೆ. ಈ ಮೂಲಕ ಜಿಲ್ಲೆಯಲ್ಲಿ ವರದಿಯಾದ ಒಟ್ಟು ಪಾಸಿಟಿವ್ ಪ್ರಕರಣಗಳ ಸಂಖ್ಯೆ 88ಕ್ಕೆ ಏರಿಕೆಯಾಗಿದೆ.
ಧಾರವಾಡ ಜಿಲ್ಲೆಯ ಮೊರಬ ಗ್ರಾಮದ ಪಿ-8289 ಹಾಗೂ ಪಿ-8290 ಸಂಪರ್ಕದಿಂದ ಗದಗ ತಾಲ್ಲೂಕಿನ ಹೊಂಬಳ ಗ್ರಾಮದ 32 ವರ್ಷದ ಮಹಿಳೆ (ಪಿ-9403) ಹಾಗೂ 38 ವರ್ಷದ ಮಹಿಳೆಯಲ್ಲಿ (ಪಿ-9404) ಸೋಂಕು ದೃಢಪಟ್ಟಿದೆ.
ಹರ್ತಿ ಗ್ರಾಮದ ಪಿ-7832 ಸಂಪರ್ಕದಿಂದ ಹೊಸೂರಿನ 65 ವರ್ಷದ ಮಹಿಳೆಗೆ, ಪಿ-9406 ಹಾಗೂ ಪಿ-8725 ಸಂಪರ್ಕದಿಂದ ಗದುಗಿನ 25 ವರ್ಷದ ಮಹಿಳೆಗೆ (ಪಿ-9405) ಸೋಂಕು ದೃಢಪಟ್ಟಿದೆ.
ಗದುಗಿನ ಮಲ್ಲಸಮುದ್ರದ 35 ವರ್ಷದ ಪುರುಷನಿಗೆ (ಪಿ-9402) ಸೋಂಕು ತಗುಲಿದ್ದು, ಇದರ ಮೂಲವನ್ನು ಪತ್ತೆ ಹಚ್ಚಲಾಗುತ್ತಿದೆ. ಹೊರ ಜಿಲ್ಲೆಯ ಪ್ರಯಾಣದ ಇತಿಹಾಸ ಹೊಂದಿರುವ ರೋಣದ 33 ವರ್ಷದ ಪುರುಷನಿಗೆ (ಪಿ-9410) ಸೋಂಕು ಕಾಣಿಸಿಕೊಂಡಿದೆ.
ಅಂತರ್ ಜಿಲ್ಲಾ ಪ್ರಯಾಣದಿಂದಾಗಿ ಇಟಗಿ ಗ್ರಾಮದ 38 ವರ್ಷದ ಪುರುಷನಿಗೆ (ಪಿ-9407) ಸೋಂಕು ದೃಡಪಟ್ಟಿದ್ದು, ಇವರ ಸಂಪರ್ಕದಿಂದ 28 ವರ್ಷದ ಪುರುಷ (ಪಿ-9409) ಹಾಗೂ 32 ವರ್ಷದ ಮಹಿಳೆಯಲ್ಲಿ (ಪಿ-9408) ಸೋಂಕು ದೃಢಪಟ್ಟಿದೆ.
‘ಸೋಂಕಿತರನ್ನು ಜಿಲ್ಲಾ ಕೇಂದ್ರದ ನಿಗದಿತ ಕೊವಿಡ್-19 ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ’ ಎಂದು ಗದಗ ಜಿಲ್ಲಾಧಿಕಾರಿ ಎಂ.ಜಿ.ಹಿರೇಮಠ ತಿಳಿಸಿದ್ದಾರೆ.
ಸದ್ಯ ಜಿಲ್ಲೆಯಲ್ಲಿ 42 ಸಕ್ರಿಯ ಪ್ರಕರಣಗಳಿವೆ. ಸೋಂಕಿನಿಂದ ಇಬ್ಬರು ಮೃತಪಟ್ಟಿದ್ದು, 44 ಜನರು ಗುಣಮುಖರಾಗಿ ಮನೆಗೆ ಮರಳಿದ್ದಾರೆ.